Read obolo Filip 2 Bible Online

Filip 2 - obolo bible

Filip 2

¹Karake enyi ekanabe ebi eyi Karais, igọgọọk Karais îtap enyi efuuk me emen. Imumechieen̄ kan̄ înyi enyi ukarajit. Enyi mîgbaan̄ inu irọ melek Ekwukwu Mbuban. Enyi mîkaan̄ si ata ejit mè ejit nsan me lek ebi melek kinyi.

²Ire inu chi ire ikeya me atikọ, soso, ìgbaan̄ ìkaan̄ ejit ge, mè ìmun̄ lek kinyi me chieen̄, mè ìkaan̄ ekiket ge mè ulọk ge. Ìkiluk ikeyi ìfo isi, inyi unwọọn̄ n̄a ijot ichak.

³Me emen inu geelek enyi ekirọ, ikakikeek lek kinyi gaalek. Ìsan̄a lek kinyi me lek ugumulek ikakaan̄ge ibot. Kpan̄asi ikeya, ìkisiki lek kinyi me ijọn̄, mè ìkimọnọ ebi ofifi ife kubọk ebi ìnwọnwọn igak enyi.

⁴Ikakirọ inu òbokinin̄ enyi gaalek oruru. Ire, ìkiweek irọrọ inu echi òbokinin̄ oruru inyi ebi ofifi ife si igbaalek.

⁵Ìtele inyi ekiket ejit kinyi ire ìkike melek ekiket ejit kè Karais Jisọs.

⁶Me atikọ, bene me ibebene, Karais ìre ìkike melek Awaji. Ire, ìkasa me unye ìgọbọ irek irere ìkike melek Awaji ìkaan̄.

⁷Kpan̄asi ikeya, ìtetele otutuuk irek ya, mè iyaka inimọnọ irek ogwu usun̄, emaman ọmọ me linyọn̄ keyi me mbet ebilene kubọk ekiman ebilene.

⁸Mgbọ înube me linyọn̄ kubọk ebilene, ìsisiki lek kan̄ me ijọn̄, mè ichieek ikwukwu mkpa. Mkpa ya si ke îkwu me inyọn̄ uti nkwurieen̄.

⁹Mije keya, Awaji obebene ọmọ ifo inyọn̄, mè isun̄ ọmọ me irek òbebene ichit, mè inyi ọmọ erieen̄ ilile eyi òmimin igak otutuuk erieen̄ geelek.

¹⁰Eya orọ, isibak erieen̄ kè Jisọs, otutuuk inu geelek Awaji orombe, bene me lek ebi ìkup me emen inyọn̄ re lek ebi ìkup me linyọn̄ keyi, mè ebi ìkup me irak linyọn̄ keyi (eyi òrere ama ekwukwu), mêgwook akpatukot me ijọn̄, mè itọbọ ebum inyi Jisọs.

¹¹Otutuuk otu geelek môtumu isibi si ibe ke Jisọs Karais ore Okaan̄-ene, inyi itọn̄ mè umin geelek ikup inyi Awaji Ute.

¹²Eya orọ, atata ebi une n̄a, enyi mîkigban̄ utọn̄ inyi emi mgbọ nkupbe melek kinyi. Ire, mgbọ keyi nkakupge melek kinyi, îkup me uyọt enenen ibe enyi egban̄ utọn̄ egak ikeya. Ìsiki lek ìsi ikwaan̄ ìnyi Awaji me iraran lek mè ukpook, inyi unyan̄a kinyi iso ifuk.

¹³Mije, îre Awaji me lek kan̄ okisi ikwaan̄ me emen ejit kinyi, inyi enyi ekeweek irọrọ inu òkibele ọmọ ejit. Ọmọ si okitap ubọk inyi enyi, mè enyi ekekọt erọ si inu cha.

¹⁴Ikakinunuun̄, ikakitap okput me inu geelek enyi eberọ.

¹⁵Sa me ikeya, enyi mêre ebi kpunube inu geege ebesa itumu ikọ ikeme. Enyi mêre si bọn Awaji ebi ìtatana isan̄a, ebi ekakaan̄ge nrọ-nlọ geege me lek, me etete ijo ebi linyọn̄ keyi ebi ìwuwuwọlọ isan̄a. Îre enyi ekinyi utoon̄ me emen ijo linyọn̄ keyi, kubọk ebi kè ntoronyan̄ ekinyi utoon̄ me isinyọn̄.

