Read obolo I Pita 3 Bible Online

I Pita 3 - obolo bible

I Pita 3

¹Ike yaage si, enyi ebi ìrere nwa, ìkisiki ibot ìnyi ebi nlom kinyi, inyi usini kiban̄ ebi ekachieekge me lek ikọ Awaji egwu ekom enechieek nan̄a me lek ugwem enyi ebi nwa kiban̄ ekiluk, me enyi ekatumuge ikọ geege ìnyi ema.

²Mije, ema mêmun̄ ubọk enyi esikibe ibot, mè ikiluk ugwem òtatana.

³Ikachieek ibe uja kinyi ire eyi ònan̄a me lek inu ekisa ibala akpalek, kubọk ikpakpa ijeek, mè isasa alata araran̄ mè ujuja ekwut mè ofọnti ibala lek.

⁴Kpan̄asi ikeya, uja kinyi ire eyi emen ibot ejit, eyi ìkakigwọk ìta, uja eyi ònan̄a me esuuk esuuk ugwem eyi ìkakitap okput. Ojelek uja keyi înye otu ewe enenen me isi Awaji.

⁵Mije, ikeyi ke ebibaan̄ ukot ikaan̄, ebi ìtotoon̄ otutuuk ejit kiban̄ me lek Awaji, mè isun̄ lek kiban̄ me mbuban esa ikibala lek kiban̄, mè ikisiki ibot inyi ebi olom.

⁶Sera ìre ene ge me lek ife cha. Îsiki ibot inyi Ebereyam ogwu olom enenen, mè ike ọmọ erieen̄, ikigwen ọmọ, “Ogwu nte.” Mgbọ keyi, enyi ìre bọn kan̄ ebibaan̄, ire enyi ikirọ inu òtatat me ekatetge ukpook geege.

⁷Ubọk yaage si, enyi ebi ìrere olom, ìluk ìjaan̄ melek ebi nwa kinyi kubọk ebi ìkaan̄ ifuk-ibot, mè ìriọọn̄ ibe ke ema kpenye lek kire enyi. Ìkinyi ema ulibi ògbegbe ema, mije, îre ema melek kinyi egbaan̄ ikaan̄ ugwem ikakaan̄ge itata, eyi Awaji ochebe inyi enyi me ikike. Ìluk me esuuk melek kiban̄, inyi inu geege ikakikput uriaak kinyi.

⁸Me ikakana ikọ n̄a igwook, m̀be enyi, ìluk me ejit ge, mè ìkaan̄ ejit nsan me lek ebi melek kinyi. Ìmun̄ lek kinyi me chieen̄ kubọk ngwan̄ mè ngwan̄. Ìkaan̄ njijin me lek ebi melek kinyi, mè ìkisiki lek.

⁹Ikasa ijo inu ìkpe ijo inu ebi ene erọbe enyi. Ikaan̄ ogwu itiik enyi, ikatiik useen̄. Ire, ìkigbana ebi ìkirọ enyi ijo inu, mije, ikeyi ke Awaji ogwen enyi ibe enyi enerọ, inyi enyi ebọkọ ugbana me ìrot.

¹⁰Mije, ege me Ikpa Mbuban ibe: “Ogwu geelek òmama iluluk ugwem, mè iweek si imumun̄ ata inu me ugwem kan̄, ene ya itele itutumu ijo ikọ, mè itele si ikakan̄ ataak.

¹¹Ene ya itele ijo inu, mè ikirọ ata inu. Ene ya ikiweek esuuk, mè ikaan̄ ulọk me itatap esuuk.

¹²Mije, chieen̄ Okaan̄-ene ìkup me lek ebi ata irọrọ. Utọn̄ kan̄ ìkup òbook ikigban̄ uriaak kiban̄. Ire, Okumugwem ìkakinyi ebi ìkirọ ijo inu isi.”[7]

¹³Ire enyi ikaan̄ ulọk irọrọ ata inu mgbọ geelek, ìre ekene obotap enyi unan me lek?

¹⁴Ire, ìrere enyi ebọbọkọ ufialek mije ata inu enyi ekirọ, Awaji môgbana enyi. Ikachieek ibe ukpook ebilene itet enyi, ikachieek si ibe ejit isisaak enyi.[8]

¹⁵Ire, ìkinyi Karais umin me emen ejit kinyi, mè ìmọnọ ọmọ kubọk Okaan̄-ene ogwu òkup mbuban. Ìkup me mbem lek mgbọ geelek, inyi, ire ene geelek inido enyi inu òrọrọ mè enyi ekaan̄ ikpọchieen̄ enyi ekaan̄be, enyi mêkọt inyi ene ya ufọọk-otu.

¹⁶Ire, ìsisiki lek ìkpa ìnyi ene ya me irak umin. Ikakaan̄ okpa geege me ejit, inyi esip itet ebi geelek ìkitumu ata ubọk irọrọ kinyi ifiat, mije ijo ikọ ema ekitumu ikeme enyi.

¹⁷Ene ibọbọkọ ufialek mije ata inu îrọbe, ire ke îre nkeek Awaji ibe ikup ikeya, ọmọ onwọn igak ibọbọkọ ufialek mije ijo inu ene orọbe.

¹⁸Mije, Karais ìkwu mkpa mgbọ yaage gaalek mije ijo inu otutuuk ebilene erọbe. Ọmọ ogwu ata irọrọ okwu mkpa me ibot ebi ijo irọrọ, inyi ọmọ inan̄a me ikeya isa enyi ijet Awaji. Ebilene ekpan̄ ọmọ me akpalek, ire, Awaji onenirọ inyi ọmọ iluk ugwem me emen Ekwukwu.

¹⁹Îje si me ekwukwu isi ama ekwukwu, isi itumu ikọ Awaji inyi ebi ekwukwu ebi ìkup me mkpọn.

²⁰Ebi ekwukwu chi ìre ebi ìjijit isisiki ibot inyi Awaji me ukot ikaan̄, me mgbọ Awaji omebe ejit ikup, ibene me mgbọ Nuwa obenebe inama uji ọfọ kan̄ ire mgbọ înamabe isan̄a. Ene inen mè inen gaalek enin̄ emen uji ya. Îre ene jeeta gaalek ebi ìninin̄ emen uji ya ke esa mun̄ ya inyan̄a isibi.

²¹Mun̄ ya ìkeke inyi igwook-mun̄ eyi ekisa inyan̄a enyi isibi mgbọ keyi. Igwook-mun̄ yi ìkare igwọgwọk okpa isan̄a me akpalek ikike. Îre use eyi enyi esabe otutuuk ejit kinyi ichieek inyi Awaji, me okpa geege ikakupge enyi me ejit. Ekisa igwook-mun̄ yi inyan̄a ene isibi bak me lek ijojomo me mkpa eyi Jisọs ojomobe.

²²Mgbọ keyi, Karais ìkup me emen inyọn̄, mè isiki ikweek irek me agan̄ ubọk ulom Awaji. Me ere ya îkupbe, otutuuk ebi osat Awaji, mè otutuuk ebi ibot mkpulu geelek, mè ebi unye geelek ìkikpulu me linyọn̄ eyi eji kpesa chieen̄ imun̄, ekisiki ibot inyi ọmọ, ọmọ okekikpulu ema.