Read obolo Jos 22 Bible Online

Jos 22 - obolo bible

Jos 22

¹Usen ge, Josuwa onenigwen ebi otoko kè Ruben, mè ebi otoko kè Gadi, mè ìkike iba otoko kè Manasi,

²mè itumu inyi ema ibe, “Enyi mîrọ otutuuk inu geelek Mosis ogwu ikwaan̄ Okumugwem onyibe ida ibe enyi erọ. Enyi mîgban̄ si ida n̄a me inu geelek emi nnyibe ida ibe enyi erọ.

³Enyi kpelibi itele ebi ngwan̄ kinyi owuwa usen kechi, mege inire chereyi. Ire, enyi mîkeke inye irọ otutuuk inu Okumugwem Awaji kiji onyibe ida ibe enyi erọ.

⁴Mgbọ keyi, Okumugwem Awaji kiji îra inyi ebi ngwan̄ kinyi utelelek ike îchieekbe ema use. Eya orọ, mgbọ keyi, ìgwu ìkom ìfon uwu ọfọ kinyi me lek ijọn̄ kinyi eyi Mosis ogwu ikwaan̄ Okumugwem onyibe enyi me usaba okwaan̄ Jodan.

⁵Gaalek, ìgbala chieen̄ enenen ìkirọ inu Mosis ogwu ikwaan̄ Okumugwem onyibe enyi ida ibe enyi erọ, mè ìkisun̄ ikan înyibe enyi ibe enyi ekesun̄, eyi òrere imumun̄ Okumugwem Awaji kiji me chieen̄, mè ijeje me otutuuk oniin̄ kan̄ geelek, mè irọrọ ida kan̄, mè ikekeke inye melek kan̄, mè itetet ọmọ ikaan̄ inye, mè isisi ikwaan̄ inyi ọmọ me otutuuk ejit kinyi mè otutuuk ibot ejit kinyi.”

⁶Josuwa onenigbana ema, mè iria ema ifo. Ema efofon uwu ọfọ kiban̄.

⁷Mosis ìnyi ìkike iba otoko kè Manasi ijọn̄ me agan̄ Basan. Ire, Josuwa oneninyi ìkike iba keyilọ ijọn̄ eyi kiban̄ me etete ebi ngwan̄ kiban̄ me agan̄ ichep-ura usaba okwaan̄ Jodan. Josuwa onenigbana ebi ìkike iba otoko kè Manasi ebi ìbefon cha,

⁸ibe, “Ìfon uwu ọfọ kinyi melek ogbogbo inu ubọọn̄ enyi efumbe me ubọk ebi ochicha kinyi, urum anam òwawa enenen, mè ogbogbo alata okuket, mè alata araran̄, mè ekwe, mè okwukwut, mè owuwa owuwa ofọnti. Ìche usini me lek inu m̀fum akọn̄ chi ìnyi ebi ngwan̄ kinyi.”

⁹Ikeya ke ebi otoko kè Ruben, mè ebi otoko kè Gadi, mè ìkike iba otoko kè Manasi etele ebi Ijeren me Silo me lek ijọn̄ Kenan, mè igwu ikom ika inu me agan̄ Giliadi me lek ijọn̄ eyi kiban̄, eyi enyibe ema me ìrot igọọk me ida Okumugwem onyibe Mosis.

¹⁰Mgbọ ebi otoko kè Ruben, mè ebi otoko kè Gadi, mè ìkike iba otoko kè Manasi cha ejebe inire ijọn̄ agba lek okwaan̄ Jodan me lek ijọn̄ agan̄ Kenan, ema eneninama ntook me agba okwaan̄ Jodan ya. Ntook ya îmin, mè ibene ikeke ikeya me chieen̄ ene.

¹¹Etip onenilook ebi Ijeren ibe, kpọ ke ebi otoko kè Ruben mè otoko kè Gadi, mè ìkike iba otoko kè Manasi mînama ntook me otubọk okike ijọn̄ Kenan me agba lek okwaan̄ Jodan, me agan̄ ijọn̄ ebi Ijeren.

¹²Mgbọ ebi Ijeren enọbe ikọ ya, otutuuk urum ebi Ijeren etititiin̄ me Silo ibesi akọn̄ me lek kiban̄.

