Read obolo II Pita 3 Bible Online

II Pita 3 - obolo bible

II Pita 3

¹Atata bọn Nte n̄a, òso ikpa iba ire eyi nkige ijet enyi. Ikpa iba chi ngebe, ǹge isasa ikeek enyi inu chi enyi ewuukbe lek inọ, inyi enyi ekekeek ata ekiket ofolek.

²Ìkeek ikọ ebi nriran ìkup me mbuban etumube me ukot ikaan̄, mè ikan eyi Okaan̄ kiji òrere Ogwu Unyan̄a kiji Jisọs Karais onyibe enyi sa me ubọk ebi otuchieen̄ kan̄.

³Adasi kan̄, ìriọọn̄ ibe, me òta mgbọ, ke ebi ìkiluk ugwem igọọk me lek ijo ulọk eyi akpalek kiban̄ mênu. Ema mêchak enyi ochak enenen,

⁴mè ikitumu ibe, “Mgbọ Jisọs obe ke ọmọ môkpọk inu ya ye! Ìre keke orọ ikanuge mege inire mgbọ keyi? Ebi nte nte kiji mînu, mè ikwaan̄ isan̄a, otutuuk inu ìkpọkpọ ikije inyi isi ubọk îkupbe karake Awaji orombe linyọn̄!”

⁵Ire, ife chi mîjit irọriọọn̄ ibe, bene me ibebene, ke Awaji ìsa ikọ otu kan̄ gaalek irom inyọn̄ mè ijọn̄. Linyọn̄ keyi ìnan̄a me emen mun̄ itibi isibi. Mun̄ ke Awaji osa irom linyọn̄ yi.

⁶Mun̄ si ke Awaji osa ichep linyọn̄ me ukot ikaan̄.

⁷Ikọ yaage si ke Awaji osa itet isinyọn̄ mè linyọn̄ mgbọ keyi ikaan̄ iban mgbọ ukan̄ obotaka ema iriọk me Usen Oyerebet Awaji. Awaji ìkisun̄ ema iban Usen Oyerebet kan̄ ya, mgbọ ìbokpan̄ ebi ekariọọn̄ge ọmọ.

⁸Ire, atata bọn Nte n̄a, ikawuuk ibot ikọ ge keyi: Me lek Awaji, usen ge ìkup kubọk obop acha ge, obop acha ge ìkup si kubọk usen ge.

⁹Ìkare kubọk Okaan̄-ene ìkifafiat mgbọ me irọrọ use eyi îchieekbe ibe ke ọmọ môgwu ikom inu iso, kubọk usini ene ekimọnọ ibe ke îfiat mgbọ. Ire, ìsa mije ukarajit îkaan̄be me lek kinyi itaba mgbọ ya ijọn̄ọ, mije, ìkiweek ibe otutuuk ene egwu ekom. Ìkaweek ibe ene geege ichep.

¹⁰Ire, Usen Okaan̄-ene obonu ìbokana isibi me uwuuk-lek kubọk ogwu inọ. Me usen ya, akpabin inyọn̄ môsa me ida uga okput ininiin̄ ita, ìkpoyaka ikup. Ukan̄ môkala inu geelek òkup me isinyọn̄, mè itaka ema otutuuk iriọk. Linyọn̄ keyi mè otutuuk ikwaan̄ geelek esibe me emen kan̄ môkpọk mbum, mè ikup njak.[3]

¹¹Eyi Awaji obofiat otutuuk inu geelek isan̄a ikeyi, ìre kpasi ugwem ogbe ibe enyi eluk? Îgbe ibe enyi eluk ugwem eyi òkukup me mbuban, mè ikinyi Awaji umin.

¹²Ìkiluk ojelek ugwem òkup ikeya ìsa ìkikup ìkpọ inunu eyi Usen Awaji obosibi oyerebet me ibot linyọn̄,[4] mè ìsa ìkirọ si inyi Usen ya igwat lek inu. Usen ya ke akpabin inyọn̄ obotaka iriọk me ukan̄, otutuuk inu òkup me isinyọn̄ môkakala, mè itaka iriọk me ukan̄ ya si.

¹³Ire, eji ekikup ikpọ inu Awaji ochieekbe me use, òrere ayaya isinyọn̄, mè ayaya linyọn̄ ere ebi ata irọrọ ebeluk isun̄ ama kiban̄.

¹⁴Eya orọ, atata bọn Nte n̄a, mije enyi ekikpọ chieen̄ mgbọ inu chi oborọ iso, ubọk geelek enyi ekọtbe, ìluk ugwem eyi ikakaan̄ge okpa geege mè nrọ-nlọ geege me emen, mè ìluk me esuuk melek Awaji.

¹⁵Ìtet ibot! Ikawuuk ibe ke Okaan̄ kiji ìkikaan̄ ukarajit me lek kinyi, inyi enyi egwu ekom, mè ekaan̄ unyan̄a. Inu yi si ke atata gwun̄ Nte kiji, Pọọlu, osa me iriọọn̄-inu Awaji onyibe ọmọ ige me emen ikpa ijet enyi.

¹⁶Ubọk yaage ke Pọọlu okige me emen otutuuk ikpa kan̄ mgbọ geelek îkige ikpa ofolek inu chi. Usini inu îkige me emen ikpa kan̄ ìre inu òkiyọyọt ikọkọt igobo itet. Echichi ore inu ebi ekakaan̄ge iriọọn̄-inu mè ebi ekakekege ìnye me ata ijejeen̄ ekiwuwọlọ kubọk ema ekiwuwọlọ owuwa inu egebe me Ikpa Mbuban. Sa me ikeyi ke ema ekisa mkpa ijet lek kiban̄.

¹⁷Eya orọ, atata bọn Nte n̄a, kubọk enyi ewuukbe lek iriọọn̄ otutuuk inu chi, ìgbala chieen̄, inyi enyi ekarọn̄ ìnin̄ emen ijo ijejeen̄ ife chi ebi ekariọọn̄ge esip ekijeen̄, mè ìsa me ikeya ìnan̄a me irek enyi ewuukbe lek ikeke inye ìrọn̄.

¹⁸Ire, ìkitibi ìmiin̄ me emen atata nnwọn mè emen irọriọọn̄ eyi enyi eriọọn̄be Okaan̄ kiji mè Ogwu Unyan̄a kiji Jisọs Karais. Itọn̄ ikup inyi Okaan̄ kiji mgbọ keyi mè mgbọ ikakaan̄ge itata. Ikup ikeya!