¹⁶Enyi ekinyi utoon̄ ya me linyọn̄, mije enyi ekilook ebi ene etip òkinyi ene ugwem. Ìnye lek ìkirọ ikeya ìnyi isi mege ire mgbọ Karais môkpọkbe inu, inyi ǹkaan̄ inu mâsabe igugo lek. Mije, mâriọọn̄ ibe ke ekot nlibibe mè kwulukwulu nkwukwulube ìkachep me ikike.

¹⁷Ichechieek kinyi ìkup kubọk ngwugwa egwabe inyi Awaji. Usini mgbọ, ugwem n̄a obore kubọk miin̄ ebesa itọkọ igwook me lek ngwugwa ya. Ìrere ikeya ke ìbokup, emi mâbele ejit, mè igọọk otutuuk kinyi igbaan̄ inwọọn̄ unwọọn̄ si.

¹⁸Ikeya si, îgbe ibe enyi ebele ejit, mè egọọk emi enwọọn̄ unwọọn̄.

¹⁹Ire ineme Okaan̄-ene Jisọs, ǹkikpọ chieen̄ iraria Timọti inu me lek kinyi me mgbet mgbet mgbọ, inyi ǹnọ etip ofolek kinyi, mè ǹkaan̄ ubelejit.

²⁰Ǹkakaan̄ ofifi ene òkup kubọk Timọti, ogwu ata ekiket ofolek kinyi okiyok me ejit.

²¹Mije, otutuuk kebilọ, ogwu ikup, ìkirọ inu òneme ọmọ, isasa itap ubọk inyi ugwem kan̄. Kpunu ogwu òyayaka ikikpọ chieen̄ me lek inu eyi Jisọs Karais.

²²Ire Timọti, otutuuk kinyi mîriọọn̄ ibe ke îkaan̄ ata ugwem. Mije, ọmọ îgọọk emi isi ikwaan̄ ilolook ata etip, kubọk gwun̄ okigọọk ogwu ute isi ikwaan̄.

²³Ǹkikpọ chieen̄ iraria ọmọ inu me lek kinyi mgbọ geelek mâriọọn̄be ubọk inu obokup melek n̄a me ere keyi.

²⁴Ntoon̄ ejit me lek Okaan̄-ene si ibe ke ìkpojọn̄ọ mgbọ emi me lek n̄a mânube inimun̄ enyi.

²⁵Epaforoditọs, atata gwun̄ Nte n̄a ogwu enyi eriabe ibe initap ubọk inyi emi, îgọọk emi isi ikwaan̄, mè itim akọn̄ ya ijaan̄. Me mgbọ keyi, mmun̄ ibe ke îkup me uyọt ibe emi ǹria ọmọ ǹka ǹjet enyi me ere keya.

²⁶Mije, otutuuk kinyi mêkilọk ọmọ. Ofifi si, îfieek ọmọ me lek ibe ke enyi mîra inọ ibe ke lek kan̄ ìkanye.

²⁷Me atikọ, Epaforoditọs îfiak enenen, mè ibonikwu. Ire, Awaji okakaan̄ ejit nsan me lek kan̄, mè ikaan̄ si me lek n̄a, mè inyan̄a ugwem kan̄, inyi nkarọn̄ ìnin̄ ofifi inu ufieejit eyi òmimin igak eyi nkupbe me emen mgbọ keyi.

²⁸Eya orọ îkupbe emi me uyọt igak otutuuk igwagwat lek iria ọmọ ijet enyi, inyi enyi emun̄ ọmọ, mè ebele ejit, mè ufieejit n̄a si iyaka igele.

²⁹Ọmọ isinu, ìsa unwọọn̄ ìbọkọ ọmọ ìtap kubọk ngwan̄ kinyi me emen Okaan̄-ene. Îgbe ibe enyi ekemin ebi ìkup kubọk Epaforoditọs.

³⁰Mije, ìsik sọntiik ọmọ mokwu mije ikwaan̄ kè Karais. Îsa ugwem kan̄ igwen inu ikike, inyi ọmọ ikọt inyi emi ntap-ubọk eyi ikafetge ibe enyi me lek kinyi ekọt enyi emi.