Read obolo Jos 15 Bible Online

Jos 15 - obolo bible

Jos 15

¹Mgbọ eroon̄be nriroon̄ isa iche ijọn̄ inyi ebi otoko kè Juda, okike ijọn̄ enyibe ema me owot iman me owot iman ìkup me agan̄ osiki osiki ijọn̄ ya, isi igwook me otubọk ijọn̄ ebi Edọm me emen èwê Jin.

²Me agan̄ osiki ya, ijọn̄ ya ìbene me agba okwaan̄ Uchi, me lek ọfọ ijọn̄ òkikpọ agan̄ osiki,

³mè inyana ifo osiki utibi ogoon̄ Akarabim,[7] mè iraka isi ire èwê Sin, mè inene isi igwook me agan̄ osiki ama Kades Bania, isi ire ama Ejirọn, mè ije ire ama Adari, mè igwu ikana isi ire ama Karaka.

⁴Okike ijọn̄ ya si îraka me isi ama Asimon, mè isi ire oka okolo Ijipiti, mè isi ita me lek okwaan̄ ile Mediterenia. Eyi ore okike ijọn̄ kiban̄ me agan̄ osiki.

⁵Okike eyi agan̄ mbum-ura ìbene me lek okwaan̄ Uchi isi igwook me lek otu okwaan̄ Jodan. Okike eyi agan̄ inyọn̄ onenibene me lek ọfọ ijọn̄ me agan̄ okwaan̄ ile Mediterenia isi ire otu okwaan̄ Jodan,

⁶mè inene isi ire Bet Ogula, mè iraka Bet Araba me agan̄ inyọn̄, mè inyana isi ire lek Ewuuk kè Boyan gwun̄ kè Ruben.

⁷Okike ijọn̄ ya si îre ama Debiri, bene me lek iteke Akọ, mè inifan̄a ikana ifo agan̄ inyọn̄ isi ire Giligan, eyi òkup me isi oniin̄ utibi ogoon̄ ama Adumim me agan̄ osiki me lek iteke ya. Îje isi ire lek mun̄ En Semes mè isi isibi me En Rogen,

⁸mè inilibi inene ifo iteke Ben Inọm iraka me agan̄ osiki ama ebi Jebus, òrere Jeruselem. Okike ijọn̄ ya îsaba inene inyọn̄ ibot ogoon̄ òkup me agan̄ ichep-ura me lek iteke Inọm, eyi òkup me ata ibot iteke Refayim me agan̄ inyọn̄.

⁹Me inyọn̄ ibot ogoon̄ ya ke okike ijọn̄ ya ofiaka ikana isi lek ogbuuruk mun̄ Nefitowa, mè inyana ire lek ama echi òkup me lek ogoon̄ Efurọn, mè ije ikana ire ama Bayala eyi òrere Kiriat Jiarim.

¹⁰Me Bayala ke okike ijọn̄ ya okana inyi agan̄ ichep-ura isi ire lek ogoon̄ Seya, mè iraka ifo agba ogoon̄ Jiarim me agan̄ inyọn̄, eyi òre Kesalọn, mè inikwala isibi ifo ama Bet Semes, mè iraka ifo ama Timina.

¹¹Okike ijọn̄ ya onenire ama Ekurọn me agan̄ inyọn̄, mè ifiaka ikana ifo ama Sikoron, mè iraka ogoon̄ Bayala isi igwook me ama Jabinen, mè isi ita me lek okwaan̄ ile Mediterenia.

¹²Agba okwaan̄ ile ya ore okike ijọn̄ ya me agan̄ ichep-ura. Eyi ore okike ijọn̄ ebi otoko kè Juda me owot iman me owot iman.

¹³Me lek ijọn̄ ebi Juda, Josuwa îsa ijọn̄ ama Kiriat Ariba, eyi òrere Eburọn, inyi Kelep gwun̄ kè Jefune, ike Okumugwem otumube ibe erọ. Ariba ore nte kè Anak.

¹⁴Kelep onenilap ebi owot iman kè Sesai, mè Ayiman, mè Talimai, ìrere ibot bọn ita kè Anak isan̄a me lek ijọn̄ Eburọn, mè iraka lek ijọn̄ ya iluk.

¹⁵Kelep onenijibi akọn̄ inan̄a me Eburọn isi lek ebi ama Debiri, eyi ekigwen Kiriat Seferi me adasi mgbọ.

¹⁶Mgbọ ya, Kelep onenitumu ibe, “Ogwu ikọt isi akọn̄ me Kiriat Seferi mè ibọkọ ama ya, mâsa Akisa, gwun̄ n̄a enenwaan̄, inyi ene ya me lek nwa.”

¹⁷Otinien gwun̄ kè Kenaji, ngwan̄ kè Kelep, osisi akọn̄ me Kiriat Sefa, mè ibọkọ ama ya. Kelep osasa Akisa, gwun̄ kan̄ enenwaan̄ inyi Otinien me lek nwa.

¹⁸Usen ge, Akisa onunu me lek ogwu olom, mè inisisaak ibe mè ogwugwu ibeek nte kan̄ ijọn̄ uko. Mgbọ Akisa onan̄abe me inyọn̄ inyinya akpan kan̄ isibi ijọn̄, Kelep ododo ọmọ ibe, “Ìre keke ke oweek?”

¹⁹Akisa ofọfọọk ibe, “Che uche ugbana nyi emi. Eyi onyibe emi ijọn̄ me emen èwê agan̄ osiki, nyi emi ibot mun̄ gbaalek.” Ikeya ke Kelep oninyi ọmọ ibot mun̄ echi agan̄ inyọn̄ mè echi agan̄ osiki.

