Read obolo I Pita 5 Bible Online

I Pita 5 - obolo bible

I Pita 5

¹Nteme keyi ìkup inyi ebi ugane ntitiin̄ Awaji, ebi ìkup me etete kinyi. Emi si ìre ogwu ugane ntitiin̄, mè ire ogwu ata-ikọ ogwu môkọtbe itumu ikọ ofolek ufialek geelek Karais obọkọbe, mè ire si ogwu môgọọkbe Karais ikaan̄ uche me lek ujamgbugbo kan̄ mgbọ eji mêmun̄be ọmọ.

²Ìkikpukpo arọọn̄ Awaji otapbe enyi me ubọk. Enyi kubọk ebi ìkikpọ ema chieen̄ me lek, ìkpukpo ema kubọk Awaji oweekbe. Ìrọ kubọk inu enyi etutumu ifieek me ejit kinyi gaalek, ikarọ kubọk inu etetbe enyi me ubọk unye ibe erọ. Ikasa me ejit ile ìrọ ìsa ìweek ten̄ten̄ oruru. Ìsa me ulọk isisi ikwaan̄ inyi Awaji ìrọ.

³Ikakpọkpọ ìkitọ ikọ ubọk geelek ìnyi ebi ekanabe itap enyi me ubọk. Ire, ìkirọ inu ògbegbe ìjeen̄ bọn arọọn̄ Awaji cha, inyi ema ekekpọ inu me ubọk kinyi erọ.

⁴Ogwu Ibot Ebi Òkpukpo Arọọn̄ isinu, enyi mêbọkọ okpibot ubọọn̄ eyi ujamgbugbo eyi kpogwọkbe ita.

⁵Ikeya si, enyi ebi nsabọn irieen̄, ìkisiki ibot ìnyi ebi ugane. Ìkikaan̄ ugwem isisiki lek me lek ebi melek kinyi, mije, Ikpa Mbuban ìtumu ibe: “Awaji ìkakichieek ìnyi ebi ìkigumu lek, ire, ìkikaan̄ ata ejit me lek ebi ìkisiki lek.”[10]

⁶Eya orọ, ìsiki lek kinyi me irak ikpele ubọk Awaji, inyi ọmọ gaalek ibene enyi ifo inyọn̄ mgbọ mgbọ kan̄ isikem.

⁷Ìkpulu otutuuk uyọrọlek kinyi ìtọp ìgwook ọmọ me lek, mije, îre ọmọ okikpọ enyi chieen̄ me lek.

⁸Ìgwọk chieen̄, mè ìkup me mbem! Ogwu ochicha kinyi, òrere Yọk, òkinya ikana, mè ikigbin kubọk egbe àtat ikiweek ogwu ìbochim itaka.

⁹Ìjit Yọk, mè ìkeke ìnye me emen ichechieek. Mije, enyi mîriọọn̄ ibe ke bọn Nte kinyi me ere geelek me linyọn̄ mêkibọkọ si ojelek ufialek kechi enyi ekibọkọ.

¹⁰Enyi isibọkọ ufialek sọntiik mgbọ, Awaji me lek kan̄, ogwukaan̄ otutuuk atata nnwọn geelek, ogwu òsasa me lek kè Karais igwen enyi itap me emen ujamgbugbo kan̄ eyi mgbọ ikakaan̄ge itata, môkpọk enyi inama, mè ibene enyi igwuun̄, mè inyi enyi unye-lek, mè irọ inyi enyi ekeke enye.

¹¹Ọmọ ke ibot mkpulu okup inyi mege ire mgbọ ikakaan̄ge itata. Ikup ikeya!

¹²Sailas ogwu mmọnọbe kubọk gwun̄ Nte ògbegbe utoon̄-ejit, ọmọ otap ubọk inyi emi me igege sọntiik ikpa yi. Ǹge ikpa yi ikisa itap enyi efuuk me emen, mè ikikeke ata-ikọ inyi enyi ibe ke eyiyi ore atalek atata nnwọn eyi Awaji. Eya orọ, ìkeke ìnye me emen atata nnwọn yi.

¹³Ebi ntitiin̄ Awaji òkup me Babilọn, ìrere bọn Nte kinyi, ebi egbaan̄be ema melek kinyi igobo, mîtọp enyi amọn. Mak, gwun̄ n̄a si îtọp enyi amọn.

¹⁴Ìkat ebi melek kinyi, mè ìtọp ema amọn me imumechieen̄. Esuuk ikup inyi otutuuk kinyi ebi ìkup me emen kè Karais.