Read obolo I Tim 1 Bible Online

I Tim 1 - obolo bible

I Tim 1

¹Emi Pọọlu, ogwu òrere ogwu otuchieen̄ kè Jisọs Karais inan̄a me ida eyi Awaji Ogwu Unyan̄a kiji, mè Jisọs Karais ogwu eji ekaan̄be ikpọchieen̄ me lek,

²emi nge ikpa etip keyi ijet owu Timọti, atata gwun̄ n̄a me oniin̄ ikọ Awaji. Atata nnwọn mè nsan mè esuuk eyi Awaji Ute mè eyi Jisọs Karais Okaan̄ kiji ikup inyi owu.

³Îkaan̄ ebi ife ge ìkup me Efesọs ikijeen̄ nlilọ ijejeen̄. Eya orọ, ike ntumube inyi owu mgbọ ya mbasi Mesidonia, kup me Efesọs, inyi ògban ife cha, inyi ekayaka ìjeen̄ nlilọ inu cha.

⁴Tumu nyi ife cha ibe etele urọk cha ikakaan̄ge ibot, mè ujọn̄ọ mfufuk owot iman cha ema ekifiat mgbọ kiban̄ ikijeen̄, mije, îre ifan̄a ifan̄a gaalek ke inu chi okitap me etete ebi ene, ìkakijeen̄ ene nkeek Awaji. Ekisa me ichechieek gaalek iriọọn̄ nkeek Awaji.

⁵Inu òrọrọ mbe owu ògban ife cha ìre, inyi ebi ene ekọt esa me ejit ikakaan̄ge ofiaan̄ geege me emen, mè atata ichechieek eyi kpunube wọlọwọlọ geege me emen, emun̄ ebi melek kiban̄ me chieen̄, me ekiket kiban̄ ikafieekge ema ikọ geege.

⁶Usini ene mîkpọ chieen̄ ilọ me lek inu chi, mè inan̄a igọọk ikisi itumu burubut ikọ ikakupge me lek inu geege.

⁷Ema ekiweek irere ebi ìkijeen̄ Ikan Awaji, ire, ema kperiọọn̄ inu ema ekitumu. Ikan cha si ema ekirọ kubọk ema erọriọọn̄ igana, ema kpekọkọt igobo itet.

⁸Eji mîriọọn̄ ibe ke Ikan kè Mosis ìre inu ònwọnwọn, mè ire ebi ene isun̄ Ikan cha kubọk Awaji oweekbe ibe esun̄.

⁹Eji mîriọọn̄ si ibe ke kpebak me lek ebi ata irọrọ inyi Ikan cha; ke enyi Ikan cha ibak me lek ebi ìkifiat Ikan mè ebi unye-ibot, mè ebi kpekitet ukpook Awaji, mè ebi ijo ubọk irọrọ, mè ebi ekatanage me isi Awaji, mè ebi kpekisa inu eyi Awaji igwen inu geege, mè ebi ìkikpan̄ ebi ute mè ebi uga, mè ebi geelek ìkikpan̄ ene,

¹⁰mè ebi barabat, mè ebirieen̄ ìkilaak ebirieen̄ ogbo kiban̄, mè ebi geelek ìkichiin̄ ene isa irọ usun̄, mè ebi ataak, mè ebi ìkinyan̄a ibot isan̄a mè ikan̄ ataak, mè ebi ìkije ikeme ata ijejeen̄ geelek eyi Awaji.

¹¹Ata ijejeen̄ chi ìre echi òkup me emen ata etip eyi ujamgbugbo, eyi Awaji ogwu òkaan̄ itọn̄ osabe itap emi me ubọk ibe emi ǹtumu ǹsibi.

¹²Nsa itọn̄ inyi Jisọs Karais Okaan̄ kiji ogwu òmumun̄ ibe ke emi mgbe, mè igobo emi, mè inyi emi unye ibe emi ǹnensi ikwaan̄ ǹnyi ọmọ.

¹³Me mgbọ òraraka, nkitumu ijo ikọ ibak Okaan̄-ene Jisọs, mè ikirọ ikeme ọmọ, mè ikirọ ọmọ inu esip. Ire, Awaji îkaan̄ emi ejit nsan me lek, bak me lek, inu chi nrọbe, ǹrọ me nkariọọn̄ge, mije, me mgbọ ya, ǹkachieek ibe ke Jisọs ore Karais ya.

¹⁴Okaan̄ kiji oneninyi emi atata nnwọn kan̄ òjot òjot, mè inyi emi ichechieek mè imumechieen̄ eyi òkup me emen kè Jisọs Karais.

¹⁵Eyi ekitumu ibe ke Jisọs Karais ìnu me linyọn̄ ineninyan̄a ebi ijo, ikọ ya ìre atalek atikọ, mè ire si ikọ ògbegbe ibe otutuuk ene echieek, mè ebọkọ etap. Emi mfieek ichit me etete otutuuk ebi ijo.

¹⁶Mije keyi ke Awaji oto emi nsan, inyi Jisọs Karais isa emi ya ogwu òfefieek ichit me etete ebi ijo, ijeen̄ ebilene inu ofolek ujọn̄ọ ukarajit kan̄. Sa me ikeyi, ebi geelek mêchieekbe me lek kan̄ mè ikaan̄ ugwem ikakaan̄ge itata, mêkween̄ inu inan̄a me lek n̄a.

¹⁷Umin mè itọn̄ ikup inyi Awaji ogwu òrere Ubọọn̄ eyi mgbọ geelek, ogwu kpokwube, ogwu chieen̄ ebilene ìkakimun̄, ogwu ọmọ gaalek orebe Awaji, ire mgbọ geelek, mgbọ geelek! Ikup ikeya!

¹⁸Timọti, gwun̄ n̄a, ǹkinyi owu nteme keyi igọọk me lek nriran ebi eyi Awaji ebenbe ibak owu, mije, ire orọ inu etumube me nriran ya, owu môtim ata etim inyi Awaji,

¹⁹mè ikeke inye me emen ichechieek. Ejit kwun̄ si ìkpofieek owu ikọ. Usini ene òwa ebi ekagban̄ge utọn̄ me lek inu ejit kiban̄ okitọ inyi ema. Sa me ikeya, ichechieek kiban̄ me lek Awaji îjijaka.

²⁰Usini me lek ife cha ìre Ameniọs mè Alikisenda. Nkana ife chi ene iba itap me ubọk Yọk, inyi isulu ema osusut, inyi ema ekayaka ìtọ Awaji ubọk me isi.