¹³Ire, sabum ema ebenije akọn̄ ya, ema eraria osat isi lek ebi otoko kè Ruben, mè otoko kè Gadi, mè ìkike iba otoko kè Manasi me lek ijọn̄ Giliadi. Ebi eriabe osat ya ìre Fineyas, gwun̄ kè Elieja ogwu ngwugwa,

¹⁴mè akọp ebi ibot, ogwu ibot ge owot iman ge, me otutuuk otoko ebi Ijeren geelek. Ema ge ge ìre ebi ibot me owot iman kiban̄ igọọk me otoko ebi Ijeren me ọgbọn̄ me ọgbọn̄.

¹⁵Mgbọ ema erebe agan̄ Giliadi, ema etutumu inyi ebi otoko kè Ruben, mè otoko kè Gadi, mè ìkike iba otoko kè Manasi ibe

¹⁶ke otutuuk ntitiin̄ Okumugwem ìbe, “Sà ichim ubọk me chieen̄ keyi ye? Ìre enyi ejeje ikichim Awaji ebi Ijeren ubọk me chieen̄ ikeyi? Keke orọ enyi egwube ikom chereyi, mè itele igọgọọk Okumugwem? Sà ìre keke orọ enyi enamabe ntook eyi lek kinyi, mè isa me ikeya ikpaka ibot inyi Okumugwem?

¹⁷Ìre ijo inu ya eji erọbe me Peyọ, eyi òsasa ijo orukan̄ itap ijot etete urum ebi eyi Okumugwem ìkaso eji ni? Mege inire chereyi, eji kpenwọnwọnọ-nu mkpukpe ijo inu ya.

¹⁸Ìre enyi mênijit Okumugwem itele chereyi ni? Ire enyi inye ibot, mè ifieek inan̄a me lek Okumugwem chereyi, iyakwut, unaan̄-ejit kan̄ mônenikeme otutuuk ido ebi Ijeren.

¹⁹Me atikọ, ire mbuban ichaka me lek ijọn̄ enyi ekaan̄be me ìrot, ìsaba ìna me lek ijọn̄ ìrot eyi Okumugwem, ere Akpatan̄ Mbuban Okumugwem okupbe, mè ìnibọkọ ìrot me etete kiji. Ire, ikakpaka ibot, mè ìfieek lek ìnan̄a me lek Okumugwem. Ikafefieek si lek ìnan̄a me lek kiji, sa me inanama ofifi ntook inyi lek kinyi, ilọ me lek ntook Okumugwem Awaji kiji.

²⁰Mgbọ Ekan, gwun̄ kè Jera ojitbe ijijijaka inu oniin̄ akọn̄ cha Awaji obe efafiat, ìre unaan̄-ejit Awaji ìkakeme otutuuk ido ebi Ijeren? Eyi ọmọ gaalek orọbe ijo inu, ìre ọmọ gaalek okwu mkpa mije ijọ inu kan̄?”

²¹Ebi otoko kè Ruben, mè otoko kè Gadi, mè ìkike iba otoko kè Manasi efọfọọk ebi ibot urum ebi Ijeren cha ibe,

²²“Okumugwem ore Awaji otutuuk awaji geelek! Okumugwem ore Awaji otutuuk awaji geelek! Îre ọmọ oriọọn̄. Otutuuk ebi Ijeren, ìriọọn̄! Ire ke îre me mkpaka-ibot mè ifefieek lek isan̄a me lek Okumugwem, mè ìyaka ire ke eji echichim Okumugwem ubọk me chieen̄, enyi, ikatele eji me ògat ugwem cherekeyi!

²³Ire eji inama ntook eyi kiji ibe ke eji ebejit Okumugwem itele, inyi eji ekegwa ngwugwa ewọwọp iriọk mè ngwugwa akpa mè ìyaka ire ngwugwa esuuk me inyọn̄ kan̄, kè Okumugwem me lek kan̄ ifuk eyi itoon̄ eji me ibot.

