Read obolo Efes 4 Bible Online

Efes 4 - obolo bible

Efes 4

¹Eya orọ, emi ogwu òkup me mkpọn mije Okaan̄-ene, ǹkiriaak enyi ibe enyi ekeluk ugwem ògbegbe igwen eyi Awaji ogwenbe enyi.

²Ìkisiki lek kinyi me ijọn̄ enenen, mè ìkirọ inu esuuk esuuk. Ìkikaan̄ ukarajit me lek ene, mè ìkisa me imumechieen̄ ìkime inu ebi melek kinyi ekirọ.

³Ubọk geelek enyi ekọtbe, ìsa me oniin̄ eyi esuuk eyi ògbagbaan̄ enyi ibọp, ìgbaan̄ ìre ge me emen Ekwukwu Mbuban.

⁴Akpalek ge gaalek okup, Ekwukwu Mbuban ge gaalek si okup. Ikeya si, ikpọchieen̄ ge gaalek okup, ọmọ ke Awaji ogwen enyi itap me emen me mgbọ îgwenbe enyi.

⁵Okaan̄-ene ge gaalek okup, ichechieek ge gaalek okup, igwook-mun̄ ge gaalek si okup.

⁶Awaji ge gaalek okup, ọmọ ore Ute inyi otutuuk ene. Ọmọ okikpukpo otutuuk ene, mè ikisi ikwaan̄ me emen otutuuk ene, mè iluk si me emen otutuuk ene.

⁷Ire, Awaji ìnyi eji geelek atata nnwọn kan̄ igọọk me ike uche eyi Karais onyibe eji ominbe iyaka.

⁸Îre mije keyi ke ege me Ikpa Mbuban ibe: “Mgbọ înenebe ifo emen inyọn̄, îsa ogbogbo ebi îkpulube me akọn̄ ikaan̄ me ubọk ifo, mè iche uche òkup esese esese inyi ebilene.”[1]

⁹(Ire, ìre ikọ ya eyi egebe ibe, “Înene ifo emen inyọn̄” ìsibi keke? Ìsibi ibe ke ogwu ònenene ifo emen inyọn̄ ya îdasi inan̄a me emen inyọn̄ igele isibi inu me linyọn̄, mè ikwala iraka inin̄ ejit ijọn̄.

¹⁰Ogwu ògegele isibi ya ore ene ya ogwu ònenene ifo inyọn̄ ibene iraka otutuuk isinyọn̄, inyi ọmọ iwele isi ichak me otutuuk isinyọn̄ mè linyọn̄ geelek Awaji orombe.)

¹¹Îre ọmọ oche uche inyi ebilene, mè inyi usini ene ibe ere ebi otuchieen̄, mè inyi usini ene ibe ere ebi nriran, mè inyi usini ene ibe ere ebi ìkilook ata etip, mè inyi usini ene ibe ere ebi ìkikpulu ntitiin̄ Awaji mè ebi ijejeen̄.

¹²Awaji ìnyi otutuuk uche chi isasa itutuun̄ ebi kan̄, inyi ekekọt esi ikwaan̄ òkup esese esese esa enama akpalek kè Karais, eyi òrere ntitiin̄ Awaji, ebene efo inyọn̄,

¹³mege ire mgbọ eji otutuuk ene mêkanabe ire ge me emen ichechieek mè emen irọriọọn̄ Gwun̄ eyi Awaji, mè imiin̄ isibi, mè ijot ichak me inu geelek, kubọk Karais ojotbe ichak isan̄a kpai.

¹⁴Mgbọ ya, eji kpebeyaka ire asa nsabọn ebi nlilọ ijejeen̄ geelek obokọt ikiben itọp ikana kubọk ekoon̄, mè ikiben iwut ikana kubọk efet. Eji kpebeyaka ire si ebi ebilene ebekọt isa ifiọk mè ujọn̄ọ ifuk-ibot ofiaan̄ ema ekisa ifeen̄ ene iniben ikiwumu ikana.

¹⁵Kpan̄asi ikeya, eji esa me imumechieen̄ eketumu atikọ mgbọ geelek, inyi eji eketibi emiin̄ me oniin̄ geelek me emen kè Karais ogwu òrere Ibot.

¹⁶Inan̄a me lek kan̄, ogwu òrere Ibot, ke otutuuk akpalek, eyi nlik mè ufuk otetbe igbaan̄ isọk, okitibi isibi, mè ikinama lek kan̄ ibene me imumechieen̄. Sabum akpalek ya obokọt ikitibi, otutuuk nriro òkup me emen akpalek ya ebekisisi ikwaan̄ kiban̄ iso.

