Read obolo Jos 12 Bible Online

Jos 12 - obolo bible

Jos 12

¹Ebibi ere ebi ubọọn̄ ebi lek ijọn̄ cha ebi ebi Ijeren etimbe ikpan̄, mè ibọkọ ijọn̄ kiban̄ isak me usaba okwaan̄ Jodan agan̄ mbum-ura, bene me lek iteke ijọn̄ okwaan̄ Anọn re lek ogoon̄ Emọn, mè otutuuk iteke ijọn̄ Araba me agan̄ mbum-ura:

²Ene ge me lek ebi ubọọn̄ cha ìre Siyon ogwu ubọọn̄ ebi Amọ ogwu òluk me Esibon. Ọmọ okikpulu ìkike iba Giliadi, bene me Aroweri, eyi òkup me otu iteke ijọn̄ okwaan̄ Anọn, mè bene me okwaan̄ keya si re okwaan̄ Jabọk, eyi òkup me otubọk okike ijọn̄ ebi Amọn,

³mè agan̄ mbum-ura iteke ijọn̄ Araba, bene me lek okwaan̄ oyô Kineret[6] isi ire okwaan̄ Araba, òrere okwaan̄ Uchi, me agan̄ ekije ifo Bet Jesimot, mè isi ire ebon ogoon̄ Pisiga me agan̄ osiki.

⁴Mosis mè ebi Ijeren mîtim ikpan̄ si Ôgu ogwu ubọọn̄ Basan, ene ge me etete ebi ìsisik me lek ebi ujọn̄ọ ile cha ebi ekigwen ebi Refa. Ôgu ìluk me Asitarot mè Ederei.

⁵Ôgu okikpulu lek ogoon̄ Emọn, mè ikikpulu Saleka, mè otutuuk agan̄ Basan isi igwook me otubọk okike ijọn̄ ebi Gesuru mè ebi Maaka, mè ìkike iba Giliadi, ire okike ijọn̄ kè Siyon, ogwu ubọọn̄ Esibon.

⁶Ebi ubọọn̄ iba kechi ke Mosis mè ebi Ijeren etim ikpan̄. Mosis, ogwu ikwaan̄ Okumugwem odọdọmọ ijọn̄ ife chi isa inyi ebi otoko kè Ruben, mè ebi otoko kè Gadi, mè ìkike iba ebi otoko kè Manasi.

⁷Ebibi ere ebi ubọọn̄ ebi lek ijọn̄ cha ebi Josuwa mè ebi Ijeren etimbe ikpan̄ me isi okwaan̄ Jodan agan̄ ichep-ura, bene me Baali-Gadi me iteke ijọn̄ ogoon̄ Lebanọn isi igwook me ogoon̄ Alak me ikekinene ifo ogoon̄ Seya. Ijọn̄ kechi ke Josuwa odọmọ inyi ebi Ijeren me otoko me otoko me ìrot.

⁸Ijọn̄ cha Josuwa odọmọbe ìkup me ijọn̄ ogoon̄ ogoon̄, mè inyọn̄ orioon̄ isi ogoon̄ agan̄ ichep-ura, mè iteke ijọn̄ Araba, mè emen èwê, mè èwê agan̄ osiki. Ijọn̄ cha ìre ijọn̄ ebi Et, mè ebi Amọ, mè ebi Kenan, mè ebi Pereji, mè ebi Ifi, mè ebi Jebus.

⁹Ebi ubọọn̄ ebi Josuwa mè ebi Ijeren etimbe ikpan̄ cha ìre: ubọọn̄ Jeriko, ge; ubọọn̄ Ai eyi òkup me agba lek Beten, ge;

¹⁰ubọọn̄ Jeruselem, ge; ubọọn̄ Eburọn, ge;

¹¹ubọọn̄ Jarimut, ge; ubọọn̄ Lakis, ge;

¹²ubọọn̄ Egulọn, ge; ubọọn̄ Gejeri, ge;

¹³ubọọn̄ Debiri, ge; ubọọn̄ Gederi, ge;

¹⁴ubọọn̄ Oruma, ge; ubọọn̄ Aradi, ge;

¹⁵ubọọn̄ Libina, ge; ubọọn̄ Adulam, ge;

¹⁶ubọọn̄ Makeda, ge; ubọọn̄ Beten, ge;

¹⁷ubọọn̄ Tapuwa, ge; ubọọn̄ Eferi, ge;

¹⁸ubọọn̄ Afek, ge; ubọọn̄ Lasaron, ge;

¹⁹ubọọn̄ Madọn, ge; ubọọn̄ Asọru, ge;

²⁰ubọọn̄ Simiron Merọn, ge; ubọọn̄ Akisafu, ge;

²¹ubọọn̄ Tayanak, ge; ubọọn̄ Megido, ge;

²²ubọọn̄ Kedes, ge; ubọọn̄ Jokineyam òkup me Kamen, ge;

²³ubọọn̄ Doru me inyọn̄ ogoon̄ Doru, ge; ubọọn̄ Goyim òkup me Giligan, ge;

²⁴ubọọn̄ Tija, ge. Otutuuk ebi ubọọn̄ cha ìre akọp ita mè ge.