Read obolo I Pita 2 Bible Online

I Pita 2 - obolo bible

I Pita 2

¹Eya orọ, ìtele njijọ ejit, mè ofiaan̄, mè isi iba, mè chieen̄ ile, mè itutumu ene ifiat.

²Kubọk nsabọn emanbe ayaya ekito ito iweek mun̄ ebe, ikeya si, enyi ìkiweek atalek mun̄ ebe eyi ekwukwu, eyi òrere ata ikọ Awaji eyi kpunube ataak geege me emen, inyi enyi enan̄a me lek ikọ ya ekemiin̄ me emen unyan̄a eyi enyan̄abe enyi,

³me mgbọ keyi enyi etọbe ikpọ, mè imun̄ ibe ke Okaan̄-ene înwọn.

⁴Ìna me lek kè Karais ogwu òrere ewuuk òkup me ugwem. Ebilene ejijit ọmọ, ire, îre ọmọ ke Awaji ogobo inyi lek kan̄. Ọmọ înye otu ewe me isi Awaji.

⁵Mgbọ keyi enyi mîkana ewuuk inama-uwu òkup me ugwem. Ìsa lek kinyi ìnyi, mè Awaji inama enyi kubọk uwu eyi Ekwukwu Mbuban, mè enyi ekana ebi ngwugwa ìkup mbuban, mè ekegwa ngwugwa eyi Ekwukwu Mbuban eyi Awaji okibọkọ itap inan̄a me lek kè Jisọs Karais.

⁶Mije, ege me Ikpa Mbuban ibe, “Kpọ, nra igobo ewuuk unye otu ewe ge itap me ijọn̄ me Sayọn, isa irọ atà ibot uwu. Ene geelek òtotoon̄ ejit me lek kan̄ ìkporie esip kubọk ge.”[3]

⁷Eya orọ, me lek kinyi ebi ìchechieek, ewuuk yi înye otu ewe enenen. Ire, me lek ebi ekachieekge, Ikpa Mbuban ìtumu ibe, “Ewuuk eyi ebi ìnama uwu ejitbe, ọmọ oyaka inikana atà ibot uwu.”[4]

⁸Ikpa Mbuban îtumu si ibe, “Îre ewuuk keyi ke ebi ene ekitọbọ ukot me lek. Ọmọ si ore ewuuk òkirọ inyi ema enan̄a erọn̄.”[5] Ewuuk yi ìkirọ mè ebi ene enan̄a erọn̄, mije, ema kpegban̄ utọn̄ me lek ikọ ya eyi etumube inyi ema. Îre ikeya ke Awaji osun̄ inyi ema.

⁹Ire, enyi ìre ebi Awaji ogobobe isibi inyi lek kan̄. Enyi ìre ebi ngwugwa ogwu ubọọn̄, mè ire si ido òkup me mbuban. Enyi ìre ebi Awaji okaan̄be. Awaji ìgobo enyi, inyi enyi ekelook ebi ene etip ofolek ikwaan̄ ukechieen̄ kan̄, ọmọ ogwu ògwegwen enyi isibi me emen udun initap me emen ikpele uyeke uyeke utoon̄ kan̄.

¹⁰Me mgbọ òraraka, enyi kpere ebi eyi Awaji. Ire, me mgbọ keyi, enyi ìre ebi eyi Awaji. Me mgbọ ya, enyi kpekaan̄ uche me lek nsan Awaji. Ire, me mgbọ keyi, Awaji îkaan̄ ejit nsan me lek kinyi.

¹¹Atata bọn Nte n̄a, enyi ìre ebi ije mè ebi ichen me linyọn̄ keyi. Eya orọ, soso, nriaak enyi, ìsan̄a lek me lek ijo ulọk echi òkitim akọn̄ ikeme ibot ejit kinyi.

¹²Ìluk ugwem òtatat me etete ebi ekachieekge, inyi, ubọk geelek ema mêkitumu ikọ itoon̄ enyi ibe ke enyi ìre ebi ìkirọ ijo inu, ema ekemun̄ ata inu enyi ekirọ, mè etọn̄ Awaji me usen Awaji mônube inikpe ebilene mkpukpe ubọk ikwaan̄.

