Read obolo Jos 7 Bible Online

Jos 7 - obolo bible

Jos 7

¹Ebi Ijeren kpesun̄ ikan ofolek inu oniin̄ akọn̄ cha ubọk ògbegbe. Ekan gwun̄ kè Kami, gwun̄ kè Jabidi, gwun̄ kè Jera ogwu otoko kè Juda îteen̄ usini me lek inu oniin̄ akọn̄ cha. Sa me ikeya, unaan̄-ejit Okumugwem oyoyok enenen me lek ebi Ijeren.

²Josuwa oneniria ene me Jeriko isi ama Ai, ibe esi enween̄ lek ewọlọ lek ijọn̄ ya ekpọ. Ama Ai ìkup me agba lek ama Bet Afen òkup me agan̄ mbum-ura ama Beten. Ikeya ke ife cha eje, mè isi inween̄ lek ikpọ lek ijọn̄ ama Ai.

³Ife cha enenika inu, mè initumu inyi Josuwa ibe, “Kamama lek ìria otutuuk ene ìsi Ai. Ria obop ene iba mè ìre obop ene ita gaalek, ke mêjijaka ama ya isan̄a kpai. Kanyi otutuuk ene saasaak ibe esi ere ya, mije, ebi Ai ìre ene inen mè inen gaalek.”

⁴Eya orọ, Josuwa oraria inu môsobe obop ene ita me etete ebi Ijeren isi akọn̄ me Ai. Ire, ebirieen̄ ebi Ai ererieen̄ ema igwu ikom,

⁵mè ikpan̄ ema ilap me lek akọp ene ita mè gweregwen. Ebirieen̄ Ai egọgọọk ebi Ijeren cha ibene me otunchit ama kiban̄ isi ire ere ekibum ewuuk, mè ikpan̄ ema enenen mgbọ ema ekilibi ikwala isibi me lek osiki ijọn̄ ngigo ya. Eya orọ, uga ukpook oninin̄ me emen ebi Ijeren, lek kiban̄ owọwọ. Unye kiban̄ otọtọk ita ikana mun̄.

⁶Mije inu ya òrọrọ, Josuwa melek ebi ugane ebi Ijeren esasa me ufieejit itaba ofọnti igwak me lek kiban̄, mè igwọ ntọn̄ igwook me ibot, mè irọn̄ inyana ikana isi ichit me ijọn̄ me isi okop inyan̄a-ibot Okumugwem, mè ibia ikeya me ere ya mege ire ikakwun̄.

⁷Ike ema enyanabe me ijọn̄ ya, Josuwa oneniriaak uriaak ibe, “Jei! Ogwukaan̄-ene Okumugwem, ìre òbak me lek keke isa eji isaba okwaan̄ Jodan mọnọ? Ìre òsa eji inu ibonikana eji itap me ubọk ebi Amọ, inyi owu òsa me ikeya òkpan̄ eji òsan̄a ni? Mebe eji mîtumu ifieek, mè ibia me usaba okwaan̄ Jodan agan̄ keyilọ, kè ònwọn me lek kiji!

⁸Jei Okaan̄-ene, eyi ebi Ijeren echichinibe me lek ebi ochicha kiban̄, mè ililiin̄ ibubeek, m̀batumu keke?

⁹Mgbọ keyi, ebi Kenan, mè otutuuk ebi geelek ìluk me lek ijọn̄ yi mêninọ inu yi òrọrọ, mè inikpa mbin akọn̄ ikana eji me ijọn̄ okokop, mè ikpan̄ eji otutuuk isan̄a, inyi erieen̄ kiji ichep dìp dìp. Sà erieen̄ ilile kwun̄ ya ye, ìre keke ke owu oborọ me lek ni?”

¹⁰Okumugwem onenitumu inyi Josuwa ibe, “Nan̄a keke! Keke orọ olaakbe ikana isi ichit ikeyi me ijọn̄?

¹¹Ebi Ijeren mîrọ ijo inu, mè ififila inyan̄a-ibot n̄a isan̄a kpai, kperọ ida ikọ n̄a ike ntọbe ibe ema erọ. Ema mîteen̄ usini me lek inu oniin̄ akọn̄ cha. Sa me ikeya, ema mîchiin̄ inọ, mè ikan̄ ataak igbaalek, mè isa inu òkup mbuban cha isi isun̄ me etete inu echi ema ekaan̄be.

¹²Eya orọ, ebi Ijeren kpebekọt ikeke ida ebi ochicha kiban̄. Ema ebekilililiin̄ ibubeek me isi ebi ochicha kiban̄, mije, ema me lek kiban̄ mîkana inu oniin̄ akọn̄, eyi ebejijijaka isan̄a kpai. Emi m̀kpayaka ikup melek kinyi igak ikeya, îtata enyi efafiat inu oniin̄ akọn̄ cha isan̄a me etete kinyi.

