Read obolo I Tim 4 Bible Online

I Tim 4 - obolo bible

I Tim 4

¹Ekwukwu Mbuban îtumu isibi ibe, me òta mgbọ, ke usini ebi ìchechieek me lek kè Jisọs Karais mêyaka ichechieek kiban̄ ito, mè ikana igọọk ekwukwu echi ofiaan̄, mè ijejeen̄ echi ijo erumun̄ okijeen̄.

²Ijejeen̄ chi ìboje me otu ebi ofiaan̄ ebi ìkirọ kubọk ema ìre ebi atikọ. Ejit ife chi ìkpọkpọ inye kubọk inu esabe nkọm-ochichim ukan̄ otetbe iren̄e iwọp ikpan̄, mije, ema kpeyaka ikikọt iriọọn̄ inu òtatat mè eyi òlọlọ. Eya orọ, ema ikefafiaan̄ ene ubọk geelek, ejit kiban̄ ìkakifieek ema ikọ kubọk ge.

³Ema ekijeen̄ ebi ene ibe ekayaka ìdo nwa, ekayaka ìbat olom, mè ekayaka ìrie usini inorie ebi ene ekirie, inorie Awaji orombe ibe ebi geelek ìchechieek me lek kan̄, mè iriọọn̄ atikọ kan̄ ekerie, mè enyi ọmọ itọn̄.

⁴Inu geelek Awaji orombe ìre inu ònwọnwọn, kpunu geege ebefifiin̄. Otutuuk ìre inu ebebọbọkọ, mè inyi Awaji itọn̄,

⁵mije, ikọ Awaji mè itọn̄ eji enyibe Awaji îrọ inyi inorie ya ikup me mbuban, mè igbe inu eberie.

⁶Ire onyi bọn Nte kiji ìkup me ere ya otutuuk nteme chi, owu môre ata gwun̄ ikwaan̄ kè Jisọs Karais, mè ire si ogwu ekpukpobe isibi igọọk me atikọ eyi oniin̄ ikọ Awaji melek ata ijejeen̄ eyi owu me lek kwun̄ okigọọk.

⁷San̄a lek kwun̄ me lek mfufuk echi ìkakinyi Awaji umin. Kikween̄ iluluk ugwem òkinyi Awaji umin.

⁸Irọrọ inu ekisa ikpọk, inyi anam akpalek ene inye, înwọn. Ire, irọrọ inu ike Awaji oweekbe onwọn ichit me oniin̄ geelek, mije, môtap ubọk inyi ene me ugwem keyi, mè itap si ubọk inyi ene me ugwem òkinu me isi.

⁹Ikọ keyi mbatumu ìre atalek ikọ eyi ògbegbe ibe ebọkọ otutuuk etap.

¹⁰Eji ekikwukwulu mè ikibọkọ ufialek mije eji ekikpọ chieen̄ me lek Awaji ogwu òkup me ugwem, ogwu òrere ogwu Unyan̄a inyi otutuuk ebilene, ògak ge ebi geelek ìchechieek me lek kan̄.

¹¹Kiteme ebi ene nteme, mè kijeen̄ ema ibe ekerọ inu chi.

¹²Kachieek ibe ene geege ikpọ owu chieen̄ isiki, mije orebe sọntiik gwun̄. Ire, luk ugwem eyi ebi ìchechieek me lek kè Jisọs Karais mêsabe ikikween̄ inu ofolek otu itumu-ikọ, mè ubọk irọ-inu, mè imumechieen̄, mè ichechieek, mè iluluk ugwem eyi nrọ-nlọ ikakupge me emen.

¹³Sa mgbọ kwun̄ mè efuuk kwun̄ kifuk Ikpa Mbuban nyi ebi ene, mè kitumu ikọ Awaji, mè kijeen̄ si ikọ Awaji mege ire mgbọ mânube.

¹⁴Gbala chieen̄ kpọ uche eyi Ekwukwu Mbuban onyibe owu inan̄a me otu ebi nriran, mgbọ ebi ugane ntitiin̄ Awaji etoon̄be owu ubọk me ibot.

¹⁵Gwuun̄ chieen̄ kirọ inu chi, mè sa otutuuk lek kwun̄ nyi, inyi ene geelek imun̄ ubọk owu okije ifo isi.

¹⁶Gbala chieen̄ kpọ lek kwun̄ mè inu okijeen̄, mè nye lek kirọ ikeya fo isi, mije, ire okirọ ifo isi, Awaji môsa me ikeya inyan̄a owu, mè inyan̄a si ebi geelek ìkigban̄ ikọ kwun̄.