Read obolo Jos 23 Bible Online

Jos 23 - obolo bible

Jos 23

¹Mgbọ mgbọ ojebe ijọn̄ọ enenen karake Okumugwem onyibe ebi Ijeren utelelek, karake ema kpeyaka itim akọn̄ geege me lek ebi ochicha kiban̄ ìkakana ema okokop, mgbọ ya si, Josuwa îkan, acha kan̄ îje enenen.

²Me emen mgbọ ya, Josuwa onenigween̄ otutuuk ebi Ijeren, mè ebi ugane kiban̄, mè ebi ibot kiban̄, mè ebi oyerebet kiban̄, mè ebi isi akọn̄ kiban̄, mè initumu inyi ema ibe, “Mgbọ keyi, emi nra ikan, acha n̄a îje enenen.

³Enyi mîmun̄ otutuuk inu Okumugwem Awaji kinyi orọbe otutuuk ido chi geelek mije kinyi. Enyi mîmun̄ ibe ke îre Okumugwem Awaji kinyi otim akọn̄ inyi enyi.

⁴Ìkpọ, emi nra idọmọ otutuuk ijọn̄ ebi ido chi, echi eji kpetitim akọn̄ ibọkọ-nu, isa inyi enyi me ìrot me otoko me otoko, mè idọmọ si echi eji etimbe akọn̄ ibọkọ, ibene me lek okwaan̄ Jodan isi ire lek okwaan̄ ile Mediterenia me agan̄ ichep-ura.

⁵Okumugwem Awaji kinyi me lek kan̄ oborieen̄ ema isan̄a, mè ililaba ema isibi, inyi enyi mêbọkọ ijọn̄ kiban̄ isak kubọk Okumugwem Awaji kinyi ochieekbe enyi use.

⁶“Eya orọ, ìtet lek ìnye enenen ìkisun̄ ikan geelek egebe me emen Ikpa Ikan kè Mosis, mè ìkirọ otutuuk ìso. Ikajeje ìkwala me lek ìnin̄ agan̄ ulom mè ìre agan̄ ujit.

⁷Ikagọgọọk ebi ido chi ìsisik me etete kinyi ìgbaan̄ inu ìkirọ. Erieen̄ awaji kiban̄ cha, ikakigwen, ikakisasa si ìnyan̄a ibot. Ikakiriaak awaji kiban̄, ikakitọtọbọ si ibot ìnyi.

⁸Ire, ìkeke ìnye me lek Okumugwem Awaji kiji, mè ìtet ọmọ ìkaan̄ ìnye, kubọk enyi ekirọ mege inire cherekeyi.

⁹“Mije, Okumugwem îrieen̄ ikpele ido ìkakaan̄ unye isan̄a inyi enyi. Eya orọ, mege inire chereyi, kpunu ene geege òkọkọt ikeke ida enyi.

¹⁰Ene ge me lek kinyi ìkirieen̄ obop ene, mije, îre Okumugwem Awaji kiji okitim akọn̄ inyi enyi kubọk îchieekbe enyi use.

¹¹Ògagak otutuuk, mije ugwem kinyi, ìgbagbala chieen̄ ìmun̄ Okumugwem Awaji kiji me chieen̄.

¹²“Mije, ire enyi igwu ikom me atikọ, mè isa lek kinyi isi itọbọ melek ebi ido chi ebi ìsisik, ebi ìkiluk me etete kinyi, ire enyi ikigọọk ema igbaan̄ inu irọ, mè ikisa bọn ebibaan̄ kinyi iche olom inyi ema, mè ikido si bọn ebibaan̄ kiban̄ me lek nwa,

¹³ìkpọkpọ ìriọọn̄ ibe ke Okumugwem Awaji kinyi ìkpoyaka irieen̄ ebi ido chi isan̄a inyi enyi. Kpan̄asi ikeya, ife chi mênenikana ukọọk melek ufe inyi enyi, mè ikup kubọk njijan̄ òkibak enyi udun̄, mè ukpak òkichiin̄ enyi emen chieen̄, mege enyi mêkwaan̄be isan̄a me lek ata ijọn̄ keyi eyi Okumugwem Awaji kinyi onyibe enyi.

¹⁴“Ìkpọ, chereyi, emi mânije oniin̄ otutuuk ebi linyọn̄ ekije. Enyi mîriọọn̄, me otutuuk ejit kinyi mè otutuuk ibot ejit kinyi, ibe ke kpunu inu geege ikeyi òlọlọ irọrọ iso me lek otutuuk ata inu cha geelek Okumugwem Awaji kinyi ochieekbe enyi use. Otutuuk use cha geelek ìrọrọ iso inyi enyi, kubọk inu geege ikeyi ìkalọ me lek.

¹⁵Ike otutuuk ata inu Okumugwem Awaji kiji ochieekbe enyi use orọbe iso, ikeya si ke Okumugwem môrọ ibe otutuuk ijo inu cha îtumube irọn̄ ikeme enyi, mege môkpaan̄be enyi otutuuk isan̄a me lek ata ijọn̄ keyi îsabe inyi enyi.

¹⁶Ire enyi ififila inyan̄a-ibot ya eyi Okumugwem Awaji kinyi onyibe enyi ida ibe enyi esun̄, mè ije isi ikiriaak ofifi awaji, mè ikitọbọ ibot inyi ema, unaan̄-ejit Okumugwem môyok enenen me lek kinyi, enyi mêchechieen̄ ita ugwat ugwat me lek ata ijọn̄ yi eyi înyibe enyi.”