Read obolo Iburu 7 Bible Online

Iburu 7 - obolo bible

Iburu 7

¹Melikisedek yi ore ogwu ubọọn̄ ama Salem, mè ire si ogwu ngwugwa inyi Awaji Ogwu Òbebene Ichit. Mgbọ Ebereyam otimbe akọn̄ ikpan̄ ebi ubọọn̄ isan̄a, mè ikigwu ikom ika, Melikisedek onenichichini ọmọ, mè igbana ọmọ.[20]

²Ebereyam onyinyi ọmọ irek ge me etete akọp irek me lek otutuuk inu îkpulube me akọn̄ isa ika. Adasi erieen̄ kan̄, òrere Melikisedek ìsibi “ogwu ubọọn̄ ata irọrọ.” Erieen̄ kan̄ eyi òso iba, òrere “ogwu ubọọn̄ Salem” ìsibi “ogwu ubọọn̄ esuuk.”

³Kpunu mfufuk geege egebe ofolek ogwu ute, mè ìre ogwu uga, mè ìre imaman kan̄ mè mkpa kan̄. Ọmọ ìbet lek Gwun̄ Awaji, mije ọmọ orebe si ogwu ngwugwa ire mgbọ ikakaan̄ge itata, kubọk Gwun̄ Awaji orebe.

⁴Ìfat ìkpọ-nu ojelek ogwu ilile ene ya orebe! Ebereyam nte kiji ukot ikaan̄ me lek kan̄ înyi ọmọ irek ge me etete akọp irek me lek otutuuk inu îkpulube me akọn̄ isa ika!

⁵Ikan kè Mosis înyi bọn otoko kè Libai, ebi ìrere ebi ngwugwa, unye ibe ekebọkọ irek ge me akọp irek me ubọk ebi Ijeren, ebi ìrere ebi ngwan̄ kiban̄ gaalek, ubọk geelek ebiba si erebe bọn owot iman kè Ebereyam.

⁶Melikisedek ìkanan̄a me otoko kè Libai, ire, îbọkọ irek ge me etete akọp irek me ubọk kè Ebereyam, mè igbana Ebereyam ogwu Awaji ochieekbe use.

⁷Îre ogwu òbebene me irek okigbana ogwu òsisiki me irek, eya kpunu ifan̄a me lek.

⁸Me lek ebi otoko kè Libai, îre ebilene ikike ebi kpekifuk ugwem ekibọkọ irek ge me etete akọp irek yi. Ire, me lek kè Melikisedek, îre ọmọ, ogwu Ikpa Mbuban okitumu ibe ke ọmọ òwa me ògat ugwem, obọkọ irek ge me etete akọp irek ya.

⁹Mêkọt itumu ibe ke Libai ogwu òkibọkọ irek ge me etete akọp irek, îkpe irek ge me etete akọp irek sa me ubọk kè Ebereyam.

¹⁰Mije, mgbọ Melikisedek ochichinibe Ebereyam, eji mêkọt itumu ibe ke Libai òwa me emen lek kè Ebereyam nte ogwu ute ukot ikaan̄, mije, kpemaman ọmọ nu.

¹¹Awaji ìnyi ebi Ijeren Ikan ikpọ me lek ebi ngwugwa ìnan̄a me otoko kè Libai. Ire ke ikwaan̄ ebi ngwugwa ebi otoko kè Libai mokirọ inyi ene inwọn isan̄a, ìre ìjeje iyaka inikup me uyọt ibe ofifi ogwu ngwugwa òje me ọgbọn̄ kè Melikisedek inu, kpan̄asi ogwu ọgbọn̄ kè Erọn ogwu otoko kè Libai?

¹²Mije, mgbọ geelek enwenebe ọgbọn̄ ebi ngwugwa, mênwene si ikan.

¹³Okaan̄ kiji, ogwu ekitumu ikọ yi ibak, ìre ogwu ofifi otoko. Kpunu ene geege me otoko kiban̄ òrarak ikifaka mfaka me inyọn̄ ntook kubọk ogwu ngwugwa.

¹⁴Otutuuk ene mîriọọn̄ ibe ke Okaan̄ kiji ìnan̄a me otoko kè Juda. Mgbọ Mosis okitumu ikọ ofolek ebi ngwugwa, ìkabak otoko kè Juda.

