Read obolo Jos 18 Bible Online

Jos 18 - obolo bible

Jos 18

¹Otutuuk urum ebi Ijeren enenigbaan̄ ititiin̄ me Silo, mè inigwuun̄ Atanga Chinichini me ere ya. Me ike mgbọ ya otutuuk lek ijọn̄ ya îkana inin̄ me ubọk kiban̄.

²Ire, ìyaka inisik otoko jaaba me lek ebi Ijeren ebi kpebọkọ-nu ìrot ijọn̄ eyi kiban̄.

³Josuwa onenitumu inyi ebi Ijeren ibe, “Ìre enyi ebekup ire mgbọ owa ni sabum enyi ènebọkọ ijọn̄ eyi Okumugwem Awaji ebi nte nte kinyi onyibe enyi?

⁴Ìgobo ene ita ita me otoko me otoko me etete kinyi, mè ǹria ema ǹsibi, mè esi eje ekana ekpọ ijọn̄ yi, mè ege ike îkupbe ekpọ me lek ubọk mêsabe iche ijọn̄ cha me ìrot, mè eka enekpa enyi emi.

⁵Ema mêdọmọ ijọn̄ ya irek jaaba. Ebi otoko kè Juda mêbia me okike ijọn̄ kiban̄ me agan̄ osiki, ebi otoko kè Josefu si mêbia me okike eyi kiban̄ me agan̄ inyọn̄.

⁶Enyi mêtọ ijọn̄ ya irek jaaba, mè ige ubọk enyi etọbe, mè isa ijet emi. Enyi isisa inu, emi mâneniroon̄ nriroon̄ inyi enyi me ere keyi me isi Okumugwem Awaji kiji.

⁷Ebi otoko kè Libai kpebekaan̄ uche ijọn̄ geege me etete kinyi, mije, ikwaan̄ igwagwa ngwugwa inyi Okumugwem ore ìrot eyi kiban̄. Ebi otoko kè Gadi, mè ebi otoko kè Ruben, mè ìkike iba me lek owot iman kè Manasi mîwuuk lek ibọkọ uche ijọn̄ eyi kiban̄ me usaba okwaan̄ Jodan agan̄ mbum-ura, eyi Mosis ogwu ikwaan̄ Okumugwem onyibe ema.”

⁸Mgbọ ebi ìbesi itọ ijọn̄ cha ebenije, Josuwa obebe ema, “Ìje ìkana otutuuk lek ijọn̄ ya, ìtọ mè ìge ike îkupbe, mè ìka ìnikpa ìnyi emi, inyi mâroon̄ nriroon̄ me ere keyi me Silo me isi Okumugwem.”

⁹Ebi ife cha enanan̄a ije isi ikana otutuuk lek ijọn̄ ya, mè ige ubọk ijọn̄ ya okupbe itap me ikpa. Ema ege me ama me ama isibi irek jaaba, mè igwu ikom ika inu me lek kè Josuwa me ere m̀gba-ǹgwele ukan̄ kiban̄ me Silo.

¹⁰Mgbọ ema ekabe inu, Josuwa oneniroon̄ nriroon̄ me Silo ya me isi Okumugwem inyi ebi Ijeren, mè inisa me lek nriroon̄ ya idọmọ ijọn̄ ya inyi ebi Ijeren igọọk me otoko kiban̄.

¹¹Nriroon̄ onenirọn̄ inyi ebi otoko kè Benjamin me owot iman me owot iman. Okike ijọn̄ òrere ema lek ìkup me etete ijọn̄ ebi otoko kè Juda melek eyi ebi otoko kè Josefu.

¹²Okike ijọn̄ kiban̄ me agan̄ inyọn̄ ìbene me lek okwaan̄ Jodan, mè inene itoon̄ me lek otubọk ijọn̄ ama Jeriko me agan̄ inyọn̄, mè inene lek ogoon̄ iraka inin̄ agan̄ ichep-ura, mè inita me lek èwê Bet Afen.

¹³Me ere ya ke okike ijọn̄ ya onisaba ifo ama Luju (òrere Beten) me agan̄ osiki, mè ikwala isibi ifo Atarot Ada me inyọn̄ ogoon̄ òkup me isi agan̄ osiki me lek ama Bet Oron eyi Osiki.

¹⁴Bene me ere ya, okike ijọn̄ ya onenikana inyi agan̄ ichep-ura me ntut agan̄ osiki, mè inita me Kiriat Baali (òrere Kiriat Jiarim), ama ebi otoko kè Juda. Eyi ore okike ijọn̄ agan̄ ichep-ura.

¹⁵Okike ijọn̄ agan̄ osiki ìbene me agba lek ama Kiriat Jiarim, mè inyana ifo agan̄ ichep-ura, mè isi isibi me lek ogbuuruk ibot mun̄ Nefitowa.

¹⁶Okike ijọn̄ ya onenikwala isiki isi isibi me ebon ogoon̄ òkikpọ iteke Ben Inọm, eyi òkup me agan̄ inyọn̄ me lek iteke Refa, mè isa ikeya igele igwook me iteke Inọm ifo otubọk ijọn̄ ebi Jebus me agan̄ osiki, mè ikwala iraka isi ire En Rogen.

¹⁷Ere keya ke îfan̄a inyi agan̄ inyọn̄, mè isi isibi me En Semes, mè isi igwook me Gelilot eyi òkikpọ oniin̄ utibi ogoon̄ ama Adumim, mè ilibi isiki ifo lek Ewuuk kè Boyan gwun̄ kè Ruben.

¹⁸Inenije me lek osiki ijọn̄ me agan̄ inyọn̄ iteke ijọn̄ Araba, mè igele igwook me iteke ijọn̄ Araba ya.

¹⁹Okike ijọn̄ ya si ojeje isi ire lek osiki ijọn̄ agan̄ òkisi Bet Ogula, mè isi ita me lek ọfọ ijọn̄ agan̄ inyọn̄ okwaan̄ Uchi, me ebon okwaan̄ Jodan me agan̄ inyọn̄. Eyi ore okike ijọn̄ ya me agan̄ osiki.

²⁰Okwaan̄ Jodan ore okike ijọn̄ ya me agan̄ mbum-ura. Echichi ore okike ijọn̄ ebi otoko kè Benjamin ebọkọbe me ìrot me owot iman me owot iman.

²¹Ama ebi otoko kè Benjamin ekaan̄be me owot iman me owot iman ìre Jeriko, mè Bet Ogula, mè Emek Kesis,

²²mè Bet Araba, mè Semarayim, mè Beten,

²³mè Afim, mè Para, mè Ofera,

²⁴mè Kefa Amoni, mè Ofini, mè Geba. Otutuuk kechi orere akọp mè ama ile iba, melek asabọn ama kiban̄.

²⁵Ofifi ìre Gibiọn, mè Rama, mè Bierot,

²⁶mè Mijipa, mè Kefira, mè Mosa,

²⁷mè Rekem, mè Yiripeli, mè Tarala,

²⁸mè Sela, mè Ayelep, mè ama ebi Jebus (òrere Jeruselem), mè Gibiya, melek Kiriat Jiarim. Otutuuk kechi orere akọp mè ama ile ini melek asabọn ama kiban̄. Eyiyi ore ìrot ebi otoko kè Benjamin me owot iman me owot iman.