Read obolo Filip 3 Bible Online

Filip 3 - obolo bible

Filip 3

¹Me òta kan̄, bọn Nte n̄a, ìbele ejit mije enyi erebe ebi eyi Okaan̄-ene. Efuuk ìkata emi me emen ikpọkpọk ige si ikọ yaage mwuukbe lek ige ijet enyi, mije, ire ǹkakpọk ìge ikọ yi ìjet enyi, enyi mêkọt inin̄ emen ufialek.

²Ìgbala chieen̄ kinyi me lek ebi ife cha ìkisi ijo ikwaan̄ kubọk ibo, mè ikitọ ibe efieek otutuuk ene afi eyi akpalek.

³Eji ebi ìrere bọn Awaji inan̄a me ichechieek me lek kè Karais, eji ere ebi efieekbe afi ya me atikọ, ìkare ema cha. Eji ekitọbọ ebum inyi Awaji igọọk me nteme eyi Ekwukwu Awaji, mè ikimin Karais Jisọs mije inu îrọbe. Eji kpetoon̄ ejit me lek orọmijọn̄ eyi akpalek.

⁴Mebe ke orọmijọn̄ eyi akpalek îkup me uyọt, emi me lek n̄a nso ogwu motoon̄ ejit me lek. Ire ikaan̄ ogwu òkigugo lek ibe ke ọmọ îso ogwu môkọtbe itoon̄ ejit me lek orọmijọn̄ eyi akpalek, emi me lek n̄a nso igak ene ya.

⁵Mije, mgbọ emanbe emi isan̄a, efieek emi afi me òso egwe jeeta, igọọk me lek orọmijọn̄ ebi Ju. Ire me lek irere ogwu Ijeren, emi ìre gwun̄ owot ido Ijeren ònan̄a me otoko kè Benjamin, mè ire si atalek ogwu Iburu esabe eje ebi Iburu ibon. Ire me agan̄ isusun̄ Ikan ebi Ju, emi ìre ogwu Farisi.

⁶Ire me agan̄ ulọk itetet orọmijọn̄ ebi Ju, emi me lek n̄a nsisaak ebi ntitiin̄ Awaji me otutuuk efuuk n̄a. Ire si me agan̄ irere ogwu ata irọrọ me emen Ikan ebi Ju, emi ǹkare fọkọfọkọ ene, kpunu nlilọ geege me emen n̄a, nrọ otutuuk Ikan iso.

⁷Ire, otutuuk inu cha geelek echi mafukbe kubọk oruru inyi lek n̄a, mfuk ema otutuuk kubọk ichep mgbọ keyi, mije kè Karais.

⁸Ìkare inu kecha gaalek ke mfuk ichep! Me atikọ, mfuk otutuuk inu nkaan̄be kubọk ichep mije kè Karais, mije, irọriọọn̄ Karais Jisọs Okaan̄ n̄a, ọmọ onwọn ichit. Îre mije kè Jisọs Karais ke ntele otutuuk inu. M̀mọnọ otutuuk inu cha kubọk ifin ikike me lek n̄a, inyi ǹkọt ǹkaan̄ Karais me lek kan̄ me emen ugwem n̄a kubọk oruru,

⁹mè ǹkana ogwu eyi Karais me atikọ. Sa me ikeyi, emi m̀kpare ogwu ata irọrọ inan̄a me isusun̄ Ikan. Ire, mâkana ogwu ata irọrọ mije nchieekbe me lek kè Karais. Ojelek irere ogwu ata irọrọ keyi ìkinan̄a me ubọk Awaji, mè ikup inyi ebi geelek ìchechieek me lek kè Karais.

¹⁰Inu nkiweek ichit me ugwem n̄a ìre irọriọọn̄ Karais, mè irọriọọn̄ si unye ònan̄a me lek ijojomo me mkpa eyi ọmọ ojomobe. Ǹkiweek si imumun̄ ufialek ọmọ omun̄be, mè ikukup kubọk ọmọ okupbe me emen mkpa îkwube.