¹⁷Eya orọ, ǹkisa me erieen̄ Okaan̄-ene itumu inyi enyi ibe: Ikayaka ìluk ugwem kubọk ebi ekarege ebi Ju ekiluk me emen wọlọwọlọ ifuk-ibot kiban̄ cha ikakupge me lek inu geege.

¹⁸Ifuk-ibot kiban̄ ìkpọkpọ idun. Ema mîjọn̄ọ ere enenen me lek ugwem Awaji okinyi ene, mije, bak me lek unye-ejit kiban̄, ema kpekọt iriọọn̄ inu geege.

¹⁹Esip geege ìkakup ema me isi. Eya orọ, kpunu nsebe nsebe inu geege eyi ema kpekirọ. Ema si mîsa lek kiban̄ itap me emen ugwem ten̄ten̄ geelek ikagbege, mè ikpọkpọ ikikaan̄ si ulọk irọrọ ijo inu chi ifo isi igak ikeya.

²⁰Ire, inu enyi ekween̄be ofolek kè Karais ìkakup ikeya.

²¹Nkeek ibe ke enyi mînọ inu ofolek kè Karais, mè ikeek si ibe, mije enyi echieekbe me lek kan̄, ke mîra ijeen̄ enyi atikọ eyi òkup me emen kan̄.

²²Eya orọ, òfo me lek oka ugwem eyi enyi ekiluk, ìwọọk oka akpalek kinyi ya, eyi ijo ulọk eyi ofiaan̄ ofiatbe isan̄a ya, ìsan̄a,

²³inyi Awaji inirọ mè ejit kinyi mè ifuk-ibot kinyi ikana ayaya.

²⁴Ìtap ayaya akpalek eyi Awaji orombe me mbet kan̄, ibe iniluk ata ugwem me emen ata irọrọ, mè ikup si me mbuban.

²⁵Eya orọ, ene geege ikayaka ìkan̄ ataak! Ene geelek ikitumu atikọ inyi ogwu melek kan̄, mije, eji otutuuk egbaan̄ ikup me emen kè Karais yaage, kubọk otutuuk nriro òkup me lek ene ogbaan̄be ikup me akpalek yaage.

²⁶Ire onaan̄ ejit, kachieek ibe unaan̄-ejit ya isa owu isi itap me irọrọ ijo inu.[2] Katet unaan̄-ejit ya ìkaan̄ me ejit kwun̄ mege ìfit egwe,

²⁷inyi owu okanyi Yọk irek geege me emen ugwem kwun̄.

²⁸Ogwu òkiwuuk lek ichiin̄ inọ, ikayaka ìchiin̄. Kpan̄asi ikeya, isa ubọk kan̄ ikirọ ikwaan̄ ògbegbe, inyi ikaan̄ inu ìbokisa ikpukpo lek kan̄, mè ikisa itap si ubọk inyi ebi ìkup me una.

²⁹Ikachieek ibe ijo ikọ geege ikinan̄a me otu kinyi isibi. Ire, ìkitumu ata ikọ gaalek eyi òbokitap ubọk inyi ene, mè ikibene ugwem ene igwuun̄ me agan̄ geelek ene ya okupbe me una, mè ikọ kinyi ikikaan̄ oruru inyi ebi ìkigban̄ enyi.

³⁰Ikakirọ inyi Ekwukwu Mbuban Awaji òkup me emen kinyi ikinaan̄ ejit, mije, ọmọ ore iman̄ òriọọn̄ eyi Awaji otapbe enyi me lek, isasa ijeen̄ ibe ke enyi ìre ebi kan̄ mege ire mgburudun̄ usen, mgbọ ọmọ môfakabe enyi isibi me usun̄ eyi ijo inu.

³¹Ìsan̄a ujat ejit geelek, mè unaan̄-ejit geelek, mè uyok-ejit, mè ibaak geelek, mè ikekeek ene ijo, mè irọrọ ikeme ene, me etete kinyi.

³²Ìkikaan̄ ata ejit mè ejit nsan me lek ebi melek kinyi, mè ìkitele ijo ebi melek kinyi erọbe enyi ìnyi ema, kubọk Awaji me lek kan̄ otelebe ijo kinyi inyi enyi mije kè Karais.