Read obolo Jos 4 Bible Online

Jos 4 - obolo bible

Jos 4

¹Mgbọ otutuuk ido ebi Ijeren ejebe isaba okwaan̄ Jodan itoon̄ isan̄a, Okumugwem onenitumu inyi Josuwa ibe,

²“Gobo akọp mè ene iba me etete ebi Ijeren, ene ge me otoko ge,

³mè tumu nyi ema ibe ebeen̄ akọp mè ewuuk iba me ere keyi me eden̄ okwaan̄ Jodan, me akpat ere ukot ebi ngwugwa cha okekebe ya, mè ebeen̄ ewuuk cha esa esi egwook me ere enyi ebegba itap efuuk me eririeen̄ keyi.”

⁴Josuwa onenigwen akọp mè ene iba ebi îgobobe me etete ebi Ijeren, ene ge me otoko ge,

⁵mè initumu inyi ema ibe, “Ìje ìfo agan̄ isi okop inyan̄a-ibot Okumugwem Awaji kinyi me eden̄ okwaan̄ Jodan ya, mè ìbeen̄ ewuuk ge ge ìtoon̄ me oguga kinyi, ìkpọ me otu ifuk otoko ebi Ijeren.

⁶Eyiyi môre inu ijejeen̄ isa inyi enyi me mgbọ òkup me isi, mgbọ nsabọn kinyi isido enyi ibe, ‘Ìre ewuuk kechi ìsibi keke inyi enyi?’

⁷Mgbọ ya, enyi mêkifọọk ema ibe ke mun̄ okwaan̄ Jodan ìtọtọbọ ifieek me isi okop inyan̄a-ibot Okumugwem mgbọ okop ya osababe okwaan̄ Jodan itoon̄. Ewuuk kechi môkup, inyi bọn ebi Ijeren esa ekekeek inu ya òrọrọ, mege ire mgbọ geelek.”

⁸Ebi Ijeren erọrọ si ikeya kubọk Josuwa onyibe ema ida. Ema ebebeen̄ akọp mè ewuuk iba me eden̄ okwaan̄ Jodan, ikpọ me otu ifuk otoko ebi Ijeren, ike Okumugwem otumube inyi Josuwa, mè isa isi igwook me ere ema egwugwuun̄be uwu ọfọ kiban̄ ilaak me eririeen̄ usen ya.

⁹Josuwa onenirọ si ibe egwuun̄ ofifi akọp mè ewuuk iba me eden̄ okwaan̄ Jodan, me akpat ere ukot ebi ngwugwa cha ìbeben okop inyan̄a-ibot ya okekebe. Ewuuk cha ọmọ òwa me ere ya mege ire cherekeyi.

¹⁰Ikeya ke ebi ngwugwa ìbeben okop ya ekeke me eden̄ okwaan̄ Jodan ya mege erọbe otutuuk inu cha geelek isan̄a, ike Okumugwem onyibe Josuwa ida ibe itumu inyi ebi Ijeren, igọọk me lek inu geelek Mosis onyibe Josuwa ida ibe irọ. Ebi Ijeren esaba okwaan̄ ya ekot ekot.

¹¹Mgbọ otutuuk ene ejebe isaba okwaan̄ ya itoon̄ isan̄a kpai, okop inyan̄a-ibot Okumugwem mè ebi ngwugwa cha enenisaba itoon̄, mè iraka ifo isi ebi ene isi ikup.

¹²Ebirieen̄ ebi otoko kè Ruben mè ebi otoko kè Gadi mè ìkike iba me lek ebi otoko kè Manasi esasa nroon̄ akọn̄ kiban̄ me ubọk ije me isi ebi Ijeren isaba, ike Mosis otumube inyi ema.

¹³Ebi otoko iba mè okpọkọ cha, inu òbet lek akọp obop ene ini ìbebem lek akọn̄, enenije iraka me isi okop ya ere Okumugwem okupbe isaba ifo lek òla ijọn̄ Jeriko ibesi itim akọn̄.

¹⁴Usen ya, Okumugwem orọrọ Josuwa imin me isi otutuuk ebi Ijeren, ema etetet ọmọ ukpook me lek otutuuk usen ugwem kan̄, kubọk etetbe ukpook me lek kè Mosis.

¹⁵Okumugwem onenitumu inyi Josuwa ibe,

¹⁶“Nyi ida ibe ebi ngwugwa cha ìbeben okop ata-ikọ[2] ya enan̄a me okwaan̄ Jodan esibi.”

¹⁷Josuwa onyinyi ebi ngwugwa cha ida ibe enan̄a me okwaan̄ Jodan esibi.

¹⁸Mgbọ ebi ngwugwa cha ìbeben okop inyan̄a-ibot Okumugwem enan̄abe me okwaan̄ Jodan ije isaba ikinene ijọn̄, akajit ukot kiban̄ isisibi me mun̄ mè ichak me otu inyọn̄, mun̄ okwaan̄ ya okpọkpọk inin̄ ijot, mè ibaak imeen̄ agba okwaan̄ agan̄ iba cha kubọk îkupbe me adasi mgbọ.

¹⁹Îre me akọp usen me adasi onyan̄ ke ebi Ijeren esaba okwaan̄ Jodan itoon̄, mè inigwugwuun̄ uwu ọfọ kiban̄ ikup itap efuuk me ama Giligan, me agan̄ mbum-ura me otubọk ijọn̄ ama Jeriko.

²⁰Josuwa onenibene akọp mè ewuuk iba cha ebi Ijeren ebeen̄be me okwaan̄ Jodan ya igwuun̄ me Giligan,

²¹mè initumu inyi ebi Ijeren ibe, “Me mgbọ ònu me isi, ire nsabọn kinyi ido enyi ebi ute ibe mè ìre ewuuk kechi ìkeke inyi keke ye,

²²enyi mêkpa inyi bọn kinyi ibe ke ebi Ijeren eje me nchat ijọn̄ isaba okwaan̄ Jodan,

²³ke Okumugwem Awaji kinyi ìrọrọ ibe mun̄ okwaan̄ Jodan ichiaak me isi kinyi mege enyi ejebe isaba me nchat ijọn̄, ike îrọbe inyi mun̄ okwaan̄ Anyiaan̄ ichiaak me isi kinyi mgbọ enyi ejebe me nchat ijọn̄ isaba itoon̄.

²⁴Okumugwem ìrọ inu chi, inyi otutuuk ebi ido geelek me linyọn̄ esa eriọọn̄ ibe ke ubọk Okumugwem înye, mè enyi si esa me ikeya eketet ukpook me lek Okumugwem Awaji kinyi ere mgbọ geelek.”