Read obolo Jos 20 Bible Online

Jos 20 - obolo bible

Jos 20

¹Okumugwem onenitumu inyi Josuwa ibe:

²“Tumu nyi ebi Ijeren ibe esan̄a ama itap-ibot esun̄ kubọk ntumube inyi Mosis ibe enyi erọ,

³ufuna ene geelek òlọlọ ubọk ikpan̄ ene, me ìkagegen ibak, môkọt ilibi isi ikup me emen ama ya. Ama ya mônenire ere itap-ibot inyi ene ya, inyi inwọnọ me ubọk ogwu òkisan̄a useen̄ eje ene.

⁴“Ene ya isilibi inire ama ge me lek ama chi, môkeke me otunchit ama ya, mè ikpa inu ọmọ orọbe inyi ebi ugane ama ya enọ. Ebi ugane cha mênenibọkọ ogwu ene isotu ya itap me ama ya kubọk ene ge me lek kiban̄, mè inyi ọmọ ere me etete kiban̄ ibe igọọk ema iluk.

⁵Ire ogwu òkisan̄a useen̄ eje ene igọọk ọmọ inire ama ya, ọmọ îkana ene isotu, ekayaka ọmọ ìnyi ibe ikpan̄. Mije, ene ya ìkpan̄ ogwu melek kan̄ ya me mfat, ìkawuwuuk lek ìre ogwu ochicha ìnyi ogwu îkpan̄be ya.

⁶Ogwu ene ya môluk me ama ya ire mgbọ ebi ijọn̄ mêsibibe oyerebet me ibot kan̄, mè iluk si mege ire mgbọ ogwu òban Awaji òkukup me mgbọ inu ya orọbe môkwube. Mgbọ ya, ogwu ene ya mônenikọt igwu ikom ifo uwu kan̄ me ama kiban̄ ere înan̄abe ilibi ekot ugwem.”

⁷Ikeya ke enigobo Kedes me agan̄ Galili me lek ijọn̄ ogoon̄ ogoon̄ ebi otoko kè Nafitali, mè Sekem me lek ijọn̄ ogoon̄ ogoon̄ ebi otoko kè Iferem, mè Kiriat Ariba (òrere Eburọn) me lek ijọn̄ ogoon̄ ogoon̄ ebi otoko kè Juda.

⁸Me usaba agan̄ okwaan̄ Jodan, isasaba me Jeriko inyi agan̄ mbum-ura, ke egobo Beseri me emen èwê òkup me lek òla ijọn̄ ebi otoko kè Ruben, mè Ramot me agan̄ Giliadi me lek ijọn̄ ebi otoko kè Gadi, mè Golan me agan̄ Basan me lek ijọn̄ ebi otoko kè Manasi.

⁹Ama kechi ke esan̄a isun̄ inyi ebi Ijeren melek ebi ichen ìluk me etete kiban̄, inyi ene geelek òkpan̄ ene me mfat môlibibe isi ilet, ufuna ọmọ ikakwu me ubọk ogwu òkisan̄a useen̄ eje ene, mege ire mgbọ ebi ijọn̄ mêsibibe oyerebet me ibot kan̄.