Read obolo I Tim 6 Bible Online

I Tim 6 - obolo bible

I Tim 6

¹Ebi geelek ìrere ebi usun̄, ekenyi ebi nte uwu kiban̄ òjot òjot ulibi ògbegbe, inyi ene geege ikagọọk me lek kiban̄ mè ìtumu ijo usem ìbak erieen̄ Awaji melek ikọ Awaji eyi eji ekijeen̄.

²Ebi usun̄ geelek ebi nte uwu kiban̄ erebe ebi ìchechieek me lek kè Jisọs Karais, ekamọnọ ibe ke ema mè ebi nte uwu kiban̄ mîkana ngwan̄ ngwan̄ me emen kè Karais, mè ìsa me ikeya ìtele inyinyi ema umin ògbegbe. Kpan̄asi ikeya, ema esi ikwaan̄ enyi ebi nte uwu kiban̄ cha egak ike ema ewuukbe lek ikisi, mije, ebi ikwaan̄ kiban̄ okinin̄ oruru inyi ìre ebi ìchechieek me lek kè Jisọs Karais, mè ire si ebi ema emabe. Nteme kechi ke owu môkijeen̄ ebi ntitiin̄ Awaji ebi ìrere usun̄, mè ikitumu inyi ema ibe ekerọ.

³Ene geelek ònunu inijeen̄ esese inu, mè ijit ata ijejeen̄ eyi Okaan̄ kiji Jisọs Karais, mè ijit si ikọ Awaji eyi eji ekijeen̄,

⁴ene ya ìre ogwu ugumulek, ìkariọọn̄ inu geege. Ene ya ìre ogwu òkima ifan̄a mè ikekigbini ikọ. Igbini-ikọ chi ìkitap ijo ejit, mè ibaak, mè itutumu ene ifiat, mè ijo una utoon̄-ejit, me lek ene,

⁵mè ikitap si okput mgbọ geelek me etete ebi ene ebi ejit kiban̄ ofiatbe isan̄a, ebi atikọ geege ikakupge me emen kiban̄, ebi ìkikeek ibe ke oniin̄ ikọ Awaji ìre oniin̄ mêsabe ibọọn̄ ubọọn̄.

⁶Oniin̄ ikọ Awaji ìkekitap ene ikpele ubọọn̄, mè ire inu ene okaan̄be ijot ene chieen̄.

⁷Mije eji kpesa inu geege inu me linyọn̄, ikeya si, eji kpebesa inu geege inan̄a me linyọn̄ isibi.

⁸Eya orọ, ire eji ikaan̄ inorie mè inu eji mêkisa ichit akpa lek, eya îso eji.

⁹Ebi ìkiweek ibọbọọn̄ ubọọn̄ ekirọn̄ inin̄ me uleke, mè erọn̄ ènin̄ emen ufe eyi burubut ulọk, eyi môkọtbe itap ema unan me lek, mè otaba ema otap me emen ichep mè mfiat.

¹⁰Ulọk ebek ikpoko ore ugwun̄-ijọn̄ ge eyi ijo inu geelek okinan̄a me lek itibi isibi. Usini ebi ìchechieek me lek kè Jisọs Karais mîgọọk ulọk ebek ikpoko mè itele ichechieek kiban̄, mè isa me ikeya itap ufieejit igak lek kiban̄.

¹¹Ire, owu ogwu eyi Awaji, san̄a lek kwun̄ me lek otutuuk inu chi. Libi gọọk ata irọrọ. Kaan̄ ukpook Awaji, mè ichechieek, mè imumechieen̄, mè ukarajit, mè kirọ inu esuuk esuuk.

¹²Tim ubọk geelek okọtbe, inyi ichechieek kwun̄ ikeke inye, mije, ikeya otat. Sa me ikeya bọkọ ugwem ikakaan̄ge itata ya eyi Awaji ogwenbe owu itap me emen mgbọ otumube ichechieek kwun̄ isibi ubọk ògbegbe me isi ogbogbo ebi ata-ikọ.

¹³Mgbọ yi, me isi Awaji ogwu òkinyi inu geelek ugwem, mè isi kè Jisọs Karais ogwu òkekeke inye itumu atikọ isibi ubọk ògbegbe me isi kè Pọntiọs Pailet, ke nkinyi owu ida ibe owu,

¹⁴sun̄ ikan chi, me oniin̄ eyi ikakaan̄ge nrọ-nlọ geege eyi ebi ene mêsabe itiik owu otu, mege ire usen Okaan̄ kiji Jisọs Karais môkanabe isibi.

¹⁵Ikakana isibi kan̄ yi ìbore inu Awaji oborọ me mgbọ òneneme ọmọ, ọmọ Awaji ogwukaan̄ itọn̄, ogwu ọmọ gaalek orebe Ogwu Ibot Mkpulu, mè Ubọọn̄ ebi ubọọn̄, mè Òkaan̄ ebikaan̄-ene.

¹⁶Ọmọ gaalek ore ogwu kpokwube mkpa, ogwu òluluk me emen utoon̄ eyi kpekikọt ire lek, ogwu ene geege ìkararak ìmun̄, ogwu ene geege ìkpokọkọt si imun̄. Kè umin mè unye ikup inyi ọmọ ire mgbọ geelek! Ikup ikeya!

¹⁷Tumu nyi ebi geelek ìbọbọọn̄ ubọọn̄ me linyọn̄ keyi ibe ekasa inu ubọọn̄ kiban̄ ìgugo lek, mè ekasasa si ìtoon̄ ejit, mije, inu ubọọn̄ chi ìkinu chereyi, mè ofo iyakwut. Kpan̄asi ikeya, ema etoon̄ ejit me lek Awaji ogwu òkinyi eji ogbogbo inu geelek ibe eji ekesa ebele lek kiji ejit.

¹⁸Tumu nyi ema ibe ekenwọn nnwọn melek ebi ene, mè ekerọ ata inu mgbọ geelek, mè ekechili ubọk, mè ekekaan̄ ejit icheche inu kiban̄ inyi ene.

¹⁹Ire ema ikirọ ikeyi, ema mêkititiin̄ inu ubọọn̄ isun̄ inyi lek kiban̄, eyi môkupbe inyi ema kubọk ewuuk irak uwu ònyenye, me mgbọ òkup me isi. Ikeyi ke ema ebesa ikọt ikaan̄ ugwem eyi òrere ugwem me atikọ.

²⁰Timọti, gbala chieen̄ kpọ inu Awaji osabe itap owu me ubọk ibe owu òkpọ. San̄a lek kwun̄ me lek iseseme usem echi ìkakinyi Awaji umin. San̄a lek kwun̄ si me lek burubut ikọ eyi ebi ene ekitumu ikeme atikọ, mè ikifiaan̄ igwen ibe ìre “ifuk-ibot.”

²¹Usini ene ekigugo lek ibe ke ema mîkaan̄ “ifuk-ibot” yi, mè isa me lek keya ijit ichechieek me lek kè Jisọs Karais. Atata nnwọn eyi Awaji ikup inyi enyi!