Read obolo Jos 9 Bible Online

Jos 9 - obolo bible

Jos 9

¹Otutuuk ebi ubọọn̄ ìluk me agan̄ ichep-ura me isi okwaan̄ Jodan, mè ebi ìluk me inyọn̄ orioon̄, mè ebi ìluk me inyọn̄ orioon̄ isi ogoon̄ agan̄ ichep-ura, mè ebi ìluk me otutuuk agba okwaan̄ ile Mediterenia inyi ntut agan̄ Lebanọn me òfo agan̄ inyọn̄, mînọ ike ebi Ijeren ekitim ikpan̄ ebi ochicha kiban̄. Ebi ubọọn̄ cha ìre ebi ubọọn̄ ebi Et, mè ebi Amọ, mè ebi Kenan, mè ebi Pereji, mè ebi Ifi melek ebi Jebus.

²Ema enenigbaan̄ lek kiban̄ isun̄ ge, inenitim akọn̄ me lek kè Josuwa melek ebi Ijeren.

³Ire, mgbọ ebi ama Gibiọn, ebi ìrere si ebi ido Ifi, enọbe inu Josuwa orọbe ebi Jeriko, mè ebi Ai,

⁴ema enenisa ifiọk inu me lek kè Josuwa, mè ifiaan̄ irọ kubọk ema ìre ebi eriabe osat. Ema esasa oka akpa itap inorie, mè isa oka ogbokot ikpa anam ògwagwak egbaan̄be ichim itap miin̄, mè ikpulu inu chi ibọp me inyọn̄ inyinya akpan kiban̄,

⁵mè itap ǹsisọkọ oka ikpukot me ukot, mè itap oka ofọnti me lek. Otutuuk fituru ema ekaan̄be me ubọk ìchachiaak, mè itibi mbubeek me lek.

⁶Ema eneninu me lek kè Josuwa me Giligan, me ere m̀gba-ǹgwele ukan̄ ebi Ijeren okupbe. Mgbọ ema erebe ere ya, ema etutumu inyi Josuwa melek ebi Ijeren ibe, “Eji enan̄a me ido òjọjọn̄ọ ere inu. Mgbọ keyi, ìna mè eji melek kinyi egbaan̄ enyan̄a ibot.”

⁷Ebi Ijeren enenifọọk ebi Ifi cha ibe, “Usini mgbọ, môre ke enyi mîluk igbet eji me lek. Ire ikeya, ìre eji ebejeje igọọk enyi igbaan̄ inyan̄a ibot?”

⁸Ire, ema efọfọọk Josuwa ibe, “Eji ìre ebi usun̄ kinyi.” Josuwa onenido ema ibe, “Enyi ìre ebi owa? Ere owa ke enyi enan̄a inu?”

⁹Ema efọfọọk ọmọ ibe, “Eji enan̄a me ido òjọjọn̄ọ ere enenen inu, mije, eji mînọ erieen̄ Okumugwem Awaji kinyi. Eji mînọ si etip kan̄, mè inọ otutuuk inu geelek îrọbe me Ijipiti.

¹⁰Ikeya si ke eji enọ otutuuk inu îrọbe ebi ubọọn̄ iba ebi Amọ ebi ìluk me agan̄ mbum-ura me usaba agan̄ okwaan̄ Jodan. Ebi ubọọn̄ cha ìre Siyon, ogwu ubọọn̄ ebi Esibon, mè Ôgu, ogwu ubọọn̄ ebi Basan, òluk me Asitarot.

¹¹Mije keya ke ebi ugane kiji mè otutuuk ebi ido kiji etumu inyi eji ibe eji eben inorie eji mêriebe me oniin̄ ije, mè enu me lek kinyi, mè enetumu enyi enyi ibe ke eji ìre ebi usun̄ kinyi, mè enyi enegọọk eji egbaan̄ enyan̄a ibot.

¹²Omun̄ inorie kiji, eji eben melek ukan̄ me lek isa inan̄a me uwu kiji usen eji ebenebe ije inunu me lek kinyi, ibe ke eji mêrie me oniin̄ ije. Mgbọ yi, ìkpọ, îchiaak isan̄a, mè itibi mbubeek me lek.

¹³Ikeya si, ogbokot ikpa anam chi ìre ayaya mgbọ eji etapbe miin̄ ijot emen. Ire, ìkpọ! Îgwak ita. Ofọnti kiji mè ikpukot kiji înin̄ oka, bak me lek ujọn̄ọ ije kiji.”

