Read obolo Efes 3 Bible Online

Efes 3 - obolo bible

Efes 3

¹Îre mije etip atata nnwọn yi ke emi Pọọlu nkana ogwu mkpọn me ibot kinyi ebi ekarege ebi Ju, nan̄a me lek ikwaan̄ kè Karais eyi nsibe me etete kinyi.

²Nkeek ibe ke enyi mîra inọ etip atata nnwọn Awaji, eyi Awaji osabe inyi enyi inan̄a me ubọk n̄a.

³Etip atata nnwọn yi ore nlelet otitọt Awaji ya, eyi Awaji ochilibe ijeen̄ emi, kubọk mwuukbe lek ige sọntiik inu ofolek inyi enyi.

⁴Enyi isifuk ikpa keyi, enyi mênikọt iriọọn̄ inu emi nriọọn̄be me lek nlelet inu ofolek kè Karais.

⁵Awaji ìkachili inu yi ìjeen̄ ebilene me mgbọ òraraka. Ire, me mgbọ keyi, Awaji îsa me Ekwukwu kan̄ ichili nlelet inu yi ijeen̄ ebi otuchieen̄ mè ebi nriran kan̄ ìkukup me mbuban.

⁶Nlelet otitọt ya ìre ikeyi: Me emen kè Karais, inan̄a me lek ata etip kan̄, ebi ekarege ebi Ju mîgọọk ebi Ju igbaan̄ ikaan̄ otutuuk ugbana Awaji geelek me ìrot. Ema melek ebi Ju mîgbaan̄ ire bọn owot ge. Ema si mîgọọk ebi Ju igbaan̄ ikaan̄ uche me lek use eyi Awaji ochieekbe ebi Ju.

⁷Îre nan̄a me lek atata nnwọn Awaji, eyi Awaji osa me ikpele unye kan̄ iche inyi emi, ke emi nsa ikana ogwu òkilook ata etip yi.

⁸Ubọk geelek nsipbe igak ogwu òsisip ichit me etete otutuuk bọn Awaji, îre emi ke Awaji onyi atata nnwọn yi, inyi ǹsi ǹlook ebi ekarege ebi Ju ata etip ofolek uga oruru ikakaan̄ge okputut, eyi òkup me emen kè Karais.

⁹Awaji ìbe emi ǹrọ si, inyi otutuuk ene eriọọn̄ ubọk nlelet otitọt kan̄ obosa irọ iso. Awaji ogwu òrorom inu geelek ìlelet otitọt yi me ejit kan̄ karake ukot ukot.

¹⁰Awaji ìchili inu yi ibook me mgbọ keyi, inyi ebi ibot ebi osat Awaji ìkup me emen inyọn̄, mè ebi ibot erumun̄ geelek ìkup me isinyọn̄ esa me lek ntitiin̄ kan̄ ekween̄ inu ofolek iriọọn̄-inu kan̄ me irek me irek.

¹¹Awaji ìrọ inu yi igọọk me lek nkeek kan̄ eyi òkukup ire mgbọ ikakaan̄ge itata, eyi îrọbe iso me emen Okaan̄ kiji Jisọs Karais.

¹²Îre me emen kè Karais, inan̄a me lek ichechieek eyi eji echieekbe me lek kan̄, ke eji ekikọt ifet lek ije inu me isi Awaji me òjot òjot utoon̄-ejit.

¹³Eya orọ, soso, ikachieek ibe osusut nkibọkọ me ibot kinyi irọ inyi lek kinyi iwọ. Mije, enyi ke ufialek chi obonin̄ oruru inyi.

¹⁴Mije inu chi ke ntọbọ ekpe me isi Awaji Ute,

¹⁵ogwu otutuuk ebi ototun̄ ukan̄ geelek me emen inyọn̄ mè linyọn̄ keyi esabe me lek kan̄ ikaan̄ erieen̄ kiban̄.

¹⁶Ǹkiriaak uriaak ibe mè Awaji ogwu òbọbọọn̄ ubọọn̄ enenen me ujamgbugbo kan̄, isa me Ekwukwu kan̄ inyi enyi unye-lek me emen ekwukwu kinyi,

¹⁷inyi Karais iluk me emen ejit kinyi nan̄a me ichechieek kinyi. Ǹkiriaak si uriaak ibe mè enyi ekeke enye, mè etibi emiin̄ me emen imumechieen̄,

¹⁸inyi enyi melek otutuuk bọn Awaji geelek ekọt egobo etet ubọk imumechieen̄ Karais okaan̄be me lek kiji osabe iwele, mè ijọn̄ọ, mè ibene, mè idọk iyaka.

¹⁹Ǹkiriaak si Awaji ibe irọ inyi enyi ekọt eriọọn̄ imumechieen̄ yi eyi kpunube ifuk-ibot geege òbokọt igobo itet, inyi enyi esa me ikeya ejot echak me inu eyi Ekwukwu me agan̄ geelek me ugwem kinyi, kubọk Awaji me lek kan̄ ojotbe ichak isan̄a kpai.

²⁰Me mgbọ keyi, itọn̄ ikup inyi Awaji ogwu òkisa me unye kan̄, eyi òkisi ikwaan̄ me emen kiji, ikọt ikirọ inu geelek ijọn̄ọ ere isaba iraka ubọk eji ebeekbe, mè ìyaka ire ubọk eji ekeekbe.

²¹Itọn̄ mè umin ikup inyi ọmọ me emen ntitiin̄ kan̄, mè emen kè Jisọs Karais, me ukot geelek, mege ire mgbọ ikakaan̄ge itata. Ikup ikeya!