Read obolo Jos 6 Bible Online

Jos 6 - obolo bible

Jos 6

¹Ebi Jeriko egwugwuk otunchit ama kiban̄, mè igon ikam, bak me lek ebi Ijeren. Ene geege ìkaraka ìsibi, ene geege si ìkaraka ìnin̄.

²Okumugwem onenitumu inyi Josuwa ibe, “Kpọ! Emi nra ikana ama Jeriko mè ogwu ubọọn̄ ama ya mè otutuuk ebi unye akọn̄ ama ya itap owu me ubọk.

³Eya orọ, otutuuk ebi akọn̄ kinyi mêje ikana ama ya okokop mgbọ ge me usen. Enyi mêje ikana ikeya usen gweregwen.

⁴Mgbọ enyi mêkije, ebi ngwugwa jaaba mêkaan̄ otita iko orie arọọn̄ jaaba me ubọk, ene ge, ge, mè isa ikije me isi okop inyan̄a-ibot ya. Ire, me òso usen jaaba, enyi mêje ikana ama ya mgbọ jaaba, ebi ngwugwa mêkekiwut otita cha.

⁵Me òso mgbọ jaaba, ebi ngwugwa cha mêwuwut ujọn̄ọ ida otita. Mgbọ enyi isinọ ujọn̄ọ ida otita ya, enyi otutuuk ene mêsasa ida ònyenye itiki akọn̄ igwook joii! Mgban ama Jeriko môgbugbugbọ igwook me ijọn̄. Enyi mêneninin̄ emen ama ya, ogwu ikup, môkpọkpọ ije inin̄ emen ama ya itat me ere îkekebe.”

⁶Josuwa gwun̄ kè Nun onenigwen ebi ngwugwa ititiin̄, mè itumu inyi ema ibe eben okop inyan̄a-ibot, mè ene jaaba me etete kiban̄ emọnọ otita jaaba ekaan̄ me ubọk, ene ge, ge, mè esa eje me isi okop inyan̄a-ibot Okumugwem ya.

⁷Inenitumu inyi ebi Ijeren ibe ebene eje ekana ama ya okokop, mè ebi ìkaan̄ nroon̄ akọn̄ me ubọk eraka efo isi esi ekeje me agan̄ isi okop inyan̄a-ibot Okumugwem ya, me isi ebi ngwugwa cha ìkaan̄ otita me ubọk.

⁸Josuwa itutumu ikọ ya isan̄a, ebi ngwugwa jaaba ìkakaan̄ otita iko orie arọọn̄ me ubọk eraraka ifo agan̄ isi okop inyan̄a-ibot Okumugwem ikije, mè ikiwut otita kiban̄. Okop Okumugwem ya okekigọọk ema me udun̄.

⁹Ebi ìkaan̄ nroon̄ akọn̄ me ubọk eje me isi ebi ngwugwa ebi ìkiwut otita. Ofifi ukpa ebi ìkakaan̄ nroon̄ akọn̄ me ubọk ekekije igọọk okop ya me udun̄. Ebi ngwugwa ebi ìkaan̄ otita cha ekpọkpọ ikiwut otita cha.

¹⁰Ire, Josuwa îwuuk lek itumu inyi ebi Ijeren ibe, “Ikataan̄ ukpo! Ene geege ikanọ ida kinyi! Usem geege ikanan̄a enyi me otu ìsibi, mege ire usen emi mâbe enyi etiki akọn̄. Mgbọ ya ke enyi mêtolek initiki akọn̄.”

¹¹Ikeya ke Josuwa osa okop inyan̄a-ibot Okumugwem ya ije ikana ama ya me ijọn̄ okokop mgbọ ge gaalek me usen ya. Ikakana isan̄a, ema ekaka inu me ere m̀gba-ǹgwele ukan̄ kiban̄, mè inikup me ere ya eririeen̄ keya.

¹²Ofit iwele kan̄, Josuwa onanan̄a ikeke me ata otu ewelegwe, ebi ngwugwa ebeben okop inyan̄a-ibot Okumugwem ya.

¹³Ebi ngwugwa jaaba cha, ebi ìkakaan̄ otita iko orie arọọn̄ jaaba isa ikije me isi okop inyan̄a-ibot Okumugwem ya, ekekije, mè ikiwut otita kiban̄. Ebi ìben nroon̄ akọn̄ me ubọk ekekije me isi ebi otita cha. Ofifi ukpa ebi ìben si nroon̄ akọn̄ me ubọk ekekije me udun̄ igọọk okop inyan̄a-ibot Okumugwem ya. Ebi ìkaan̄ otita cha ekpọkpọ ikiwut otita cha.

¹⁴Ikeya ke ema eje ikana ama ya me ijọn̄ okokop mgbọ ge si me òso usen iba ya, mè igwu ikom ika inu me ere m̀gba-ǹgwele ukan̄ kiban̄. Ikeyi ke ema erọ usen gweregwen.

