Read obolo Jos 11 Bible Online

Jos 11 - obolo bible

Jos 11

¹Mgbọ Jabin ogwu ubọọn̄ Asọru onọbe inu ebi Ijeren erọbe, iraria etip ijet Jobabu ogwu ubọọn̄ Madọn, mè iria si ijet ogwu ubọọn̄ Simiron, mè ogwu ubọọn̄ Akisafu,

²mè ebi ubọọn̄ ido echi agan̄ inyọn̄ ebi ìkup me inyọn̄ ogoon̄, mè ebi ìkup me iteke ijọn̄ Araba eyi òkup me osiki inyi okwaan̄ oyô Galili, mè ebi ìkup me inyọn̄ orioon̄ isi ogoon̄ agan̄ ichep-ura, mè ebi ìluk me lek okpurukpu ama Doru me agba okwaan̄ me agan̄ ichep-ura.

³Îria si etip ijet ebi ubọọn̄ Kenan ìluk me agan̄ mbum-ura mè agan̄ ichep-ura okwaan̄ Jodan, mè iria si ijet ebi Amọ, mè ebi Et, mè ebi Pereji, mè ebi Jebus me inyọn̄ ogoon̄, mè ebi Ifi ìluk me ebon ogoon̄ Emọn me lek ijọn̄ Mijipa.

⁴Ebi ubọọn̄ cha enenigbaan̄ isibi inu, ema mè otutuuk urum akọn̄ kiban̄ òwawa kubọk nkwukwuuk okpoon̄ òkup me agba awaji. Ema mîsa si ogbogbo inyinya, mè owuwa uji akọn̄ inyinya okitaba ije igbaalek inu.

⁵Otutuuk ebi ubọọn̄ chi egbagbaan̄ itọbọ, mè igbaan̄ igwugwuun̄ uwu ọfọ kiban̄ me agba lek okolo Merom, ikibem lek ititim akọn̄ me lek ebi Ijeren.

⁶Okumugwem onenitumu inyi Josuwa ibe, “Katet ukpook me lek ife chi. Me ike mgbọ keyi me iyakwut, emi me lek n̄a mâkpan̄ otutuuk kiban̄ isan̄a inyi ebi Ijeren. Enyi mêsọp nlik ebek ukot inyinya kiban̄, inyi ekayaka ìkọt ìje ije. Uji akọn̄ kiban̄ cha, enyi ebetatap ukan̄ iwọp.”

⁷Josuwa melek otutuuk urum akọn̄ ebi Ijeren esisibi isi lek ife cha me agba lek okolo Merom, mè ibene ema akọn̄ me lek me uwuuk-lek.

⁸Okumugwem oyayaka ife cha itap me ubọk ebi Ijeren. Ebi Ijeren etitim ikpan̄ ema, mè irieen̄ ema isi ire Sidọn ile, mè ama Misirefot Mayim, isi igwook me iteke ijọn̄ Mijipa me agan̄ mbum-ura. Ebi Ijeren ekpakpan̄ ema otutuuk isan̄a kpai, ene geege ìkayaka ìsik.

⁹Josuwa orọrọ ema ike Okumugwem otumube ibe irọ, mè isọp nlik ebek ukot inyinya kiban̄, mè itap ukan̄ iwọp uji akọn̄ kiban̄ iriọk.

¹⁰Eya itata ema me ubọk, Josuwa mè ebi Ijeren egwugwu ikom isi ama Asọru, mè ibọkọ ama ya, mè isa oge akọn̄ ikpan̄ ogwu ubọọn̄ ama ya. Mije, me adasi mgbọ, Asọru ore ama ibot me lek otutuuk ama ubọọn̄ cha.

¹¹Ebi Ijeren ekpakpan̄ otutuuk ene isan̄a kpai me ama ya, kpunu inu geege òkifuuk efuuk eyi etelebe me ògat ugwem. Ema etatap ukan̄ iwọp ama Asọru ya me lek kan̄ iriọk.

