Read obolo II Pita 2 Bible Online

II Pita 2 - obolo bible

II Pita 2

¹Ire, me ukot ikaan̄, owuwa ebi nriran ataak mînu me etete ebi kiji. Ikeya si, owuwa ebi ijejeen̄ ataak mêkup me etete kinyi. Ife chi mênween̄ lek ikijeen̄ nlilọ ijejeen̄ òkisa mkpa inu, mè ijit si Okaan̄-ene me lek kan̄ ogwu òfafaka ema isibi me emen mkpa eyi ijo inu kiban̄ osabe ijet ema. Sa me ikeyi, ema mêsa mkpa ekakpọge chieen̄ ijet lek kiban̄.

²Owuwa ene mêgọọk ife chi isi ikiluk ijo ugwem barabat, mè isa me ikeya irọ inyi ebi ene etumu oniin̄ eyi atikọ efiat.

³Mije ulọk ebek ikpoko òkup ife chi me emen, ema mêsa mfufuk ema gaalek esan̄abe isibi inifiaan̄ enyi ifiin̄, mè isa enyi irọ ijọn̄ mbọm kiban̄. Awaji îra ititip ema oyerebet mkpa isan̄a karake mgbọ. Ogwu òbojijaka ema si ìgwọgwọk chieen̄ ikup.

⁴Mgbọ ebi osat me lek kiban̄ erọbe Awaji ilọ, Awaji ìkatele ema. Ìkpukpulu ema itọp itap me ama yọk, mè itap ema mkpọn me emen udọn̄ uga òdudun. Ere keya ke ema ebekup ire Usen Oyerebet Awaji.

⁵Mgbọ ebi ukot ikaan̄ erọbe Awaji ilọ, Awaji ìkato ema nsan kubọk ge. Kpan̄asi ikeya, ìsasa mun̄ ile ikpan̄ otutuuk ebi linyọn̄ mgbọ keya isan̄a kpai, mije ema ekariọọn̄ge Awaji, mè inyan̄a Nuwa ogwu òkilook etip eyi ata irọrọ isibi, ọmọ mè ene jaaba gaalek.

⁶Mgbọ ebi ama Sodọm mè ebi ama Gomora erọbe Awaji ilọ, Awaji ìtitip ema oyerebet mkpa, mè itap ukan̄ iwọp ema mè ama kiban̄ cha ikana ntọn̄, mè isa ema irọ kubọk inu ijejeen̄, inyi ebilene esa eriọọn̄ inu òkukup inyi otutuuk ebi ekariọọn̄ge Awaji.

⁷Ire, Awaji înyan̄a Lọt ogwu ata irọrọ isibi me emen ukan̄ ya. Ugwem barabat ife cha, ebi esip ikakupge me isi ekikaan̄, îsisaak Lọt me ejit enenen.

⁸Mije, eyi Lọt ogwu ata irọrọ okiluk me etete ijo ife cha me usen me usen, mè ikisa chieen̄ imun̄ ijo ugwem ema ekiluk, mè ikinọ si me utọn̄, îkisisaak ọmọ me ejit enenen.

⁹Otutuuk mfufuk chi ìkijeen̄ ibe ke Okaan̄-ene îriọọn̄ oniin̄ îkisa inyan̄a ebi geelek ìkimin ọmọ isibi me emen ntọ-mkpọ, mè iriọọn̄ si ubọk îkisa itet ebi ijo irọrọ isun̄, mè ikisulu ema osusut iban Usen Oyerebet kan̄.

¹⁰Osusut yi ìbonye ichit me lek ebi ìkiluk ugwem igọọk me lek wọlọwọlọ ulọk eyi òkilọk akpalek ijo inu, mè ikikpọ unye eyi Awaji chieen̄ isiki. Ife chi mîkaan̄ chieen̄, mè ikiweek ibe inu geelek ikije ubọk ema ekiweek. Ukpook ìkakitet ema inyenye chieen̄ inyi ebi osat ìkup me irek umin me emen inyọn̄.

¹¹Ebi osat Awaji me lek kiban̄, ebi ìnyenye lek igak ebi ijo ijejeen̄ chi, mè ikaan̄ si efuuk igak ema, kpekitumu ikpak ikpak ikọ ikeme ebi osat ìkup me irek umin cha me isi Okaan̄-ene.