²⁴“Me atikọ, eji erọ inu yi mije ukpook ibe ke mgbọ ònu me isi, ke bọn kinyi mêtumu inyi bọn kiji ibe, ‘Ìre keke ke enyi ekaan̄ melek Okumugwem, Awaji ebi Ijeren?

²⁵Okumugwem îsa okwaan̄ Jodan itap okike inyi enyi ebi otoko kè Ruben mè ebi otoko kè Gadi melek kiji. Enyi kpekaan̄ uche geege me lek Okumugwem.’ Sa me ikeyi, nsabọn kinyi mêrọrọ ibe nsabọn kiji ekayaka ìkitọbọ ebum ìnyi Okumugwem.

²⁶“Eya orọ eji enibe eji ebem lek, mè enama ntook enyi lek kiji. Ìkakup ìnyi ngwugwa ewọwọp iriọk, ìkakukup ìnyi ngwugwa geege.

²⁷Ire, ìbore inu ata-ikọ inyi enyi melek kiji, mè bọn bọn kiji ebi mênube me udun̄ kiji agan̄ iba, ibe ke eji mêsa ngwugwa ewọwọp iriọk mè ngwugwa esuuk, mè ngwugwa kiji geelek ikinu initọbọ ebum inyi Okumugwem me isi Akpatan̄ Mbuban kan̄, inyi mgbọ òkup me isi, nsabọn kinyi ekatumu ìnyi nsabọn kiji ibe ke ema kpekaan̄ uche me lek Okumugwem.

²⁸“Eya orọ eji ebe, ire ema itumu ikeya inyi eji, mè ìre etumu inyi bọn bọn kiji mgbọ òkup me isi, ke eji mêtumu inyi ema ibe, ‘Ìkpọ-nu mbet ntook Okumugwem eyi ebi nte kiji enamabe. Kpenama inyi ngwugwa ewọwọp iriọk, kpenanama si inyi ofifi ngwugwa geege. Ire, enama ibe ìre inu ata-ikọ inyi enyi melek kiji.’

²⁹“Awaji gwak fiin̄! Eji kpebekọt ikpaka ibot inyi Okumugwem, mè ifieek inan̄a me lek kan̄ me chereyi, mè isi inama ntook isasa igwa ngwugwa ewọwọp iriọk mè ngwugwa geelek, ilọ me lek ntook Okumugwem Awaji kiji eyi òkekeke me isi Akpatan̄ Mbuban kan̄.”

³⁰Mgbọ Fineyas ogwu ngwugwa, mè ebi ibot ido cha mè ebi ibot owot iman ebi Ijeren cha enọbe ikọ ebi otoko kè Ruben mè ebi otoko kè Gadi mè ebi otoko kè Manasi etumube, ijojot ema owot.

³¹Fineyas gwun̄ kè Elieja ogwu ngwugwa onenitumu inyi ebi otoko kè Ruben, mè otoko kè Gadi, mè otoko kè Manasi ibe: “Cherekeyi ke eji eriọọn̄ ibe ke Okumugwem ọmọ òwa melek kiji, mije, enyi kpechim Okumugwem ubọk me chieen̄ me emen inu yi. Ire, me atikọ, enyi mînyan̄a ebi Ijeren isibi me ubọk Okumugwem.”

³²Fineyas gwun̄ kè Elieja ogwu ngwugwa, mè ebi ibot cha, enanan̄a me lek ebi otoko kè Ruben, mè ebi otoko kè Gadi me agan̄ Giliadi ika inu me lek ebi Ijeren me lek ijọn̄ Kenan, mè inikpa inu ema emun̄be inyi ema.

³³Ejit obebele ebi Ijeren enenen me lek inu ya ebi osat cha ekpabe, ema etọtọn̄ Awaji. Ema kpeyaka ikpọk itọt akọn̄ ikeme ebi otoko kè Ruben, mè ebi otoko kè Gadi, kpeyaka itọt si isisi igwak inyọn̄ ijọn̄ kiban̄ igwook.

³⁴Ebi otoko kè Ruben, mè otoko kè Gadi enyinyi ntook ya erieen̄, “Ata-ikọ,” mije ema ebe ke ntook ya ìre ata-ikọ me etete kiban̄ agan̄ iba ibe ke Okumugwem ore Awaji kiban̄.