¹⁵Me òso usen jaaba, ema enanan̄a ikeke me lek obum egwe, mè ije ikana ama ya okokop kubọk ema erakbe ikirọ. Ire, me usen keya, ema eje ikana mgbọ jaaba. Îre me usen keya gaalek ke ema eje ikana ama ya okokop mgbọ jaaba.

¹⁶Me òso mgbọ jaaba ya, ebi ngwugwa ewuwut otita cha. Josuwa obebe ebi ene, “Ìtiki akọn̄, mije, Okumugwem îra iyaka ama yi itap enyi me ubọk!

¹⁷Ama yi mè otutuuk inu geelek òkup me emen kan̄ îkana inu oniin̄ akọn̄ inyi Okumugwem. Îtata Reyabu ogwu òje oyet gaalek, mè otutuuk ebi melek kan̄ ekupbe me uwu kan̄, ke ebetele me ògat ugwem. Mije, îre ọmọ olet ebi kiji ebi eji eriabe ikwaan̄.

¹⁸Ire enyi, ìsan̄a lek me lek inu oniin̄ akọn̄ cha, inyi enyi ekachak ubọk me lek, mè ìsa me ikeya ìkana si inu oniin̄ akọn̄, mè ìrọ si inyi ere m̀gba-ǹgwele ukan̄ ebi Ijeren ikana si inu oniin̄ akọn̄, mè ìsa me ikeya ìtap ufieejit ìgak ere m̀gba-ǹgwele ukan̄ ya.

¹⁹Ire, otutuuk alata araran̄ mè alata okuket mè inu echi esabe ekwe irom mè echi esabe okwukwut irom ìkup me mbuban inyi Okumugwem. Echicha, ebesa isi itap me uwu isun̄-inu Okumugwem.”

²⁰Josuwa inyinyi nteme ya isan̄a, ebi ngwugwa ewuwut otita, ebi Ijeren etitiki akọn̄ joii! Mgbọ ebi ene enọbe ida otita ya, mè itiki akọn̄ igwook joii, mgban ama ya ogbugbugbọ igwook me ijọn̄. Ebi Ijeren egwogwook inin̄ ikilibi inene ama ya, ogwu ikup, olibi òtat me ikeke ere isi kan̄ okikpọ. Ema ebọbọkọ ama ya,

²¹mè isa oge akọn̄ kiban̄ ijijaka otutuuk inu geelek òkup me ama ya isan̄a kpai, ibene me lek ebirieen̄ mè ebibaan̄, ugane mè gwun̄ aya, ire lek ebi kè eriembuuk mè arọọn̄ mè inyinya akpan. Ejijijaka otutuuk ama ya isan̄a kpai.

²²Sabum enichep ama ya, Josuwa oraria ebirieen̄ iba cha ebi îriabe ibe esi ewọlọ emen ama ya ekpọ ibe, “Ngwa, ìsi uwu ogwu enenwaan̄ òje oyet ya, ìsi ìsan̄a ọmọ melek ebi ototun̄ ukan̄ kan̄ ìsibi ìnu, kubọk enyi enyan̄abe ibot inyi ọmọ ibe ke enyi mêrọ.”

²³Nsabọn irieen̄ iba cha esisi, mè isan̄a Reyabu isibi, ọmọ mè ogwu ute melek ogwu uga, mè ebi ngwan̄ ebirieen̄, mè otutuuk ebi geelek ìkup me uwu kan̄. Ikeya ke esan̄a otutuuk ebi ototun̄ ukan̄ kiban̄ isibi, mè isa ema isi isun̄ me ere ge me agba lek ere m̀gba-ǹgwele ukan̄ ebi Ijeren.

²⁴Ebi Ijeren enenitap ukan̄ iwọp ama ya mè otutuuk inu geelek òkukup me emen iriọk. Îtata alata okuket mè alata araran̄ mè inu echi esabe ekwe irom mè echi esabe okwukwut irom ke ekpulu isa isi itap me uwu isun̄-inu me Uwu Mbuban Okumugwem.

²⁵Ire, Josuwa otetele Reyabu mè ebi uwu ogwu ute mè otutuuk ebi geelek ìkup me uwu kan̄ me ògat ugwem, mije ọmọ oletbe ebi ikwaan̄ ebi Josuwa oriabe ibe esi ewọlọ emen ama Jeriko ekpọ. Reyabu oneniluk me etete ebi Ijeren inire chereyi.

²⁶Mgbọ ya, Josuwa oneninyan̄a ibot ikeme Jeriko ibe, “Ene geelek òkpọkpọk inama ama Jeriko yi, ogbo Okumugwem itet ene ya! Ene ya itọbọ ọdọ ama yi, adasi gwun̄ enerieen̄ kan̄ ikwu! Ire ibene otunchit ama yi igwuun̄, gwun̄ enerieen̄ kan̄ ogwu ijija ikwu!”

²⁷Okumugwem okukup melek kè Josuwa. Etip kè Josuwa otataan̄ ikana otutuuk lek ijọn̄ ya.