Read obolo Oyer 16 Bible Online

Oyer 16 - obolo bible

Oyer 16

¹Usen ge, Samsin onenisi Gaja, ama ebi Filisia, mè imun̄ ogwu enenwaan̄ òje oyet ge, mè igọọk ogwu enenwaan̄ ya ilaak iwele egwe.

²Ebi Gaja eneninọ ibe ke Samsin ọmọ òwa me ama kiban̄, mè inigban ikana uwu ogwu enenwaan̄ ya, mè ikup si me otunchit ama otutuuk eririeen̄ ya ikikpọ mgbọ Samsin môbonije iraka isibi. Ema kpesisaak lek otutuuk eririeen̄ ya, mije, ema ebe ke egwe isiwele, ke mêtet ọmọ ikpan̄.

³Ire, irere ejit eririeen̄, Samsin onanan̄a ikeke, mè ije isi lek otunchit ama ya, mè igbaan̄ afọn̄ melek ubọk afọn̄ agan̄ iba cha, melek mgba òje me lek itet, mè ijibi, mè iben otutuuk itoon̄ me oguga isa ije inene inyọn̄ ogoon̄ òkibene isi ikpọ Eburọn isi igwook.

⁴Mgbọ eya orakabe, Samsin onenimun̄ ogwu enenwaan̄ ge me iteke ijọn̄ Sorek, mè inima ogwu enenwaan̄ ya. Erieen̄ ogwu enenwaan̄ ya ìre Dilaila.

⁵Ebi ibot mkpulu Filisia enenisi lek kè Dilaila, mè itumu inyi ibe, “Kap ọmọ otu week riọọn̄ nlelet inu òkup me lek ikpele unye kan̄ ya, mè week si riọọn̄ ubọk eji mêsabe ikọt inye lek igak ọmọ, mè itet ọmọ ibọp. Ire okọt irọ, otutuuk kiji, ene ge ge, mônyi owu obop ikpoko alata okuket ge mè efit ge.”

⁶Dilaila onenitumu inyi Samsin ibe, “Nye lek tumu-nu nlelet inu òkup me lek ikpele unye kwun̄ ya nyi emi. Ire ene ibotet owu ibọp, mè ikeme owu isiki, ìborọrọ?”

⁷Samsin obebe ọmọ, “Ire esa ayaya olik jaaba echi ìkachat-nu ibọp emi, lek n̄a môwọ, mânenikup kubọk ebilene ikike.”

⁸Ebi ubọọn̄ Filisia cha enenisa ukpa ayaya olik jaaba echi ìkachat-nu ijet Dilaila. Ibọbọkọ, mè isa ibọp Samsin ikam.

⁹Sabum mgbọ ya, Dilaila îra iwuwuuk lek ilileek ebi ene me ofifi agwut. Mgbọ îbọpbe Samsin isan̄a, inenibe, “Samsin, kpọ ebi Filisia mênitet owu!” Ire, Samsin osọsọp olik cha igwook mgbọ yaage kubọk òrurot ukan̄ otetbe. Mije keya, kpekọt iriọọn̄ nlelet inu òkup me lek unye kan̄.

¹⁰Dilaila onenitumu inyi Samsin ibe, “Owu okat ejit ikan̄ ataak inyi emi, mè ifiaan̄ emi itap ebot. Nye lek kpa-nu nyi emi ike ene obosa ikọt ibọp owu ikam.”

¹¹Samsin onenitumu inyi ibe, “Ire ene isa aya olik eyi kperarak isa ibọp inu geege ibọp emi, lek n̄a môwọ, mânenikana ikup kubọk ebilene ikike.”

¹²Dilaila onenisi imọnọ aya olik isa inibọp Samsin, mè initaan̄ ukpo itumu ibe, “Samsin, kpọ ebi Filisia mênitet owu!” Me ike mgbọ ya, îlileek si ebi ene me ofifi agwut. Ire, olik cha osọsọp me ubọk kè Samsin igwook kubọk eri ikike.

¹³Dilaila obebe Samsin, “Òkpọkpọ ikifiaan̄ emi itap ebot mege inire mgbọ keyi, mè ikikan̄ ataak inyi emi. Nye lek tumu-nu nyi emi ike ebesa ikọt itet owu ibọp.” Samsin onenifọọk ibe, “Ire otet ǹkat ijeek jaaba òkup emi me ibot ilọk ikam me lek ekwut òkup me lek uti ilọk-ekwut, mè isa ugọbọ inwaan̄ ikam, lek n̄a môwọ, mânenikana ikup kubọk ebilene ikike.”

¹⁴Dilaila onenirọ inyi Samsin ilaak, mè initet ǹkat ijeek jaaba òkup ọmọ me ibot ilọk ikam me lek ekwut òkup me lek uti ilọk-ekwut, mè isa ugọbọ inwaan̄ ikam, mè initaan̄ ukpo ibe, “Samsin, kpọ ebi Filisia mênitet owu!” Samsin obobolo chieen̄ me ilaak, mè itaba ugọbọ ya mè uti ilọk-ekwut ya melek ekwut òkup me lek uti ilọk-ekwut ya ijibi.

