Read obolo I Jọn 2 Bible Online

I Jọn 2 - obolo bible

I Jọn 2

¹Nsabọn n̄a, ǹkige ikpa yi ijet enyi, inyi enyi ekarọ ijo inu. Ire, ire ikaan̄ ogwu irọ ijo inu, eji mîkaan̄ ogwu òkitumu ikọ ibot kiji me isi Awaji Ute. Ene ya ìre Jisọs Karais, Ogwu Ata Irọrọ.

²Ọmọ ore ogwu esabe igwa ngwugwa iben unaan̄-ejit Awaji isan̄a, mè isiki Awaji ejit, inyi itele ijo kiji inyi eji. Ìkare mije ijo inu eyi kiji gaalek, îre si mije ijo inu otutuuk ebilene me linyọn̄ erọbe.

³Ire eji ikirọ otutuuk inu Awaji obe eji erọ, eji mêsa me ikeya iriọọn̄ ibe ke eji mîriọọn̄ Awaji me atikọ.

⁴Ire ene ikibe ke ọmọ îriọọn̄ Awaji, ire, ìkakirọ otutuuk inu Awaji obe erọ, ene ya ìre ogwu ataak. Kpunu atikọ geege me emen kan̄.

⁵Ire, ene geelek òkirọ ikọ Awaji, imumechieen̄ Awaji îsi ikwaan̄ òjot òjot me emen ugwem ene ya me atikọ. Ubọk eji ekisa iriọọn̄ ibe ke eji melek Awaji ekigbaan̄ inu irọ ìre ikeyi:

⁶Ene geelek òbe ke ọmọ melek Awaji ekigbaan̄ inu irọ, ene ya ìkaan̄ iluluk ugwem kubọk Jisọs Karais olukbe.

⁷Ebi une n̄a ebi mmun̄be me chieen̄, ikan keyi nkige ijet enyi ìkare ayaya ikan. Îre oka ikan ya eyi enyibe enyi bene me okpa otu mgbọ enyi enọbe ata etip. Oka ikan yi ìre etip ya eyi enyi ewuukbe lek inọ.

⁸Ire, ubọk geelek si, ikan yi ìre aya ikan. Ugwem Karais olukbe, mè ubọk enyi si ekiluk ugwem kinyi, îjeen̄ ibe ke ayaya ikan yi òkisi ikwaan̄ me atikọ. Mije, ubọk irọ-inu eyi emen udun òkiraka, atata utoon̄ ya si îra iwuuk lek ibene ikitoon̄.

⁹Eya orọ, ene geelek òbebe ke ọmọ ìkup me emen utoon̄ ya, mè ikicha gwun̄ Nte kan̄ me emen Karais, ene ya ìkup si me emen udun.

¹⁰Ene geelek òmama gwun̄ Nte kan̄, ene ya ìkiluk me emen utoon̄. Kpunu inu geege òkup me emen ugwem kan̄ eyi òborọ inyi ọmọ inan̄a irọn̄ inin̄ me ijo inu.

¹¹Ire, ene geelek òchacha gwun̄ Nte kan̄ ìkup me emen udun, mè ikinyinya ikana me emen udun ya. Ìkakiriọọn̄ ere îkije isi, mije, udun ya îtap ọmọ ǹnàan̄.

¹²Nsabọn n̄a, ǹkige ikpa yi ijet enyi, inyi enyi eriọọn̄ ibe ke Awaji îtele ijo kinyi inyi enyi sa me erieen̄ kè Karais.

¹³Enyi ebi ugane me emen ichechieek, ǹkige ikpa yi ijet enyi, mije, enyi mîriọọn̄ ọmọ ogwu òkukup bene me ibebene sabum enirom linyọn̄. Enyi nsabọn irieen̄ me emen ichechieek, ǹkige ikpa yi ijet enyi, mije, enyi mîtim ikpan̄ ogwu ijo ya, òrere Yọk.

¹⁴Nsabọn n̄a, ǹge ikpa yi ijet enyi, mije, enyi mîriọọn̄ Awaji Ute. Enyi ebi ugane, ǹge ikpa yi ijet enyi si, mije, enyi mîriọọn̄ ọmọ ogwu òkukup bene me ibebene sabum enirom linyọn̄. Enyi nsabọn irieen̄, ǹge ikpa yi ijet enyi, mije, enyi mînye lek, ikọ Awaji obabia si me emen kinyi, enyi esasa me ikeya itim ikpan̄ ogwu ijo ya, òrere Yọk.