¹³“Nan̄a keke, mè si gwọk ebi ene lek. Tumu nyi ema ibe egwọk lek kiban̄ eban iyakwut, mije, Okumugwem, Awaji ebi Ijeren ìbe, ‘Enyi ebi Ijeren, inu oniin̄ akọn̄ ọmọ òwa me etete kinyi. Enyi kpebekọt ikeke ida ebi ochicha kinyi, îtata enyi efafiat inu cha isan̄a me etete kinyi.’

¹⁴“Me ewelegwe, enyi mêsibi inu me otoko me otoko. Otoko geelek eyi emi Okumugwem mâtetbe isibi, ebi otoko keya mêsibi inu me owot iman me owot iman. Owot iman geelek eyi emi mâtetbe isibi me otoko keya, ebi owot iman keya mêsibi inu me ototun̄ ukan̄ me ototun̄ ukan̄. Ototun̄ ukan̄ geelek eyi emi mâtetbe isibi me owot iman keya, ebi ototun̄ ukan̄ keya mêsibi inu me enerieen̄ me enerieen̄.

¹⁵Ogwu enerieen̄ geelek mêtetbe inu oniin̄ akọn̄ cha me ubọk, ebewọwọp itaka iriọk me ukan̄, ọmọ melek ebi ototun̄ ukan̄ kan̄ mè otutuuk inu geelek îkaan̄be. Mije, ene ya îfifila inyan̄a-ibot Okumugwem, mè isa ikpele esip ijet ebi Ijeren.”

¹⁶Josuwa onanan̄a ikeke me ata otu ewelegwe, mè isa ebi Ijeren me otoko me otoko inu, etetet otoko kè Juda isibi.

¹⁷Inenisan̄a ebi otoko kè Juda isibi me owot iman me owot iman, etetet owot iman kè Jera isibi. Iyayaka inisan̄a ebi owot iman kè Jera isibi me ototun̄ ukan̄ me ototun̄ ukan̄, etetet ototun̄ ukan̄ kè Jabidi isibi.

¹⁸Inenisan̄a ebi ototun̄ ukan̄ kè Jabidi isibi me enerieen̄ me enerieen̄, etetet Ekan gwun̄ kè Kami, gwun̄ kè Jabidi, gwun̄ kè Jera ogwu otoko kè Juda isibi.

¹⁹Josuwa onenibe Ekan, “Gwun̄ n̄a, sa umin nyi Okumugwem, Awaji ebi Ijeren, mè nyi ọmọ itọn̄. Tumu-nu nyi emi inu owu orọbe. Kalet emi inu geege me lek.”

²⁰Ekan ofọfọọk Josuwa ibe, “Iin̄, me atikọ, emi nrọ Okumugwem, Awaji ebi Ijeren, ijo inu. Inu nrọbe ìre ikeyi:

²¹Mgbọ ekifum inu me akọn̄, nnenimun̄ ujuja ofọnti inyọn̄ ebi Babilọn ge, mè imun̄ si efit ikpoko alata okuket iba, melek okpukpuk alata araran̄ eyi ulobo kan̄ môsobe okpọkọ kilo ge. Mgbọ mmun̄be inu cha, îkọlọ emi ebek, eya orọ, mkpukpulu ema isa ifo. Inu cha ọmọ òwa me emen ijọn̄ nletbe, me emen uwu ọfọ n̄a, alata okuket cha okup me irak.”

²²Josuwa oraria ene isi uwu ọfọ kè Ekan. Ema elilibi ekot ekot isi, mè isi imun̄ inu cha me atikọ, eletbe me emen ijọn̄ me emen uwu ọfọ ya, mè alata okuket ya me irak.

²³Ema ekpukpulu inu cha me uwu ọfọ ya, mè isa ijet Josuwa mè otutuuk ebi Ijeren, mè ikpulu iwele igwook me isi Okumugwem.

²⁴Josuwa mè otutuuk ebi Ijeren enenitet Ekan gwun̄ kè Jera, mè ikpulu si alata okuket cha, mè ofọnti inyọn̄ ya mè okpukpuk alata araran̄ ya mè bọn kan̄ ebirieen̄ mè ebibaan̄, igbaalek eriembuuk kan̄ mè inyinya akpan kan̄ mè arọọn̄ kan̄ mè uwu ọfọ kan̄, mè otutuuk inu geelek îkaan̄be, mè isa ema otutuuk isi me iteke Akọ.

²⁵Mgbọ ema erebe ere ya, Josuwa obebe ọmọ, “Òjeje itap eji ufialek me lek? Me cherekeyi, Okumugwem môtap owu si ufialek me lek.” Otutuuk ebi Ijeren eteteen̄ ewuuk isa itọbọ Ekan mè ebi ototun̄ ukan̄ kan̄ ikpan̄, mè itap ukan̄ iwọp ema. Ikeya ke esa ewuuk itọbọ ema otutuuk ikpan̄ isan̄a kpai.

²⁶Ebi Ijeren etititiin̄ ewuuk ibene ikana ikpele èdọ me inyọn̄ kè Ekan, eyi òkukup ire chereyi. Okumugwem oneniyaka uga unaan̄-ejit kan̄ ya ito. Îre mije inu yi ke ekigwen ere ya iteke Akọ[4] mege inire cherekeyi.