Read obolo Jos 5 Bible Online

Jos 5 - obolo bible

Jos 5

¹Mgbọ otutuuk ebi ubọọn̄ ebi Amọ ebi ìluk me isi okwaan̄ Jodan me agan̄ ichep-ura, melek otutuuk ebi ubọọn̄ ebi Kenan ebi ìluk me agba okwaan̄ ile Mediterenia enọbe ibe ke Okumugwem îrọ ibe mun̄ ichiaak me okwaan̄ Jodan me isi ebi Ijeren mege ema ejebe isaba itoon̄, uga ukpook otetet ema ire lek, ema kpeyaka ikaan̄ unye geege me emen, isasa ikeke ida ebi Ijeren.

²Me emen mgbọ ya, Okumugwem onenitumu inyi Josuwa ibe, “Ìsa ewuuk unye isi ìrom uba, mè ìsa ìfieek ebi Ijeren afi. Eyi môre òso mgbọ iba egbaan̄be owuwa ebi Ijeren ifieek afi mgbọ yaage.”

³Ikeya ke Josuwa onisa ewuuk unye isi irom owuwa uba, efefieek ebi Ijeren afi me ere ya, eyi ema enyibe erieen̄, Orioon̄ Ifieek-afi.

⁴Inu òrọrọ Josuwa ofieekbe ebi Ijeren afi ìre ke otutuuk ebirieen̄ ebi ìsoso isisi akọn̄ me etete ebi ìnanan̄a me Ijipiti isibi mîkwaan̄ isan̄a me emen èwê, mgbọ ema enan̄abe me Ijipiti isibi.

⁵Otutuuk ebi Ijeren ìnanan̄a me Ijipiti isibi, mîfieek afi iso. Ire, otutuuk ebi emaan̄be me inyọn̄ ije me emen èwê mgbọ enan̄abe me Ijipiti isibi, ebiba kpefieek afi.

⁶Ebi Ijeren ejijen̄e me emen èwê akọp acha ini, mege otutuuk ebi ìsoso isisi akọn̄ mgbọ enan̄abe me Ijipiti isibi ekwaan̄be isan̄a kpai, mije, ema kpegban̄ ida Okumugwem. Ikeya orọ, Okumugwem onyanyan̄a ibot ibe ke ema kpebemun̄ ata ijọn̄ ya òkisibi anam mè mfut uti, eyi ọmọ Okumugwem ochieekbe ebi nte nte kiban̄ use inyinyi ema.

⁷Eya orọ, Okumugwem orọrọ bọn kiban̄ etibi esibi me irek kiban̄ cha ebi ìnyenye ibot. Îre bọn kiban̄ chi ke Josuwa obe efieek afi, mije, kpefieek ema afi me inyọn̄ ije ya.

⁸Mgbọ efieekbe otutuuk kiban̄ afi isan̄a, ema ekukup me ere m̀gba-ǹgwele ukan̄ ya ema ekupbe, mege ire mgbọ unan kiban̄ otabe isan̄a.

⁹Okumugwem onenitumu inyi Josuwa ibe, “Cherekeyi ke mben esip usun̄ ya enyi erebe me Ijipiti isan̄a enyi me isi.” Eya orọ ekigwen ere ya Giligan[3] mege inire chereyi.

¹⁰Ikeya ke ebi Ijeren egwugwuun̄ uwu ọfọ kiban̄ me Giligan me lek òla ijọn̄ Jeriko, mè ikup me ere ya irie ijọk Iraraka me otu ikakwun̄ me òso akọp mè usen ini me onyan̄ ya.

¹¹Me ofit iwele usen ijọk Iraraka ya, ema enenirie inorie òtibi me ijọn̄ Kenan, òrere fituru kpunube olat me lek mè akpa ewọwọp.

¹²Bene me usen ya ema eriebe inorie òtibi me inyọn̄ ijọn̄ ya, mana ofefieek, ìkayaka ìrurọn̄ọ ìgwook. Ebi Ijeren kpeyaka imun̄ mana irie ofifi. Me acha ya, ema ebebene ikirie inorie òtibi me ijọn̄ Kenan.

¹³Usen ge, mgbọ Josuwa ojebe igbet ama Jeriko, ibebene chieen̄, mè imun̄ ogwu enerieen̄ ge okekebe me isi kan̄. Ogwu enerieen̄ ya ìwọwọọk oge akọn̄ kan̄ itet ikaan̄ me ubọk. Josuwa ojeje inin̄ ọmọ lek, mè ido ọmọ ibe, “Ìre agan̄ owa ke okeke? Ìre agan̄ kiji, sà ìre agan̄ ebi ochicha kiji?”

¹⁴Ogwu enerieen̄ ya ofọfọọk ibe, “In̄-in̄! Emi ìre ogwu isi akọn̄ Okumugwem. Mgbọ keyi, emi nra inu!” Josuwa orọrọn̄ inyana me ijọn̄, mè ikana isi ichit me ijọn̄ inyi ene ya umin, mè ibe, “Ogwukaan̄ n̄a, ìre keke ke oweek ibe emi gwun̄ ikwaan̄ kwun̄ ǹrọ?”

¹⁵Ogwu isi akọn̄ Okumugwem ya otutumu inyi Josuwa ibe, “Wọọk ikpukot san̄a me ukot kwun̄, mije, ere yi owu okekebe ìre ijọn̄ mbuban!” Josuwa orọrọ ike îbe ọmọ irọ.