Read obolo Jos 16 Bible Online

Jos 16 - obolo bible

Jos 16

¹Eneniroon̄ nriroon̄ isa iche ijọn̄ inyi bọn kè Josefu. Okike ijọn̄ enyibe ema ìbene me agba okwaan̄ Jodan me agan̄ Jeriko isi ire lek okolo Jeriko me agan̄ mbum-ura, mè ichak isi igwook me emen èwê, eyi òbene me Jeriko ije itibi ijọn̄ ogoon̄ ogoon̄ ifo ama Beten,

²mè ininan̄a me Beten isi ire Luju, mè itibi iraka ire okike ijọn̄ ebi Arak òkup me Atarot,

³mè inigele isiki ifo agan̄ ichep-ura isi ire okike ijọn̄ ebi Jafilet, mege isi igwook me okike ijọn̄ Bet Oron eyi agan̄ osiki, mè isi ire Gejeri, mè isi ita me lek okwaan̄ ile Mediterenia.

⁴Ikeya ke ebi owot iman kè Iferem mè ebi owot iman kè Manasi bọn kè Josefu ebọkọ ìrot eyi kiban̄.

⁵Okike ijọn̄ enyibe ebi otoko kè Iferem me owot iman me owot iman me ìrot ìbene me Atarot Ada me agan̄ mbum-ura isi ire Bet Oron eyi agan̄ inyọn̄,

⁶mè ije isi ire lek okwaan̄ ile Mediterenia me agan̄ inyọn̄ me lek ama Mikimetat, mè isa ikeya ije ikana inyi agan̄ mbum-ura ifo ama Tanat Silo, mè ije iraka ama keya me agan̄ mbum-ura ifo ama Janowa.

⁷Ineninan̄a me Janowa ikwala isibi isi ire Atarot mè Nayara, mè isi ichak me Jeriko, mè inisibi me lek okwaan̄ Jodan.

⁸Okike ijọn̄ ya si înan̄a me Tapuwa ije inin̄ agan̄ ichep-ura isi ire lek ngigo ijọn̄ Kana, mè isi ita me lek okwaan̄ ile Mediterenia. Eyi ore ìrot ebi otoko kè Iferem me owot iman me owot iman.

⁹Owuwa ama ile mè echi ijija esun̄be ọkpọkpọ inyi bọn kè Iferem ọmọ òwa si me etete ijọn̄ enyibe bọn kè Manasi me ìrot.

¹⁰Ire, ebi otoko kè Iferem kpelap ebi Kenan ebi ìluk me Gejeri isan̄a. Ebi Kenan cha egọgọọk ebi Iferem igbaan̄ iluk mege ire chereyi, mè ikana ebi usun̄ ìkisi ikwaan̄ òbọp inyi ema.