Read obolo I Tim 2 Bible Online

I Tim 2 - obolo bible

I Tim 2

¹Me adasi irek, ìkiriaak uriaak, mè ìkibeek mbeek me ibot otutuuk ene. Ìkiriaak Awaji ibe irọ ene nsan, mè ìkinyi ọmọ itọn̄ me ibot otutuuk ene.

²Ìkiriaak uriaak si me ibot ebi ubọọn̄ mè ebi geelek ìkup me ibot mkpulu, inyi eji eluk me esuuk mè utelelek me òjot òjot ukpook Awaji, mè ekeluk ugwem òkakaan̄ ulibi me oniin̄ geelek.

³Eyi ìre inu ònwọnwọn, mè ineme Awaji Ogwu Unyan̄a kiji,

⁴ogwu òweweek ibe otutuuk ene ekaan̄ unyan̄a, mè eriọọn̄ atikọ kan̄.

⁵Awaji ge gaalek okup, ogwu nteek ge gaalek si okup ikiteek nteek me etete Awaji melek ebilene. Ene ya ìre ogwu enerieen̄ Karais Jisọs,

⁶ogwu òsasa lek kan̄ irọ inu inwene ibot inyi otutuuk ebilene. Eyi onenire inu ata-ikọ eyi ònunu me ata mgbọ, inirọ inyi ebi ene eriọọn̄ ibe ke Awaji ìkiweek inyanyan̄a otutuuk ebilene isibi me emen ijo inu.

⁷Etip yi ke Awaji ogwen emi isa irọ ogwu otuchieen̄ kè Karais, ibe emi ǹsi ǹlook ǹkana me ere geelek, mè ǹsi ǹjeen̄ ebi ekarege ebi Ju ata etip eyi ichechieek mè atikọ. Ǹkakan̄ ataak ìnyi enyi, ǹkitumu atikọ.

⁸Me ere geelek enyi etitiin̄be ikitọbọ ebum inyi Awaji, ǹkiweek ibe ebirieen̄ ekeriaak uriaak. Ebirieen̄ chi mêre ebi ìtatana me isi Awaji, kpebekaan̄ unaan̄-ejit mè ibaak geege me ejit. Ema mêkibene ubọk kiban̄ òkup mbuban ifo inyọn̄ mgbọ ekiriaak uriaak.

⁹Ǹkiweek si ibe ebibaan̄ ekesa inu echi ekem ekem otu ewe ebala lek kiban̄ me ubọk ògbegbe mè inwọn mè ijaan̄. Mbala-lek kiban̄ ikare ikpakpa ojelek ijeek ebi òje oyet ekikpa, mè isasa alata araran̄, mè ewuuk unye otu ewe, mè unye otu ewe ekwut mè ofọnti ibala lek.

¹⁰Ire, mbala-lek kiban̄ ìbore isisi ata ikwaan̄ echi ògbegbe ibe ebibaan̄ ebi ìchechieek me lek Awaji ekesi.

¹¹Enenwaan̄ geelek isiki ibot, mè ikiriaan̄ ere ikween̄ inu me emen uwu ntitiin̄ Awaji.

¹²Ǹkanyi enenwaan̄ geege irek ibe ijeen̄ ikọ Awaji, mè ìyaka ire ibe ikitọ ikọ inyi ebirieen̄. Inu òkukup inyi enenwaan̄ ìre irariaan̄ ere ikigban̄ ikọ gaalek,

¹³mije, Awaji ìdasi irom Adam sabum Îfu.

¹⁴Ofifi kan̄, ìkare Adam ke Yọk ofiaan̄, îre Îfu ogwu enenwaan̄ ke îfiaan̄, inanan̄a irọn̄ inin̄ me ijo inu.

¹⁵Ire, Awaji mônyan̄a ogwu enenwaan̄ inan̄a me lek Gwun̄ ya emanbe, mè ire ogwu enenwaan̄ ya ichieek me lek kè Jisọs Karais, mè ikeke inye me ichechieek ya mè imumechieen̄, mè itana me isi Awaji mgbọ geelek, mè ikisun̄ lek kan̄ ubọk ògbegbe.