¹²Ire, ife chi ekitumu mbuban ikọ ikeme inu ema ekariọọn̄ge. Ema ekup kubọk anam oron ikike, emaan̄be igwook inyi itetet ikpan̄, kpekaan̄ ifuk-ibot. Ema mêkwaan̄ mkpa si kubọk anam oron.

¹³Ema mêbọkọ ijo inu kubọk mkpukpe me lek ijo inu eyi ema erọbe. Me lek kiban̄, irerie ugwem ìre ibeben ijọk irerie mè inwọnwọ eyi ekito me eririeen̄ inito me chieen̄ ikarek. Ife cha isikigọọk enyi ikup ikirie inorie ubelejit, ema ekikup kubọk okpa me etete kinyi, mè ikitap enyi esip me isi. Mije, otu ema ekisa irie ofiaan̄ ofiaan̄ ugwem kiban̄ ya ke ekisa igọọk enyi irie inorie ya si.

¹⁴Chieen̄ kiban̄ ìkikup me lek ugan-nwa mgbọ geelek. Efuuk ìkakita ema me owot me irọrọ ijo inu. Ema ekileke ebi kpekeke inye me ichechieek itap me emen ijo inu. Ema ìre ebi chieen̄ ile ojotbe emen, ife Awaji ofieekbe otu inyi.

¹⁵Ema mîtele oniin̄ eyi òtatat, mè inyinya ichep, mè ikisi irọ ojelek inu ogwu nriran Balam gwun̄ kè Beyọ orọbe, Balam ogwu òmama irọrọ ijo inu, inyi ọmọ ibọkọ mkpukpe.

¹⁶Ire, inyinya akpan gaalek, òrere anam ikike eyi ìkakitumu ikọ, ogana ikọ inyi Balam me lek ijo inu ìborọ. Inyinya akpan ya ìsa ida ebilene itumu ikọ ikwek ogwu nriran yi, inyi ikakọt ìsi ikwaan̄ ebi iraak ya eyi ìbosi.

¹⁷Ife chi ekup kubọk ogbuuruk mun̄ ochatbe isan̄a me emen, mè ikup si kubọk oduku inyọn̄ eyi efet okiben iwut ikana. Ere òdudun ichit ke Awaji oneen̄ isun̄ iban ema.

¹⁸Ema ekitumu ikpele otu ikọ ikike me oniin̄ eyi burubut, mè ikisa ijo ulọk akpalek eyi barabat ileke ene itap me emen ijo ijejeen̄ kiban̄. Ebi ema ekileke ìre ebi ìkinanan̄a me etete ebi ekariọọn̄ge Awaji isibi.

¹⁹Ema ekichieek use ibe ke ema mêrọ inyi ebi ene ekaan̄ utelelek, me ere ema me lek kiban̄ erebe usun̄ inyi ugwem wọlọwọlọ. Mije, inu geelek òrere nte uwu inyi ene, eya ke ene okire usun̄ inyi.

²⁰Ire ema inwọnọ ugwem wọlọwọlọ eyi linyọn̄ keyi mije ema eriọọn̄be Okaan̄ kiji mè Ogwu Unyan̄a kiji Jisọs Karais, mè ikpọk isa lek kiban̄ isi itap me emen ugwem yaage si, mè itele inyi ikana nte uwu inyi ema, mgburudun̄ mgbọ me ugwem kiban̄ môfieek igak adasi mgbọ.

²¹Ire ema kpemeriọọn̄ oniin̄ eyi ata irọrọ, eya kè ònwọn me lek kiban̄ ogak ema irọriọọn̄ isan̄a, mè itele ikan ya òkup me mbuban eyi ekanabe itap ema me ubọk.

²²Inu keyi òrọrọ ema ìkpọkpọ ije itat me lek urọk ebi ene ekito ibe, “Ibo îgwu ikom isi ilaka igbọ eyi îgbọbe,”[2] melek eyi ekito si ibe, “Okodi ekenbe mun̄ isan̄a, îgwu ikom isi ikifufuku lek me emen ibat.”