¹³Mije Okaan̄-ene, soso ìkisiki ibot ìnyi ebi ibot mkpulu geelek ebilene esan̄abe ito. Ìkisiki ibot ìnyi ogwu ubọọn̄, kubọk ogwu ibot mkpulu ogwu òbebene ichit.

¹⁴Ìkisiki si ibot ìnyi otutuuk ebi ibot mkpulu me ido geelek, ebi ogwu ibot mkpulu òbebene ichit onyibe unye ibe ekesulu ebi geelek ìrọrọ ilọ osusut, mè eketọn̄ ebi geelek ìkirọ inu òtatat.

¹⁵Awaji ìkiweek ibe enyi ekerọ ata inu esa erọ inyi ebi burubut, ìkitumu ikọ una ifuk-ibot, echit otu.

¹⁶Ìluk ugwem kubọk ebi ìkakaan̄ lek kiban̄. Ire, ikasa irek ikaan̄-lek ya ìchit lek ìkirọ inu ikatatge. Kpan̄asi ikeya, ìkiluk ugwem kubọk ebi usun̄ eyi Awaji.

¹⁷Ìkinyi otutuuk ene ulibi ògbegbe. Ìkimun̄ otutuuk bọn Nte me chieen̄. Ìkitet ukpook Awaji, mè ìkinyi ogwu ibot mkpulu òbebene ichit umin.

¹⁸Enyi ebi usun̄, ìsa me ulibi ìsiki ibot ìnyi ebi nte uwu kinyi. Ìkare ebi ìkakaan̄ ata ejit mè ikimọnọ ene gaalek, ìkisiki ibot si ìnyi ebi ìkirọ enyi nnaan̄, mè ikigana ikọ inyi enyi.

¹⁹Mije, Awaji îkibele ejit me lek ebi geelek ìkibak me lek kan̄ ikat ejit ikibọkọ osusut eyi ikagbege.

²⁰Ìre kpasi oruru ke enyi ebekaan̄, ire enyi ikat ejit ibọkọ osusut mije ijo inu enyi erọbe? Ire, ire enyi ime osusut ebi ene esutbe enyi mije ata inu enyi erọbe, Awaji môbele ejit me lek kinyi.

²¹Îre ojelek osusut òkup ikeyi ke Awaji ogwen enyi ibe enyi enebọkọ. Mije, Karais me lek kan̄ îbọkọ osusut mije kinyi, inyi enyi esa me lek kan̄ ekween̄ inu, mè ekegọọk me akpat ukot kan̄.

²²“Karais ìkarọ ijo inu geege. Ikọ ataak geege ìkanan̄a si me otu kan̄ ìsibi.”[6]

²³Mgbọ ebi ene etumube ikọ unyechieen̄ inyi ọmọ, ọmọ ìkatumu si ikọ unyechieen̄ ìnyi ema me useen̄. Mgbọ îkibọkọ ufialek mkpa, ìkagana ikọ ìnyi ene geege. Kpan̄asi ikeya ìkakana otutuuk ufialek kan̄ itap me ubọk Awaji ogwu òkisibi unen oyerebet.

²⁴Karais me lek kan̄ osa akpalek kan̄ ibeme otutuuk ijo inu kiji me inyọn̄ uti nkwurieen̄, inyi eji ekwaan̄ etele ijo inu, mè eyaka eneluk ugwem eyi ata irọrọ. Unan cha etapbe ọmọ me lek ke esa igwa eji.

²⁵Mije, me mgbọ òraraka, enyi ekup kubọk arọọn̄ òlọlọ oniin̄. Ire, me mgbọ keyi, enyi mîyaka igwu ikom ika inu me lek ogwu Òkpukpo Arọọn̄ ya, Ogwu Òkikpọ Chieen̄ me lek ibot ejit kinyi.