¹¹Sa me ikeya, usini mgbọ, emi mâgọọk ikup me otu ifuk ebi ìbejomo me mkpa.

¹²Ǹkatumu ibe ke nra iwuuk lek ikaan̄ otutuuk inu cha nkiweek ikakaan̄. Ǹkatumu si ibe ke nra inwọn isan̄a. Ire, ǹtetet lek inye ikilibi ekot yi, inyi ǹkọt ǹkaan̄ inu cha, mije, îre bak me lek inu cha ke Karais onyan̄a emi, mè itet emi ikaan̄.

¹³Bọn Nte n̄a, emi ǹkamọnọ ibe ke nra ikaan̄ inu ya nkibak me lek ilibi ekot ya. Ire, inu ge gaalek ke nkirọ mgbọ geelek. Ǹkiwuwuuk otutuuk inu echi òrọrọ iraka, mè itet lek inye ikilibi ekot ya inyi isi, mè iben chieen̄ n̄a igwuun̄ me lek inu echi òkup me isi.

¹⁴M̀kpọkpọ itet lek n̄a inye ikilibi ekot ya, inyi ǹlibi ǹre òta, mè m̀bọkọ mkpukpe. Mkpukpe ya ìre igwen, eyi Awaji ogwenbe emi itap me ugwem eyi emen inyọn̄ sa me lek kè Jisọs Karais.

¹⁵Îgbe ibe otutuuk kiji ebi ìmimiin̄ ikem me emen inu eyi Awaji ekekaan̄ ojelek ekiket òkup ikeyi. Ire ikaan̄ ogwu ikaan̄ ofifi ekiket me lek inu chi geelek, Awaji môrọ inyi ene ya igobo itet.

¹⁶Inu òkukup me uyọt ìre, mè eji ekeluk ugwem egọọk me lek atikọ ya eyi eji ewuukbe lek ikaan̄.

¹⁷Bọn Nte n̄a, ìgọọk otutuuk ene ìkiluk ugwem kubọk emi nkiluk me agan̄ geelek. Eji mîra ijeen̄ enyi ojelek ugwem ògbegbe ibe enyi ekeluk. Eya orọ, enyi isimun̄ ebi geelek ìkiluk ugwem ikeya, ìgbala chieen̄ ìkween̄ ubọk ema ekirọ inu.

¹⁸Mije, nra iwuuk lek itaba enyi ubọk me utọn̄ owuwa mgbọ ibe ke owuwa ene me etete kinyi ekiluk ugwem kubọk ebi ìjijit ikwaan̄ Karais osibe me inyọn̄ uti nkwurieen̄. Mgbọ keyi, ǹkisa mun̄ ito me chieen̄ ikpọk itaba enyi ubọk me utọn̄ ofolek ikọ yaage si.

¹⁹Òta kiban̄ ìbore mkpa me ama yọk. Owot kiban̄ ke ema ekisi ikwaan̄ inyi kubọk ìre Awaji. Inu echi mokitap ema esip me isi ke ema eyaka ikisa igugo lek. Inu linyọn̄ keyi gaalek ke ema ekisa itoon̄ ejit.

²⁰Eyi kiji, eji ìre bọn owot emen inyọn̄. Eji ekikpọ chieen̄ mgbọ Ogwu Unyan̄a, òrere Okaan̄-ene Jisọs Karais, mônan̄abe me emen inyọn̄ inu.

²¹Ọmọ isinu, môninwene mwuwọ akpalek kiji yi òbokwukwu, inyi ikaan̄ ujamgbugbo kubọk akpalek kan̄. Unye ìbosa inwene akpalek kiji ìre ikpele unye kan̄ ya eyi îsabe ikpulu otutuuk inu geelek itap me irak ubọk mkpulu kan̄.