Read obolo I Jọn 1 Bible Online

I Jọn 1 - obolo bible

I Jọn 1

¹Eji ekige inu ofolek Ikọ eyi Ugwem. Ikọ eyi Ugwem yi ìkukup bene me ibebene, sabum enirom linyọn̄. Eji mîsa utọn̄ kiji inọ Ikọ ya, mè isa chieen̄ kiji ikpọ, mè imun̄. Eji mîsa si ubọk kiji ichak me lek Ikọ eyi Ugwem ya.

²Ugwem yi îkana ebilene, eji esasa chieen̄ kiji imun̄, mè ikeke ata-ikọ inyi, mè isa me ikeya ikitumu ikọ ofolek kan̄ inyi enyi. Ugwem yi ìre ugwem ikakaan̄ge itata. Ọmọ melek Awaji Ute ekup sabum ọmọ onikana isibi me isi kiji.

³Me atikọ, îre inu eji esabe utọn̄ kiji inọ, mè isa chieen̄ kiji imun̄ ke eji ekikpa si inyi enyi, inyi enyi egọọk eji egbaan̄ inu erọ. Eji melek Awaji Ute mè ogwu Gwun̄ Jisọs Karais ekigbaan̄ inu irọ.

⁴Eji ekige ikpa yi ijet enyi, inyi enyi egọọk eji egbaan̄ inu erọ, mè eji esa me ikeya ekaan̄ òjot òjot unwọọn̄.

⁵Mgbọ keyi, etip eji enọbe me otu kè Jisọs, mè isa inilook enyi ìre ikeyi: Awaji ìre utoon̄, kpunu udun geege me emen kan̄.

⁶Eya orọ, ire eji ibe ke eji ekigọọk Awaji igbaan̄ inu irọ, mè iyaka ikiluk ugwem me emen udun, eji ekikan̄ ataak. Ubọk irọ inu kiji ìkare eyi atikọ.

⁷Ire, ire eji ikije me emen utoon̄, kubọk Awaji me lek kan̄ okupbe me emen utoon̄, ìsibi ibe ke eji mêkigbaan̄ irọ inu melek ebi melek kiji. Mgbọ ya si, eje kè Jisọs Karais, Gwun̄ Awaji, môkigwọk otutuuk ijo kiji isan̄a, mè ikirọ inyi eji etana me isi Awaji.

⁸Ire eji ibe ke kpunu ijo inu me emen ugwem kiji, eji ekifiaan̄ lek kiji. Atikọ ìkakup me emen kiji.

⁹Ire, ire eji itumu ijo kiji isibi, Awaji môtele ijo kiji inyi eji, mè igwọk otutuuk ijo irọrọ geelek isan̄a eji me lek, inyi eji etana me isi kan̄, mije, Awaji ìkakitele irọrọ ikọ kan̄ geelek iso. Ọmọ si ìre ogwu òkirọ inu òtatat mgbọ geelek.

¹⁰Ire eji ibe ke eji kperọ ijo inu, eji ekigwen Awaji ogwu ataak. Ikọ kan̄ si ìkakup me emen ugwem kiji.