¹⁵Ikama linyọn̄ keyi! Ikamama si otutuuk inu geelek òkup me linyọn̄. Ene geelek òkima linyọn̄ keyi ìkpokọt ima Awaji Ute.

¹⁶Mije, inu geelek òkup me linyọn̄, bene me ijo ulọk eyi akpalek, mè ulọk inu chieen̄ ene okimun̄, re lek isasa inu eyi ugwem keyi ikigugo lek, otutuuk inu chi geelek ìnan̄a me linyọn̄ keyi, ìkanan̄a me ubọk Awaji.

¹⁷Linyọn̄ keyi, mè otutuuk ijo ulọk kan̄ geelek, ìboraraka isan̄a kpai. Ire, ene geelek òkirọ inu Awaji okiweek môluk ugwem ire mgbọ ikakaan̄ge itata.

¹⁸Nsabọn n̄a, mgbọ keyi ìre òta mgbọ. Enyi mîwuuk lek inọ ibe ke ogwu ochicha kè Karais mônu. Mgbọ keyi, owuwa ebi ochicha kè Karais mîra inu. Eyiyi ke eji esa iriọọn̄ ibe ke òta mgbọ ire eyi.

¹⁹Îre me etete kiji ke ife chi enan̄a isibi. Me mgbọ ema ekupbe melek kiji, ema kpere ebi kiji me otutuuk ejit kiban̄. Eya orọ ema esibibe itele eji. Mebe ke ema ìre ebi kiji me atikọ, kè ema èkup melek kiji si. Ire, isisibi eyi ema esibibe itele eji îjeen̄ me atikọ ibe ke ema kpere ebi kiji.

²⁰Ire enyi, Ogwu Òkup Mbuban îwuuk lek inyi enyi Ekwukwu Mbuban. Mije keya, enyi otutuuk ene mîriọọn̄ atikọ.

²¹Eya orọ, ǹkage ikpa yi ìjet enyi kubọk enyi kperiọọn̄ atikọ. Ire, ǹkige ikpa yi ijet enyi, mije, enyi mîriọọn̄ atikọ, melek si, mije, ataak ìkakikup me emen atikọ.

²²Mgbọ keyi, ìre ekene ore ogwu ataak ya? Îre ogwu òkitumu ibe ke ìkare Jisọs ore Karais ya. Ene ya ogwu òkitumu ikọ keyi ore ogwu ochicha kè Karais ya ogwu òjijit Awaji Ute, mè ijit si ogwu Gwun̄.

²³Ene geelek òjijit Awaji Ute îjit si ogwu Gwun̄. Ene geelek òbọbọkọ Gwun̄ Awaji itap, îbọkọ si ogwu Ute itap.

²⁴Eya orọ, ìmun̄ ibe ke enyi mîtet inu cha enyi enọbe, bene me adasi mgbọ enyi enọbe ikọ Awaji, ikaan̄ me emen kinyi. Mije, ire enyi itet inu cha ikaan̄ me emen ejit kinyi, enyi mêluk me emen Gwun̄ ya, mè emen ogwu Ute si.

²⁵Eyiyi ore ugwem eyi ikakaan̄ge itata eyi Karais ochieekbe use ibe ke ọmọ mônyi eji.

²⁶Îre mije ife cha ìkiweek isasa enyi ije ilọ oniin̄ ke nkige otutuuk inu chi ijet enyi.

²⁷Eyi kinyi, Ekwukwu Mbuban Karais onyibe enyi ọmọ òwa me emen kinyi olukbe. Eya orọ, ìkayaka ìkup me uyọt ibe ofifi ene geege inijeen̄ enyi inu geege. Ire, ike Ekwukwu Mbuban ya okijeen̄ enyi otutuuk inu, ìkirọ si inu geelek îkijeen̄ enyi, mè ìsa me ikeya ìkup me emen kè Karais. Mije, inu Ekwukwu Mbuban ya okijeen̄ enyi ìre eyi atata, ìkare eyi ataak.

²⁸Iin̄, nsabọn n̄a, ìkeke ìnye me emen kè Karais, inyi ejit kiji inye me mgbọ Karais môkpọkbe inu, mè esip ikatet eji me isi kan̄.

²⁹Enyi mîriọọn̄ ibe ke ọmọ ìre ogwu ata irọrọ. Eya orọ, ìriọọn̄ si ibe ke ogwu geelek òkirọ ata irọrọ ìre gwun̄ kan̄.