Read obolo Oyer 15 Bible Online

Oyer 15 - obolo bible

Oyer 15

¹Ike mgbọ okije, me ibot mgbọ ekirọkọ akpa wit me uko, Samsin onenibosi ikpọ ogwu nwa, mè itet gwun̄ ebot ge ikaan̄ me ubọk ibosa igbaalek isi. Mgbọ îrebe ama ya, itutumu inyi ogwu ute-nwa ibe ke ọmọ ìkiweek isisi igọọk nwa kan̄ ilaak me agwut nwa kan̄. Ire, ogwu ute-nwa ìkachieek ibe Samsin inin̄ igọọk ogwu nwa.

²Nte ogwu nwa onenitumu inyi ọmọ ibe, “Ǹkikeek ibe ke owu òchacha ogwu enenwaan̄ yi. Eya orọ, nra isa iche olom inyi ogwu melek kwun̄ enube ido-nwa ya. Kpọ, ngwan̄ kan̄ ogwu ijija ọmọ òwa. Îjaan̄ igak ọmọ. Owu môkọt imọnọ ogwugwa me lek nwa me useen̄.”

³Samsin otutumu inyi ema ibe, “Eyi mgbọ keyi, ijo inu geelek mârọbe ebi Filisia, awọ geege ìkpotet emi.”

⁴Samsin osisi itet efit ekpuuruk ita, mè initet edim kiban̄ igbaan̄ itobo, iba iba, mè isa nchat uti inwaan̄ me ekpuk ere îtobobe edim kiban̄ cha, ekpuuruk iba, nchat uti ge.

⁵Inenichim ukan̄ itap me lek otutuuk nchat uti cha, mè initele ekpuuruk cha eliliin̄ enin̄ emen uko akpa wit ebi Filisia. Ukan̄ otataka uko cha, mè ijijaka akpa wit echi esọpbe igwook, mè echi kpesọsọp-nu, isan̄a kpai, mè ijijaka si uko gerep mè uko olifu kiban̄ igbaalek.

⁶Ebi Filisia enenikidido ibe, “Ìre ekene orọ inu keyi?” Ebi ene ekekifọọk ibe, “Îre Samsin, ogwu òdo nwa me Timina orọ inu yi, mije nte nwa kan̄ osabe nwa kan̄ iche olom inyi ogwu melek kan̄ enube ido-nwa.” Ebi Filisia esisi ichim ukan̄ itap me lek uwu nte ogwu enenwaan̄ ya, mè igbaan̄ ema ute mè gwun̄ iwọp ikpan̄ me emen uwu ya.

⁷Samsin obebe ema, “Mije inu enyi erọbe emi, mâsisaak enyi mege, mè imun̄ ibe ke nrọ enyi useen̄ inu enyi erọbe emi isan̄a kpai.”

⁸Samsin onenibene ikpele ufialek me lek kiban̄, mè ikpan̄ owuwa kiban̄. Irọrọ isan̄a, inanan̄a ije ikwala isibi isi inin̄ emen ǹkororok ge òkup me lek ewuuk Etam ikup.

⁹Ebi Filisia ejijibi akọn̄ isi irieen̄ me Juda, mè ichak iwele igbet Leyi.

¹⁰Ebi Juda ekekido ebi Filisia ibe, “Keke orọ mè enyi enu enetim eji akọn̄ me lek?” Ema efọfọọk ibe ke ema enu ibenitet Samsin ibọp kubọk ogwu mkpọn, inyi ema ekọt erọ ọmọ useen̄ inu îrọbe ema.

¹¹Obop ebirieen̄ Juda ita enanan̄a ije ikwala isibi isi emen ǹkororok lek ewuuk Etam, mè isi itumu inyi Samsin ibe, “Ìre owu òkafat ìriọọn̄ ibe ke îre ebi Filisia ekikpulu eji mgbọ keyi! Keke orọ otapbe eji ikpele ufialek keyi me lek?” Samsin ofọfọọk ema ibe, “Useen̄ inu ema erọbe emi ke nrọ ema.”

¹²Ebirieen̄ Juda cha ebebe ọmọ, “Eji enu ibenitet owu ibọp, mè isa ijet ebi Filisia.” Samsin obebe ema, “Ìnyan̄a ibot ìnyi emi ibe ke enyi me lek kinyi kpebekpan̄ emi.”

¹³Ema efọfọọk ibe, “Eji mîchieek. Eji kpebekpan̄ owu. Gaalek, eji ebebọbọp owu, mè isa owu ijet ema.” Ema enenisa aya olik mgbugbak iba ibọp Samsin ikam, mè inisa ọmọ inan̄a me emen ǹkororok lek ewuuk Etam ya isibi.

¹⁴Mgbọ Samsin orebe Leyi, ebi Filisia egbugbuku isibi, mè ikidimi ukpo ikinu ọmọ lek. Mgbọ yaage, Ekwukwu Okumugwem oninin̄ emen kan̄, mè itap ọmọ unye me emen. Olik esabe ibọp ubọk iba kan̄ cha osọsọp igwook kubọk olik fàlâs ukan̄ otakabe.

¹⁵Samsin onenikana chieen̄ itoon̄ me lek njijom ukwuuk uga ijọn̄ inyinya akpan ge, mè ito ubọk imọnọ, mè isa inin̄ ema lek, mè ikpan̄ obop ebirieen̄.

¹⁶Inenikitumu ibe, “Ǹsa uga ijọn̄ inyinya akpan ge gaalek ikpan̄ ebi ene itoon̄ ibene me èdọ me èdọ. Ǹsa uga ijọn̄ inyinya akpan ge gaalek ikpan̄ obop ebirieen̄.”

¹⁷Ikọ ya itata ọmọ me otu, itọtọp uga ijọn̄ inyinya akpan ya ifiin̄, mè inyi ere ya erieen̄, Ramat Leyi.[17]

¹⁸Ebek onenichiaak Samsin enenen, itataan̄ ukpo igwen Okumugwem ibe, “Îre owu onyi emi, ogwu usun̄ kwun̄, ikpele nnyan̄a-nsibi keyi. Mgbọ yi, ìre owu môfat itele ibe emi ǹkwu me urak-ebek mudim, mè ǹrọn̄ ǹnin̄ me ubọk ife kpefieek afi chi?”

¹⁹Okumugwem ochichili udọn̄ ge òkup me Leyi, mun̄ okekigbuk isibi me emen. Samsin onwọnwọ, efuuk oninin̄ ọmọ emen, lek kan̄ onyenye. Mije keya ke înyi udọn̄ mun̄ ya erieen̄, En Akore.[18] Udọn̄ mun̄ ya ọmọ òwa me Leyi mege inire chereyi.

²⁰Samsin okpukpulu ebi Ijeren akọp acha iba me ukot mgbọ ebi Filisia ekikpulu me lek ijọn̄ ya.