¹²Ikeya ke Josuwa mè ebi Ijeren ebọkọ otutuuk ama ebi ubọọn̄ cha, mè ikpan̄ otutuuk ebi ubọọn̄ kiban̄ isan̄a kpai, mè ijijaka ama cha igwook ike Mosis ogwu ikwaan̄ Okumugwem onyibe ida ibe erọ.

¹³Ire, ama echi òkup me inyọn̄ okpurukpu kiban̄, ebi Ijeren kpewọp, îtata Asọru gaalek ke Josuwa mè ebi kan̄ ewọp.

¹⁴Ebi Ijeren efufum ama cha irak, mè ikpulu inu mè anam ebi ama cha isak. Ebilene gaalek ke ema ekpan̄ otutuuk isan̄a kpai, kpunu inu geege òkifuuk efuuk òsisik me ògat ugwem.

¹⁵Ike Okumugwem onyibe Mosis ogwu ikwaan̄ kan̄ ida ibe erọ ke Mosis onyi si Josuwa ida ibe irọ. Ikeya si ke Josuwa orọ. Ìkasan̄a inu geege me lek otutuuk inu Okumugwem onyibe Mosis ida ibe erọ.

¹⁶Josuwa mè ebi kan̄ mîbọkọ otutuuk lek ijọn̄ ya, bene me agan̄ inyọn̄ ogoon̄, mè otutuuk èwê agan̄ osiki, mè otutuuk ijọn̄ Gosen, mè inyọn̄ orioon̄ isi ogoon̄ agan̄ ichep-ura, isi ire iteke ijọn̄ Araba, mè ogoon̄ lek ijọn̄ Ijeren melek otutuuk orioon̄ isi ogoon̄ agan̄ ya,

¹⁷bene me lek ogoon̄ Alak òkinyana ifo Seya,[5] si re Baali-Gadi òkup me iteke ijọn̄ Lebanọn me ebon ogoon̄ Emọn. Ema etetet otutuuk ebi ubọọn̄ lek ijọn̄ ya, mè ikpan̄ isan̄a kpai.

¹⁸Josuwa mè ebi kan̄ mîtim akọn̄ me lek ebi ubọọn̄ chi ijọn̄ọ mgbọ.

¹⁹Kpunu ama geege ògọgọọk ebi Ijeren irọ esuuk, îtata ebi Ifi ebi ìluk me Gibiọn gaalek. Ebi Ijeren esasa akọn̄ ibọkọ otutuuk ama kechilọ cha isan̄a kpai.

²⁰Mije, îre Okumugwem me lek kan̄ orọ inyi ejit ife cha inye, inyi ema ekat chieen̄ enu akọn̄ me lek ebi Ijeren, inyi ọmọ isa me ikeya ijijaka ema isan̄a. Ìkaweek ikakaan̄ ema nsan me lek, ìweek ibe ejijaka ema kubọk ọmọ otọbe inyi Mosis ibe erọ.

²¹Me ike mgbọ ya, Josuwa mè ebi kan̄ esisi itim akọn̄ me lek ebi Anak, ebi ujọn̄ọ ile cha ìluk me inyọn̄ ogoon̄, mè ikpan̄ ema isan̄a kpai bene me ama Eburọn ire Debiri, isi ire Anabu, mè otutuuk ijọn̄ ogoon̄ ogoon̄ ebi Juda, isi igwook me otutuuk ijọn̄ ogoon̄ ogoon̄ ebi Ijeren. Josuwa mè ebi kan̄ ekpakpan̄ ema isan̄a, mè ijijaka ama kiban̄.

²²Kpunu ogwu Anak, ebi ujọn̄ọ ile cha, geege òsisik me lek ijọn̄ ebi Ijeren. Îtata me Gaja mè Gat mè Asidọdu gaalek ke ene inen mè inen kiban̄ ìsisik eluk.

²³Sa me ikeya ke Josuwa mè ebi Ijeren ebọkọ otutuuk inyọn̄ ijọn̄ cha, ike Okumugwem otumube inyi Mosis ibe erọ. Josuwa onenidọmọ ijọn̄ ya iche inyi ebi Ijeren me otoko me otoko me ìrot. Inyọn̄ ijọn̄ ya onenisiki efuuk me lek akọn̄.