Read obolo Filip 4 Bible Online

Filip 4 - obolo bible

Filip 4

¹Atata bọn Nte n̄a ebi mmun̄be me chieen̄, îkilọk emi enenen imumun̄ enyi mgbọ geelek. Enyi ere unwọọn̄ n̄a, mè ire si okpibot ubọọn̄ eyi nkaan̄be kubọk mkpukpe ikwaan̄ n̄a. Atata ebi une n̄a, mije inu ya Karais oborọ inyi eji, îgbe ibe enyi ebi eyi Awaji ekeke enye.

²Mgbọ keyi, ǹkiriaak ebi ngwan̄ kiji ebibaan̄ iba, Yuwodia mè Sintiki, ibe soso, mè ema erọ esuuk me etete kiban̄, mè egbaan̄ echieek, mije, ema ìre ge me emen Karais.

³Owu si, atata ogwu une n̄a, ogwu melek n̄a ekigbaan̄ isi ikwaan̄, soso, tap ubọk rọ inyi esuuk ikup me etete ebibaan̄ iba cha, mije, ema melek n̄a mîgbaan̄ imun̄ ufialek mgbọ ema egọọkbe emi ikisi ilook ebi ene ata etip. Kelementi mè ebi ofifi ife ìgọgọọk eji ijijen̄e mîmun̄ si ufialek. Awaji îge otutuuk erieen̄ kiban̄ me emen ikpa ugwem.

⁴Enyi ebi ìrere ebi eyi Karais, ìkinwọọn̄ unwọọn̄ mgbọ geelek! Iin̄, m̀be enyi ìkinwọọn̄ unwọọn̄!

⁵Ìkirọ inu esuuk esuuk melek otutuuk ene. Inunu Okaan̄-ene îkup mgbet.

⁶Ikasisaak ejit kinyi ofolek inu geege. Kpan̄asi ikeya, ìkpa inu geelek òkup enyi me uyọt ìnyi Awaji me uriaak. Me emen uriaak kinyi, ìkibeek Awaji mbeek, mè ìkinyi si ọmọ itọn̄.

⁷Ire enyi ikirọ ikeya, esuuk Awaji, eyi ebilene kpebekọt igobo itet, môbem ejit kinyi mè ekiket kinyi, inyi unan geege ikare enyi ebi eyi Karais Jisọs lek.

⁸Bọn Nte n̄a, òta ikọ n̄a ìre ikeyi: Ìkikeek ekiket ofolek inu geelek òrere atikọ, mè inu geelek òtatat, mè inu geelek òtatana me isi Awaji, mè inu geelek òjajaan̄, mè inu geelek ebi ene ekima. Inu geelek ònwọnwọn ichit, mè echi ebi ene mêkọtbe itọn̄, echichi ore inu ògbegbe ibe enyi ekekeek ekiket ofolek.

⁹Inu geelek enyi ekween̄be me ubọk n̄a, mè echi enyi ebọkọbe emi me ubọk, mè echi enyi enọbe emi me otu, mè echi enyi emun̄be me ugwem n̄a, ìkirọ otutuuk cha, ke Awaji ogwu ibot esuuk môkup melek kinyi.

¹⁰Nnwọọn̄ unwọọn̄, mè itọn̄ Okaan̄-ene enenen ibe ke enyi mîyaka ikpọk ibene ikikpọ emi chieen̄ me lek. Îfiin̄ mgbọ, karake enyi kpeyaka ikirọ. Me atikọ, nriọọn̄ ibe ke enyi mîkikaan̄ ulọk irọrọ, ire, irek ìkasibi ìnyi enyi ekọt ejeen̄ ulọk kinyi.

¹¹Ìkare kubọk ke îkaan̄ inu ònanan emi orọ mè ǹtumu ikọ ya, mije, m̀bọbọọk ugwem n̄a, inyi irek geelek nkupbe iso emi.

¹²Nriọọn̄ ubọk ekisa iluk ugwem me mgbọ una, mè iriọọn̄ si ubọk ekisa iluk ugwem me mgbọ owuwa. Nra ije itibi irek chi geelek, mè iriọọn̄ nlelet inu òkup me emen. Eya orọ, me mgbọ geelek, mè irek geelek, me uraafiọọn̄, mè mgbọ owot ojotbe emi, mè ìre m̀bọbọọn̄ ubọọn̄, mè ìre m̀gbọgbọọn̄ ugbọọn̄, nriọọn̄ ubọk mbasa ikup me ubelejit, mè itele inyi inu geelek nkaan̄be iso emi.

¹³Mâkọt irọ inu geelek sa me unye kè Karais ogwu òkitap emi efuuk me emen.

¹⁴Ubọk geelek si, enyi mîrọ ijaan̄ enenen me itatap ubọk inyi emi me emen otutuuk ufialek n̄a.

¹⁵Ògak ge, enyi ebi Filipai mîriọọn̄ ijaan̄ lek ibe, me mgbọ ntelebe Mesidonia, mè inibene ilolook ata etip keyi me etete kinyi me adasi mgbọ, ke kpunu ofifi ntitiin̄ Awaji geege ògọgọọk emi igbaan̄ isi ikwaan̄ kubọk enyi erọbe. Ike enyi ekibọkọ ikwaan̄ n̄a itap, enyi mîra ikiche si uche inyi emi. Îre enyi gaalek ekirọ inu ya.

¹⁶Mije, mgbọ nkupbe me Teselonaika, enyi mîria ntap-ubọk owuwa mgbọ ijet emi mgbọ inu okinan emi.

¹⁷Ìkare inu cha enyi ekiria ijet emi okup emi me uyọt. Inu òkup emi me uyọt ìre oruru eyi Awaji obonyi enyi mije ntap-ubọk chi enyi ekitap inyi emi.

¹⁸Inu enyi eriabe ijet emi inan̄a me ubọk kè Epaforoditọs îtap emi ubọọn̄. Kpunu inu geege òyayaka inan emi. Enyi mînyi emi otutuuk inu mweekbe, mè inyi iraka. Uche cha ìkup kubọk ngwugwa òkidun̄u utop olu, eyi egwabe inyi Awaji, Awaji obọbọkọ, mè ibele ejit me lek.

¹⁹Eya orọ, Awaji n̄a ogwu òbọbọọn̄ ubọọn̄ ichit me ujamgbugbo kan̄, môsa me lek kè Karais Jisọs inyi enyi otutuuk inu geelek òkup enyi me uyọt.

²⁰Itọn̄ ikup inyi Awaji kiji, òrere Nte kiji, isi ire mgbọ geelek ikakaan̄ge itata. Ikup ikeya.

²¹Ìtọp otutuuk ebi eyi Awaji, ìrere si ebi eyi Karais amọn ìnyi emi. Otutuuk bọn Nte ebi melek n̄a ekupbe me ere keyi mîtọp enyi amọn si.

²²Otutuuk ebi eyi Awaji ìkup me ere keyi, ògak ge ebi ìkup me uwu ogwu Sisa, mîtọp enyi amọn si.

²³Atata nnwọn eyi Okaan̄-ene Jisọs Karais ikup me emen kinyi otutuuk ene.