¹⁵Ibot ikọ kiji îsibi utoon̄ mgbọ keyi igak otutuuk mgbọ, mije inunu ofifi ogwu ngwugwa òje me ọgbọn̄ kè Melikisedek onube.

¹⁶Ìkare me ìrot eyi owot iman ke ọmọ osa ikana ogwu ngwugwa, kubọk îkupbe me ikan mè orọmijọn̄. Ire, ọmọ ìkana ogwu ngwugwa sa me unye eyi ugwem kan̄ eyi mkpa ikakọtge ìkpan̄.

¹⁷Mije, Ikpa Mbuban ìtumu ibe, “Owu ìre ogwu ngwugwa ire mgbọ ikakaan̄ge itata igọọk me ọgbọn̄ kè Melikisedek.”[21]

¹⁸Me mgbọ keyi, Awaji îkana oka ikan mè orọmijọn̄ cha ito, mije, ìkakaan̄ unye, melek si, ìkakaan̄ oruru ìnyi ebilene.

¹⁹Ikan kè Mosis ìkakọt ìrọ inyi inu geege inwọn isan̄a. Eya orọ, Awaji îsa ayaya ikpọchieen̄ inu, eyi môsabe eji ijuuk igbet ọmọ lek.

²⁰Ofifi esese inu òkup me lek keyi ìre ikeyi: Awaji înyan̄a ibot! Kpenyan̄a ibot geege mgbọ erọbe ebi otoko kè Libai ebi ngwugwa.

²¹Ire, mgbọ Awaji orọbe Karais ogwu ngwugwa, înyan̄a ibot, mè itumu ibe, “Okumugwem înyan̄a ibot, ìkponwene ejit. Owu ìre ogwu ngwugwa ire mgbọ ikakaan̄ge itata!”[22]

²²Sa me ikeyi, Jisọs îkana ogwu nsọọn̄ isasa irọ ayaya inyan̄a-ibot yi inye. Ayaya inyan̄a-ibot yi înwọn igak eyi oka.

²³Îkaan̄ si ofifi esese inu òkukup. Ebi ngwugwa kechilọ mîwa enenen, mije, mkpa ìkakitele inyi ema ekup ejọn̄ọ mgbọ me irek ikwaan̄ kiban̄.

²⁴Ire, mije Jisọs òwa me ugwem ire mgbọ ikakaan̄ge itata, ọmọ môre ogwu ngwugwa ire mgbọ geelek, kpebeyaka ito ofifi ene me irek kan̄.

²⁵Eya orọ, ebi geelek ìnunu me lek Awaji sa me lek kè Jisọs, Jisọs môkọt inyan̄a ema otutuuk ene òjot òjot, mije, ọmọ ìkukup me ugwem mgbọ geelek ikibeek Awaji mbeek me ibot kiban̄.

²⁶Me atikọ, îre ojelek ogwu òban Awaji òkup ikeyi ke eji ekiweek, ogwu môkọtbe irọ otutuuk inu òkup eji me uyọt. Ọmọ ìre ogwu òkup me mbuban, kpunu nrọ-nlọ geege me emen kan̄. Ọmọ îtana isan̄a. Awaji îmọnọ ọmọ isan̄a me etete ebilene ebi ìkirọ ijo inu, mè isun̄ ọmọ esese, mè ibene ọmọ isaba iraka emen inyọn̄ ifo ere òbebene ichit.

²⁷Ebi ngwugwa kechilọ ekigwa ngwugwa egwe geelek. Ema ekidasi igwa ngwugwa mije ijo inu eyi kiban̄, sabum ènegwa si mije ijo inu ebi ofifi ife. Ire, ìkakup ikeya me lek kè Jisọs, mije, ọmọ ìgwa mgbọ ngwugwa ge gaalek mije ijo inu otutuuk ebilene. Mgbọ ngwugwa ge ya îsabe lek kan̄ igwa inyi Awaji îso otutuuk ene ire otutuuk mgbọ.

²⁸Ubọk Ikan kè Mosis osun̄be, îre ebilene ikike ebi kpekaan̄ unye geege ke ekigobo isa irọ ogwu òban Awaji. Ire, inyan̄a-ibot Awaji onyan̄abe, eyi ònunu me udun̄ Ikan kè Mosis, onenigobo Gwun̄ Awaji ogwu ònwọnwọn isan̄a ire mgbọ ikakaan̄ge itata, mè isa ọmọ irọ ogwu òban Awaji.