Read obolo I Tim 5 Bible Online

I Tim 5 - obolo bible

I Tim 5

¹Kakigana ikọ ìnyi ebi ugane ebirieen̄, kitumu ikọ ususuk nyi ema geelek kubọk ìre nte kwun̄. Mọnọ ebi nsabọn irieen̄ kubọk ebi ngwan̄ kwun̄ ebirieen̄.

²Mọnọ ebi ugane ebibaan̄ kubọk ebi nga kwun̄, mè mọnọ si ebi nsabọn ibaan̄ kubọk ebi ngwan̄ kwun̄ ebibaan̄, kakaan̄ ijo ulọk geege ofolek kiban̄ me ejit kwun̄.

³Sa ulibi ògbegbe nyi ebi nwakpa geelek ekakaan̄ge ebi ìkikpọ ema chieen̄ me lek.

⁴Ire nwakpa ikaan̄ bọn mè ìre bọn bọn, nsabọn cha ekpukpo ebi ìsasa ema inu inyọn̄, kubọk ebi ìsasa ema inu inyọn̄ ekpukpobe ema, mè esa me ikeya edasi ebene me uwu kiban̄ ekerọ inu ichechieek kiban̄ okido ibe ema erọ enyi ebi uwu kiban̄. Eyi ìre inu Awaji okiweek.

⁵Nwakpa geelek ikakaan̄ge ogwu òkikpọ ọmọ chieen̄ me lek ìkitoon̄ ejit me lek Awaji, mè ikiriaak uriaak ibeek ntap-ubọk me ubọk Awaji eririeen̄ mè ikarek.

⁶Ire, nwakpa geelek òsasa lek kan̄ inyi utop linyọn̄ mè ubene ugwem, nwakpa keya ìkwukwu isan̄a, ubọk geelek îkupbe me ugwem.

⁷Nyi otutuuk ene nteme keyi, inyi ema ekerọ inu òtatat, mè otu ene ikakire ema lek.

⁸Ene geelek ikakpọge chieen̄ me lek ebi uwu kiban̄, ògak ge ebi ototun̄ ukan̄ kan̄ gaalek, ene ya îjit ichechieek îchieekbe me lek kè Jisọs Karais. Ene ya si îfieek igak ogwu ikachieekge me lek Awaji.

⁹Kamọnọ nwakpa geege ìtap me otu ifuk ebi nwakpa, îtata ìkakan iraka akọp acha gweregwen, mè ire ogwu ikatelege ogwu olom, mè ìsi ugan.

¹⁰Isan̄a me ikeya, nwakpa ogwu ebetap erieen̄ môre si ogwu eriọọn̄be mije ata ubọk ikwaan̄ kan̄, kubọk ikwaan̄ ikpọkpọ ebi bọn isibi me ubọk ògbegbe, mè isasa ata ubọk ibọkọ ebi ichen itap me uwu kan̄, mè igwọgwọk ukot ebi ntitiin̄ Awaji, mè itatap ubọk inyi ebi ìkup me emen ufialek, mè irọrọ inu geelek òrere ata inu me otutuuk ugwem kan̄.

¹¹Ire, ebi nwakpa geelek ekarege ebi ugane, kafuk ìtap me otu ifuk ebi nwakpa, mije, ulọk olom isimin me emen kiban̄, ema mêsi ibat olom, mè itele Karais ogwu ema echieekbe use isisi ikwaan̄ inyi me otutuuk ugwem kiban̄.

¹²Sa me ikeya, Awaji môtip ema oyerebet, mije ema efiatbe use ya ema echieekbe me ibebene mgbọ etapbe ema me otu ifuk ebi nwakpa.

¹³Ìkarere eya gaalek, ema mêkọt ikana ugbek, mè ikijijen̄e isotu uwu ene. Isan̄a me lek irere ugbek, ike ekijijen̄e ikana cha, mêkikpa ene, mè ikitap chieen̄ me lek inu ebi ofifi ene, mè ikitumu ikọ ikagbege ibe etumu.

¹⁴Eya orọ, nteme n̄a ìre, ogwu nwakpa geelek ikarege ugane, isi ikaan̄ olom, mè imaan̄ bọn, mè ikpọ chieen̄ me lek uwu kan̄, inyi ogwu ochicha ya ikasa me lek kan̄ ìkaan̄ inu ìbosa itumu eji ifiat.

¹⁵Îkaan̄ usini ojelek ebi nwakpa chi ebi ìwuwuuk lek inan̄a irọn̄, mè ikana igọọk Yọk.

¹⁶Ire enenwaan̄ geelek òchechieek me lek kè Jisọs Karais ikaan̄ ebi nwakpa me ototun̄ ukan̄ kiban̄, ogwu enenwaan̄ ya ikikpọ chieen̄ me lek ebi nwakpa kecha, mè ufialek keya ikakeme ebi ntitiin̄, inyi ebi ntitiin̄ ekọt ekpọ chieen̄ me lek ebi nwakpa ebi kpekaan̄ ebi ìbekikpọ ema chieen̄ me lek.

¹⁷Ebi ugane ntitiin̄ geelek ìsisi ikwaan̄ kiban̄ ijaan̄, îgbe ibe ekpe ema mkpukpe kiban̄ irek iba, mè enyi ema ulibi si irek iba, ògak ge ebi ikwaan̄ kiban̄ orebe itutumu ikọ Awaji mè ijejeen̄ ikọ Awaji,

¹⁸mije, ege me Ikpa Mbuban ibe, “Katobo otu eriembuuk ìchit me mgbọ îkijak mfufe isan̄a me lek akpa,”[1] mè ige si ibe ke ogwu òsi ikwaan̄ îgbe ibọbọkọ mkpukpe ubọk ikwaan̄ kan̄.[2]

¹⁹Kagban̄ ikọ geege etumube ikeme ogwu ugane ntitiin̄ geege, îtata ebi ata-ikọ iba mè ìre ita enenirọ ikọ ya ijot.

²⁰Ire ogwu ugane ntitiin̄ irọ ijo inu, kup me isi otutuuk ebi ntitiin̄ Awaji gana ikọ nyi, inyi ebi ugane ntitiin̄ kechilọ emun̄, mè etet ukpook.

²¹Me isi Awaji, mè isi kè Jisọs Karais, mè isi ebi osat Awaji ìkup me mbuban ke nkitumu inyi owu ibe, sun̄ nteme kechi nnyibe owu, mè kagọọk ene geege ìkeke, kagobo si ene geege isi.

²²Kakigwat lek ìtoon̄ ene ubọk me ibot ìsa ìrọ ogwu ugane ntitiin̄, inyi okamọnọ ogwu ikatatge, mè ìsa me ikeya ìkaan̄ uche me lek ijo inu geelek îrọbe. Sun̄ lek kwun̄ tana me isi Awaji.

²³Kayaka ìkinwọ mudim gaalek, kinwọ si sọntiik miin̄ gbaalek, mije owot kwun̄ melek orukan̄ òkisisaak owu mgbọ geelek.

²⁴Osikirọ inu melek ebi ene, riọọn̄ ibe ke ìkare ijo inu otutuuk ene ekirọ okikpọk mbum ìkike me chieen̄ ene. Echi usini ene môkọt ilet ikam mege ire mgbọ ebesibi ife cha oyerebet me ibot. Sà echi usini ene okikpọk mbum me ujọn̄ọ mgbọ sabum ebenisisibi ema oyerebet me ibot.

²⁵Ikeya si, ata inu ìkakilọlọ isisibi utoon̄. Echi ikasisibige utoon̄ si, kpekikọkọt ilet.