²⁰Eyiyi ore ìrot ebi otoko kè Juda me owot iman me owot iman:

²¹Ama ebi otoko kè Juda echi òkup me okputut agan̄ osiki me otubọk ijọn̄ ebi Edọm me emen èwê agan̄ osiki ìre Kabijen, mè Ederi, mè Yaguru,

²²mè Kina, mè Dimona, mè Adada,

²³mè Kedes, mè Asọru, mè Yitinan,

²⁴mè Jifu, mè Telem, mè Beyalot,

²⁵mè Asọru Adata, mè Keriyot Ejirọn eyi òrere Asọru,

²⁶mè Amam, mè Sema, mè Molada,

²⁷mè Asari Gada, mè Esimọn, mè Bet Pelet,

²⁸mè Asari Suwali, mè Bieseba, mè Bijiyotiya,

²⁹mè Bayala, mè Iyim, mè Esem,

³⁰mè Elitoladi, mè Kesili, mè Oruma,

³¹mè Sikilagi, mè Madimana, mè Sanisana,

³²mè Lebayot, mè Silikim, mè Ayin, mè Rimọn. Otutuuk ama kechi ìre akọp ama ile iba mè onaan̄ge melek asabọn ama kiban̄.

³³Ama kiban̄ me inyọn̄ orioon̄ isi ogoon̄ agan̄ ichep-ura ìre Esitayon, mè Sora, mè Asina,

³⁴mè Janowa, mè En Ganim, mè Tapuwa, mè Enam,

³⁵mè Jarimut, mè Adulam, mè Soko, mè Ajeka,

³⁶mè Seyarayim, mè Aditayim mè Gedera, mè Gederotayim. Otutuuk kechi orere akọp mè ama ile ini melek asabọn ama kiban̄.

³⁷Usini ama kiban̄ si ìre Senan, mè Adasia, mè Migidan Gadi,

³⁸mè Diliyan, mè Mijipa, mè Yọkiteli,

³⁹mè Lakis, mè Bojikat, mè Egulọn,

⁴⁰mè Kabon, mè Layimas, mè Kitilis,

⁴¹mè Gederot, mè Bet Dagọn, mè Nayama, mè Makeda. Otutuuk kechi orere akọp mè ama ile gweregwen melek asabọn ama kiban̄.

⁴²Ofifi ama kiban̄ si ìre Libina, mè Eteri, mè Asan,

⁴³mè Jifita, mè Asina, mè Nesip,

⁴⁴mè Keyila, mè Akijip, mè Maresa. Otutuuk kechi orere ama ile onaan̄ge melek asabọn ama kiban̄.

⁴⁵Ofifi ama kiban̄ si ìre Ekurọn mè ama ile kan̄ mè asabọn ama kan̄;

⁴⁶bene me Ekurọn re lek okwaan̄ ile Mediterenia, otutuuk ama ile òkup iriaak Asidọdu, melek asabọn ama kiban̄,

⁴⁷mè Asidọdu mè ama ile kan̄ mè asabọn ama kan̄, mè Gaja mè ama ile kan̄ mè asabọn ama kan̄ isi ire lek oka okolo Ijipiti, melek okwaan̄ ile Mediterenia mè agba ijọn̄ kan̄.

⁴⁸Ama kiban̄ me agan̄ inyọn̄ ogoon̄ ìre Samiri, mè Jatiri, mè Soko,

⁴⁹mè Dana, mè Kiriat Sana eyi òrere Debiri,

⁵⁰mè Anabu, mè Esitemo, mè Anim,

⁵¹mè Gosen, mè Olon, mè Gilo. Otutuuk kechi orere akọp mè ama ile ge melek asabọn ama kiban̄.

⁵²Usini me lek ama kiban̄ si ìre Arabu, mè Duma, mè Esiyan,

⁵³mè Yanim, mè Bet Tapuwa, mè Afeka,

⁵⁴mè Umita, mè Kiriat Ariba òrere Eburọn, mè Siyoru. Otutuuk kechi orere ama ile onaan̄ge melek asabọn ama kiban̄.

⁵⁵Ofifi ama kiban̄ si ìre Mayon, mè Kamen, mè Jifu, mè Juta,

⁵⁶mè Jesereli, mè Jokideyam, mè Janowa,

⁵⁷mè Keyin, mè Gibiya, mè Timina. Otutuuk kechi orere akọp ama ile melek asabọn ama kiban̄.

⁵⁸Ofifi ama kiban̄ si ìre Alikulu, mè Bet Suru, mè Gedoru,

⁵⁹mè Marat, mè Bet Anot, mè Elitekon. Otutuuk kechi orere ama ile gweregwen melek asabọn ama kiban̄.

⁶⁰Ofifi ama kiban̄ si ìre Kiriat Baali, eyi òrere Kiriat Jiarim, mè Raba. Otutuuk kechi orere ama ile iba melek asabọn ama kiban̄.

⁶¹Ama kiban̄ me emen èwê ìre Bet Araba, mè Midin, mè Sekaka,

⁶²mè Nibisan, mè Ama Uchi, mè Engedi. Otutuuk kechi orere ama ile gweregwen melek asabọn ama kiban̄.

⁶³Ire, ebi otoko kè Juda kpekọt ilap ebi Jebus ebi ìluk me Jeruselem isibi. Eya orọ, ebi Jebus egọgọọk ebi Juda igbaan̄ iluk me Jeruselem mege ire chereyi.