Read obolo Jos 17 Bible Online

Jos 17 - obolo bible

Jos 17

¹Mîroon̄ si nriroon̄ isa inyi ebi otoko kè Manasi uche ijọn̄ eyi kiban̄, mije Manasi ore adasi gwun̄ kè Josefu. Ogwu enyibe ìrot ya ìre Makiri, adasi gwun̄ kè Manasi. Ọmọ ore nte ebi Giliadi. Bak me lek ọmọ orebe unye ene me akọn̄ ke esa ama Giliadi mè Basan inyi ọmọ.

²Mînyi bọn kè Manasi kebilọ si uche ijọn̄ eyi kiban̄ me owot iman me owot iman. Mînyi bọn kè Abieja, mè bọn kè Elek, mè bọn kè Asirien, mè bọn kè Sekem, mè bọn kè Eferi, mè bọn kè Semida. Ebibi ere bọn ebirieen̄ kè Manasi gwun̄ kè Josefu me owot iman me owot iman.

³Ire, Jelofeyadi gwun̄ kè Eferi, gwun̄ kè Giliadi, gwun̄ kè Makiri, gwun̄ kè Manasi, ìkakaan̄ gwun̄ enerieen̄ geege, ìkaan̄ bọn ebibaan̄ gaalek. Erieen̄ bọn ebibaan̄ kan̄ cha ìre Mala, mè Nuwa, mè Ogula, mè Milika, mè Tirija.

⁴Ema enenisi lek kè Elieja ogwu ngwugwa, mè Josuwa gwun̄ kè Nun, mè ebi ibot, isi itumu inyi ibe ke Okumugwem înyi Mosis ida ibe inyi ema ìrot me etete ebi ngwan̄ kiban̄. Mije keya, Josuwa onyinyi ema ìrot me etete ebi ngwan̄ nte kiban̄ kubọk Okumugwem onyibe ida.

⁵Akọp okike ijọn̄ ore lek kè Manasi me usaba okwaan̄ Jodan agan̄ mbum-ura, kpefuk ijọn̄ Giliadi melek Basan òkup me usaba Jodan agan̄ ichep-ura igbaalek,

⁶mije, bọn ebibaan̄ kè Manasi mîgọọk ibọkọ ìrot melek bọn kan̄ ebirieen̄. Ijọn̄ Giliadi ìkup inyi bọn ebirieen̄ kè Manasi ebi ìsisik.

⁷Okike ijọn̄ ebi owot iman kè Manasi ìbene me Ase ire Mikimetat, eyi òkup me agan̄ mbum-ura me lek Sekem. Ijọn̄ ya onenije inyi agan̄ osiki mè igọbọ ebi ìluk me En Tapuwa itap.

⁸Ebi owot iman kè Manasi ekaan̄ otubọk ijọn̄ agan̄ Tapuwa. Ire, achubọk ama Tapuwa ya me lek kan̄, eyi òkup me okike otubọk ijọn̄ ebi owot iman kè Manasi ya, îre ebi otoko kè Iferem ekaan̄.

⁹Okike ijọn̄ ya ìkana igwook me lek ngigo ijọn̄ Kana me agan̄ osiki. Ama echi ebi Iferem melek ama echi ebi Manasi me ere ya egbaan̄be ikup. Ire, okike ijọn̄ ebi Manasi ìkup me agan̄ inyọn̄ me lek ngigo ijọn̄ ya, mè isi ita me lek okwaan̄ ile Mediterenia.

¹⁰Okike ijọn̄ ebi Iferem ìkup inyi agan̄ osiki, sà eyi ebi Manasi òkup inyi agan̄ inyọn̄. Okike ijọn̄ ebi Manasi ìta me lek okwaan̄ ile Mediterenia, mè inigọbọ me lek otubọk ijọn̄ ebi Ase me agan̄ inyọn̄, mè igọbọ si otubọk ijọn̄ ebi Isaka me agan̄ mbum-ura.

¹¹Me etete ijọn̄ ebi otoko kè Isaka, mè lek ijọn̄ ebi otoko kè Ase, ebi owot iman kè Manasi mîkaan̄ ama Bet San melek asabọn ama kan̄, mè Ibelam mè asabọn ama kan̄, mè ebi ama Doru mè asabọn ama kan̄, mè ama Endọ mè asabọn ama kan̄, mè ama Tayanak mè asabọn ama kan̄, melek ama Megido mè asabọn ama kan̄, òrere òso ere ubene ubene ita.[8]

¹²Ire, ebi otoko kè Manasi kpekọt ilap ebi Kenan ìluk me ama cha isan̄a. Ebi Kenan cha echechieek mkpa iluk me inyọn̄ ijọn̄ ya.

¹³Ire, mgbọ ebi Ijeren eyakabe ininye lek, ema esasa ebi Kenan cha irọ ebi usun̄ ìkisi ikwaan̄ òbọp inyi ema. Ire, kpelap ema isan̄a me inyọn̄ ijọn̄ ya.

¹⁴Usen ge bọn kè Josefu enenitumu inyi Josuwa ibe, “Ìre keke orọ onyibe eji irek ìrot ge gaalek, mè isa me ikeya inyi eji uche ijọn̄ ge kpọi? Eji mîwa enenen, Okumugwem îgbana si eji ijaan̄ lek.”

¹⁵Josuwa ofọfọọk ema ibe, “Ire inyọn̄ ijọn̄ ogoon̄ ogoon̄ ebi otoko kè Iferem ìkata enyi lek bak me lek enyi mîwa, ìsi me lek oron, me lek ijọn̄ ebi Pereji mè ijọn̄ ebi Refa, ìsi ìgbọ ijọn̄ ìnyi lek kinyi.”

¹⁶Ire, bọn kè Josefu efọfọọk ibe, “Agan̄ ijọn̄ ogoon̄ ogoon̄ ya ìkpota eji lek. Ofifi si, otutuuk ebi Kenan ìluk me lek iteke ijọn̄ ya, ebi Bet San mè ebi asabọn ama kan̄, melek ebi ìluk me lek iteke ijọn̄ Jesereli mîkaan̄ uji akọn̄ okwukwut.”

¹⁷Josuwa onenitumu inyi ebi otoko kè Josefu ìrere ebi owot iman kè Iferem mè Manasi ibe, “Iin̄, enyi mîwa enenen mè ikaan̄ ikpele unye. Enyi kpebekaan̄ ijọn̄ ge gaalek me ìrot,

¹⁸mije, ijọn̄ lek oron òkup me inyọn̄ ijọn̄ ogoon̄ ogoon̄ ya môre si eyi kinyi. Ìgbọ oron cha ìgwook, mè ìkaan̄ ijọn̄ ìsi ìre okputut kan̄. Ire, enyi mêlap ebi Kenan isan̄a ubọk geelek ibe ke ema mîkaan̄ uji akọn̄ okwukwut, mè inye lek.”