¹⁴Ebi Ijeren ebọbọkọ usini me lek inorie ife cha irie, isa ijeen̄ ibe ke ema mîkana unene. Ire, ema kpesi ido Okumugwem iriọọn̄ ida kan̄.

¹⁵Josuwa orọrọ esuuk melek ife cha, mè inyan̄a ibot melek kiban̄ ibe ke mêtele ibe ebibi egat ugwem. Ebi ibot ido ebi Ijeren enyanyan̄a si ibot inyi ife cha.

¹⁶Usen ita iraraka me lek inyan̄a-ibot ya ema enyan̄abe, ebi Ijeren enọnọ ibe ke ebi Gibiọn ìre ebi ìluluk iriaak me lek kiban̄, ke îre agba lek kiban̄ gaalek ke ife cha eluk.

¹⁷Eya orọ, ebi Ijeren ebebene ije, mè inire ama ebi Gibiọn me òso usen ita. Ama ife cha ìre Gibiọn, mè Kefira, mè Bierot, mè Kiriat Jiarim.

¹⁸Mgbọ ebi Ijeren erebe ama cha, ema kpekpan̄ ife cha, mije, ebi ibot kiban̄ mîwuuk lek isa Okumugwem, Awaji ebi Ijeren inyan̄a ibot melek ife cha. Otutuuk ido ebi Ijeren ekekinunuun̄ inyi ebi ibot kiban̄ me lek inu ya ema erọbe.

¹⁹Otutuuk ebi ibot cha enenitumu inyi ebi ido Ijeren ibe, “Eji me lek kiji mîwuuk lek isa Okumugwem, Awaji ebi Ijeren inyan̄a ibot melek ife chi. Eya orọ, eji kpebekọt ichak ema ubọk geege me lek.

²⁰Kpan̄asi ikeya, inu eji mêrọbe ema ìre, eji mêtele ema egat ugwem, inyi Awaji ikanaan̄ ejit ìnyi eji mije inyan̄a-ibot ya eji enyan̄abe melek kiban̄.”

²¹Ebi ibot cha enenitumu ifieek ibe etele mè ife cha egat ugwem. Ire, ife cha ekakana ebi ìkikep iye, mè ebi ìkichibi mudim inyi otutuuk ido ebi Ijeren, ike ebi ibot cha etumube inyi ema.

²²Josuwa oneniria ikwaan̄ igwen ebi Gibiọn cha, mè inido ema ibe, “Keke orọ enyi efiaan̄be eji, mè itumu inyi eji ibe ke ere enyi elukbe îjọn̄ọ ere me lek kiji enenen, me mgbọ enyi elukbe iriaak me agba lek kiji?

²³Eya orọ, enyi ekup me irak ufieek-otu. Bene me mgbọ keyi, enyi ebekire ebi usun̄ inyi eji. Enyi ebere ebi ìkep iye, mè ebi ìbekichibi mun̄ me uwu Awaji n̄a.”

²⁴Ebi Gibiọn efọfọọk Josuwa ibe, “Me atikọ, eji ebi usun̄ kwun̄ mînọ ijot utọn̄ ibe ke Okumugwem Awaji kinyi înyi Mosis, ogwu ikwaan̄ kan̄ ida ibe isa otutuuk ijọn̄ yi inyi enyi, mè ikpan̄ otutuuk ebi ìluk me lek ijọn̄ yi isan̄a kpai ike enyi ekinin̄ inu. Mgbọ eji enọbe inu yi, ufieek-owot ebek ugwem kiji îkeme eji enenen, bak me lek kinyi. Eya orọ eji erọbe inu ya eji erọbe.

²⁵Mgbọ keyi, kpọ eji ire ebi me emen ubọk kinyi, ìrọ eji inu enyi emun̄be ibe ke înwọn, mè itat irọrọ.”

²⁶Josuwa orọrọ ema ike îtumube ya, mè inyan̄a ema isibi me ubọk ebi Ijeren. Ìkachieek ibe ebi Ijeren ekpan̄ ema.

²⁷Me usen ya, Josuwa osasa ema irọ ebi ìkikep iye, mè ebi ìkichibi mun̄ inyi ebi ido Ijeren, mè ikikep si iye mè ikichibi si mun̄ inyi ntook Okumugwem me ere geelek Okumugwem môgobobe ibe esun̄ ntook kan̄. Ikeya ke ema ekirọ mege inire chereyi.