Read obolo I Jọn 4 Bible Online

I Jọn 4 - obolo bible

I Jọn 4

¹Ata ebi une n̄a, ikakpọkpọ ìkichieek me lek otutuuk ebi ìbe ke ema mîkaan̄ Ekwukwu Awaji. Ire, ìkitọ ife chi ìkpọ, mè ìre Ekwukwu Awaji ke ema ekaan̄ me atikọ. Mije, owuwa ebi nriran ataak mîkpọk iche ikana linyọn̄.

²Inu enyi mêsabe iriọọn̄ Ekwukwu eyi Awaji ìre ikeyi: Ene geelek òtutumu ibe ke Jisọs Karais înu me linyọn̄ me akpalek ebilene, ene ya îkaan̄ Ekwukwu Awaji me emen kan̄.

³Ire, ogwu geelek ikatumuge ibe ke Jisọs înu me akpalek ebilene, ene ya ìkakaan̄ Ekwukwu Awaji me emen kan̄. Ekwukwu keya ore ekwukwu eyi ogwu ochicha kè Karais, ogwu enyi enọbe ibe ke mônu me linyọn̄, mè inọ si ibe ke ọmọ òwa me linyọn̄ me mgbọ keyi.

⁴Ire, atata nsabọn n̄a, enyi ìre ebi eyi Awaji. Enyi mîra itim ikpan̄ ebi nriran ataak cha, mije, Ekwukwu Mbuban ogwu òkup me emen kinyi îmin, mè inye lek igak Yọk ogwu òkup me linyọn̄.

⁵Ebi nriran ataak cha ìre ebi linyọn̄ keyi. Ikọ geelek ema ekitumu ìre ikọ ebi linyọn̄. Eya orọ si ebi linyọn̄ ekigban̄ ikọ kiban̄.

⁶Eji ìre ebi eyi Awaji. Ene geelek òrọriọọn̄ Awaji, ogwa okigban̄ ikọ kiji. Ire, ene geelek ikarege ogwu eyi Awaji ìkakigban̄ ikọ kiji. Ikeyi ke eji ekisa iriọọn̄ Ekwukwu eyi atikọ, mè ekwukwu eyi ataak.

⁷Atata bọn Nte n̄a, eji ekemun̄ lek kiji me chieen̄, mije, imumechieen̄ ìnan̄a me ubọk Awaji. Ogwu geelek òkimun̄ ene me chieen̄ ìre gwun̄ eyi Awaji. Ene ya si îriọọn̄ Awaji.

⁸Ene geelek ogwu ìkakimun̄ ene me chieen̄, ene ya ìkariọọn̄ Awaji, mije, Awaji ìre imumechieen̄.

⁹Ubọk Awaji osabe ijeen̄ imumechieen̄ kan̄ me lek kiji ìre ikeyi: Îria ọkpọkpọ Gwun̄ ge kan̄ inu me linyọn̄ keyi, inyi eji enan̄a me lek kan̄ ekaan̄ ugwem ikakaan̄ge itata.

¹⁰Ìkare ibe ke eji emumun̄ Awaji me chieen̄, ire, Awaji omun̄ eji me chieen̄, mè iria ọkpọkpọ Gwun̄ ge kan̄ inu, inyi inibọkọ mkpukpe ijo inu kiji ibeme. Eyiyi ore imumechieen̄ me atikọ.

¹¹Atata bọn Nte n̄a, ire Awaji imun̄ eji me chieen̄ ikeyi, îgbe ibe eji emun̄ si ebi melek kiji me chieen̄.

¹²Kpunu ogwu òrarak isa chieen̄ imun̄ Awaji. Ire, ire eji ikimun̄ lek kiji me chieen̄, ìsibi ibe ke Awaji ọmọ òwa me emen kiji olukbe; ke imumechieen̄ kan̄ si îso ifuk me emen kiji.

¹³Awaji înyi eji Ekwukwu Mbuban. Eyi ke eji esa iriọọn̄ ibe ke eji ekiluk ugwem me emen Awaji, mè iriọọn̄ si ibe ke Awaji òwa si me emen kiji.

¹⁴Eji mîsa chieen̄ imun̄ Gwun̄ Awaji, mè inan̄a me ikeya ikeke ata-ikọ ibe ke Awaji Ute îria ogwu Gwun̄ inu ibe inire Ogwu Unyan̄a inyi otutuuk ebi linyọn̄.

¹⁵Ene geelek òkitumu isibi ibe ke Jisọs ìre Gwun̄ Awaji, Awaji òwa me emen ugwem ene ya. Ene ya ìkiluk si ugwem kan̄ me emen Awaji.

¹⁶Sa me ikeyi ke eji esa iriọọn̄ imumechieen̄ Awaji okaan̄be me lek kiji. Eji mîchieek si me lek imumechieen̄ ya. Awaji ìre imumechieen̄. Ene geelek ogwu imumechieen̄ Awaji okisi ikwaan̄ me emen ugwem kan̄, ene ya ìkiluk ugwem me oniin̄ eyi Awaji, Awaji okekiluk si me emen ene ya.

¹⁷Imumechieen̄ Awaji ìso ifuk me emen kiji, inyi ejit kiji inye me mgbọ Usen Oyerebet Awaji ya môrebe. Mije, ugwem kiji me linyọn̄ keyi ìkup kubọk ugwem kè Karais.

¹⁸Kpunu ukpook geege me emen imumechieen̄. Ire, imumechieen̄ òsoso ifuk ìkilalap ukpook isan̄a, mije, ukpook ìkinan̄a me lek osusut eyi itip-oyerebet. Ene geelek òkitet ukpook, imumechieen̄ Awaji ìkaso ifuk me emen ene ya.

¹⁹Eji ekimun̄ Awaji mè ebilene me chieen̄, mije, Awaji odasi imun̄ eji me chieen̄.

²⁰Ikaan̄ ogwu ikitumu ibe ke ọmọ îmun̄ Awaji me chieen̄, ire, mè ikicha gwun̄ Nte kan̄, ene ya ìre ogwu ataak. Mije, ire ene icha gwun̄ Nte kan̄ ogwu îkisa chieen̄ imun̄ mgbọ geelek, ìre ene ya ìbojeje ikọt ima Awaji ogwu ọmọ ikasage chieen̄ ìmun̄ mgbọ geege?

²¹Ikan Karais onyibe eji ìre ikeyi: Ene geelek òmumun̄ Awaji me chieen̄, ene ya ìkaan̄ imumun̄ si gwun̄ Nte kan̄ me chieen̄.