Read obolo Filip 1 Bible Online

Filip 1 - obolo bible

Filip 1

¹Emi Pọọlu melek Timọti, eji ebi usun̄ kè Karais Jisọs ege ikpa etip yi ijet enyi, otutuuk bọn Awaji ìkup me Filipai, enyi ebi ìrere bọn eyi Awaji inan̄a me lek kè Karais Jisọs, mè otutuuk kinyi ebi ìkikpọ chieen̄ me ntitiin̄ Awaji, mè ebi ntap-ubọk me ntitiin̄ Awaji.

²Atata nnwọn mè esuuk eyi ònan̄a me ubọk Awaji ogwu òrere Nte kiji, mè ubọk Okaan̄-ene Jisọs Karais, ikup inyi enyi.

³Nkitọn̄ Awaji n̄a enenen mije kinyi mgbọ geelek nkikeek enyi.

⁴Mgbọ geelek nkiriaak uriaak me ibot kinyi otutuuk ene, ǹkiriaak melek ikpele unwọọn̄ me ejit n̄a,

⁵mije enyi egọọkbe emi ikisi ikwaan̄ ata etip yi bene me ibebene mege na re mgbọ keyi.

⁶Ofifi si, ejit n̄a înye ibe ke Awaji ogwu òbebene irọrọ ata ikwaan̄ kan̄ me emen ejit kinyi ìkpolọlọ isisi ikwaan̄ yi mege isi ire òta kan̄, me usen Jisọs Karais mônube.

⁷Îgbe ibe emi ǹkaan̄ ojelek ulọk òkup ikeyi me lek kinyi otutuuk, mije, mben enyi me ejit enenen. Melek si, enyi otutuuk mîgọọk emi igbaan̄ ikaan̄ uche me lek atata nnwọn eyi Awaji onyibe emi me mgbọ keyi nkupbe me mkpọn, melek mgbọ nkije ikana ikitumu ikọ me ibot ata etip, mè ikirọ ata etip ya inye.

⁸Ulọk nkaan̄be me lek kinyi îdọk enenen. Awaji me lek kan̄ môkọt ikeke ata-ikọ inyi emi. Ulọk yi ìnan̄a me ejit kè Jisọs Karais me lek kan̄.

⁹Uriaak nkiriaak inyi enyi ìre, mè imumechieen̄ enyi ekaan̄be me lek ebi melek kinyi ikpọkpọ ikimin, mè enyi ekekaan̄ si atata ifuk-ibot, mè ekegobo inu etet ejaan̄ lek.

¹⁰Sa me ikeyi ke enyi ebekọt ikiriọọn̄ inu ònwọnwọn ichit, inyi enyi etana esan̄a, mè ekakaan̄ nrọ-nlọ geege me emen mege ire usen Karais môkpọkbe inu.

¹¹Ofifi si, ikwaan̄ ata irọrọ eyi òkinan̄a me ubọk kè Jisọs Karais môjot me emen ugwem kinyi. Mije keyi, ebi ene mêkinyi Awaji umin mè itọn̄.

¹²Mgbọ yi, bọn Nte n̄a, ǹkiweek irọrọ inyi enyi eriọọn̄ ibe kè otutuuk inu chi òrọrọ emi îrọ inyi ata etip yi itaan̄ ijọn̄ọ ere.

¹³Mije ufialek n̄a chi, otutuuk ebi ikwaan̄ uwu ogwu Sisa, mè otutuuk ebi ofifi ife mîra iniriọọn̄ ijaan̄ lek ibe ke emi ǹkup me mkpọn mije kè Karais.

¹⁴Ofifi si, mkpọn yi nkupbe me emen îtap owuwa bọn Nte efuuk me emen, inyi ema etumu ikọ Awaji, kpetet ukpook, kpelibi ene geege chieen̄.

¹⁵Îre atikọ ibe ke usini ene ekilook ata etip kè Jisọs Karais me njijọ ejit, isasa itap ufialek. Ire, usini ene ekisa me ata ekiket ilook ebi ene ata etip ya, inyi ikọ Awaji ikije inyi isi.

¹⁶Ebi ìkisa me ata ekiket ilook ata etip ya ìre ebi ìmumun̄ emi me chieen̄, mije, ema mîriọọn̄ ibe ke Awaji ìsa emi initap me uwu mkpọn, inyi ǹsa me irek keyi ǹrọ mè ebi ene eriọọn̄ ibe ke ata etip yi ìre atikọ.

¹⁷Ebibilọ cha kpesa me ata ejit ikilook ata etip ya. Ekisa me ejit mba, inyi ema etap ufialek ekeme emi me ibot me emen mkpọn yi nkupbe.

¹⁸Ire, eya ìkakup me uyọt. Inu òkukup me uyọt ìre ke ema mêkilook ata etip kè Karais ya si me oniin̄ geelek, mè ìre me ijo ejit, mè ìyaka ire me ata ejit. Mije keyi, ejit îbele emi enenen. Me atikọ, mâkibele ejit si inyi isi,

¹⁹mije nriọọn̄ ibe, sa me uriaak enyi ekiriaak me ibot n̄a, melek ntap-ubọk eyi Ekwukwu kè Jisọs Karais, ke inu yi môrọ inyi emi ǹsibi me mkpọn.

²⁰Inu nkiweek me otutuuk ejit n̄a, mè ikikpọ chieen̄ si, ìre, mè inu geege ikarọ inyi esip itet emi. Ire, kpan̄asi ikeya, ǹkiweek ibe ǹkat ejit enenen me mgbọ keyi kubọk nkikat otutuuk mgbọ, inyi Karais ikaan̄ umin me emen akpalek n̄a, mè ìre emi ǹkwukwu, mè ìyaka ire ǹkukup me ugwem.

²¹Mije, me lek n̄a, ire emi nkup me ugwem, ǹkup inyi Karais. Ire nkwu mkpa, eya ìre oruru inyi emi.

²²Ire, ire nluk ugwem inyi isi me linyọn̄ keyi, mâkọt irọ owuwa inu eyi môtapbe ubọk inyi owuwa ene. Mije keya, ǹkayaka ìriọọn̄ agan̄ mbamọnọ.

²³Agan̄ iba cha ìkpọkpọ ikitaba emi. Îlọk emi ikwukwu itele linyọn̄ keyi, mè ifo isi igọọk Karais ikup, mije, eya onwọn enenen igak iluluk me linyọn̄ keyi.

²⁴Ire, mije kinyi, emi ikukup me ugwem me linyọn̄ keyi îkup me uyọt igak emi ikwukwu ifo igọọk Karais.

²⁵Eyi ìre atikọ. Eya orọ, nriọọn̄ ibe ke mâluk melek kinyi, mè ikitap ubọk inyi enyi, inyi enyi ekaan̄ unwọọn̄, mè ekeje enyi isi me emen ichechieek.

²⁶Eya orọ, ire nsibi me mkpọn, mè ikpọk inichichini melek kinyi, enyi mênwọọn̄ unwọọn̄ enenen, mije n̄a, mè itọn̄ Jisọs Karais enenen mije inu îrọbe inyi emi.

²⁷Ire, enyi ìluk ugwem ògbegbe ebi ìbọbọkọ ata etip kè Karais itap. Eya ore inu òkukup me uyọt. Ire enyi ikiluk ikeya, mè ìre ǹnunu, mè ìre ǹkakọt ìnu, mâriọọn̄ ibe ke enyi mîkeke inye me ekiket ge, mè ikisa me ejit ge igbaan̄ itim akọn̄ me ibot ata etip eyi enyi echieekbe me lek.

²⁸Mânọ si ibe ke enyi kpechieek ibe ebi ìkirọ ikeme enyi etap enyi ukpook me emen. Eyi môjeen̄ ema ikpọk mbum ibe ke Awaji me lek kan̄ obotip ema oyerebet, mè inyan̄a enyi isibi.

²⁹Mije, Awaji ogwu ògwegwen enyi, inyi enyi enechieek me lek kè Karais, ìgwen enyi si ibe enyi enebọkọ ufialek mije kè Karais.

³⁰Me mgbọ keyi, îre enyi melek n̄a ekigbaan̄ itim akọn̄ ya enyi emun̄be emi nkitim me mgbọ òraraka, mè ikup me lek ititim si inire mgbọ keyi.