¹⁵Dilaila onenitumu inyi Samsin ibe, “Òbojeje ikibe ke owu oma emi, mgbọ owu òkatoon̄ emi ejit me lek? Òso mgbọ ita ire eya owu okifiaan̄ emi itap ebot, mè ijit itutumu nlelet inu òkup me lek unye kwun̄ inyi emi.”

¹⁶Dilaila otetet lek inye ikikap Samsin ikọ me otu usen geelek, mege efuuk otata Samsin me emen igbet mkpa.

¹⁷Samsin oneniben otutuuk atikọ ofolek ugwem kan̄ ikpa inyi Dilaila ibe, “Kperarak ìsa akwaan̄ ìsọp emi ijeek me ibot, mije, ǹkup me inyan̄a-ibot eyi isusun̄ lek esese inyi Awaji karake emen owot nga n̄a. Ire isọp emi ijeek me ibot, unye n̄a mônan̄a itele emi, mânenikana ikup kubọk ebilene ikike.”

¹⁸Dilaila onenimun̄ ibe ke Samsin îtumu otutuuk atikọ inyi ọmọ, mè iniria etip igwen ebi ibot mkpulu Filisia ibe, “Ìnye lek ìgwu ìkom ìna mgbọ keyi gaalek, ke îra ikpa otutuuk atikọ inyi emi.” Ebi ibot mkpulu Filisia egwugwu ikom inu, melek ikpoko alata okuket ema echieekbe me use me ubọk kiban̄, me ene me ene.

¹⁹Dilaila orọrọ ibe Samsin ilaak inwọnọ me inyọn̄ ukot kan̄, mè inigwen ogwu enerieen̄ ge ibe inisọp ǹkat ijeek jaaba òkup me ibot kè Samsin. Inenibene ikirọ inu unye unye me lek kan̄. Ire, lek kan̄ owọwọ, unye otata ọmọ me emen.

²⁰Dilaila onenitaan̄ ukpo itumu ibe, “Samsin, ebi Filisia mênitet owu!” Samsin obobolo chieen̄ me ilaak jîp, mè ikeek ibe ke ọmọ mônan̄a isibi, mè isan̄a lek kan̄ isibi me uyọrọlek kubọk ọmọ okirọ me mgbọ òraraka cha. Ire, ìkariọọn̄ ibe ke Okumugwem înan̄a itele ọmọ.

²¹Ebi Filisia eninin̄ gìrìrìm, mè ikana ọmọ itet, mè irọkọ ọmọ chieen̄ isan̄a me ibot, mè itaba ọmọ isa isi Gaja, mè itap ọmọ me uwu mkpọn, mè isa mkpọn ekwe ibọp ọmọ ikam, mè inito ọmọ me lek ewuuk ikọk-akpa, inyi ikana ogwu òkọk akpa me uwu mkpọn.

²²Ire, ijeek kan̄ ekwọkọbe ya okpọkpọk ibene ikitibi.

²³Usen ge, ebi ibot mkpulu Filisia enenigbaan̄ ititiin̄, ibenigwa ikpele ngwugwa inyi Dagọn, awaji kiban̄, mè ito ijọk igbaalek, mije ke awaji kiban̄ îkana Samsin ogwu ochicha kiban̄ itap ema me ubọk.

²⁴Mgbọ ebi ama ya ekanabe chieen̄ imun̄ Samsin, ema ebebene ikitọn̄ awaji kiban̄ ibe, “Awaji kiji îkana ogwu ochicha kiji itap eji me ubọk; ogwu ochicha kiji ogwu òjijijaka ijọn̄ kiji isan̄a kpai, mè ikpan̄ ebi kiji nsebe nsebe.”

²⁵Mgbọ miin̄ okanabe ebi ene me chieen̄ me emen ijọk ya, ema ekekitumu ibe, “Ìsan̄a Samsin ìsibi ìnu, inyi inirọ eji echak imọm.” Enenisi isan̄a Samsin isibi me uwu mkpọn inu, inenikirọ ema ekebele ejit echak imọm. Enenisa Samsin isi, inyi ikeke me agbagba atà iba òkibeme uwu ya.

²⁶Samsin otutumu inyi gwun̄ enerieen̄ òkitet ọmọ me ubọk isa ijeen̄ oniin̄ ibe, “Nye lek sa emi si lek atà òbeme uwu awaji yi, inyi ǹchak ubọk me lek, mè m̀bieen̄ lek me lek kiban̄.”

²⁷Ebi ene mînin̄ inwaan̄ me emen uwu awaji Dagọn ya, ebibaan̄ mè ebirieen̄, otutuuk ebi ibot mkpulu Filisia mîso isi me ere ya. Inu òsoso obop ene ita, ebirieen̄ mè ebibaan̄, ekukup me inyọn̄ otoon̄-uwu ya ikikpọ inu Samsin okirọ.

²⁸Samsin oneniriaak uriaak igwen Okumugwem ibe ikeyi, “Jei Ogwukaan̄-ene Okumugwem, soso keek emi. Jei Awaji, nye lek kpọk tap emi unye me emen mgbọ ge keyi gaalek, inyi ǹsa irek ge keyi gaalek ǹrọ ebi Filisia useen̄ ema erọkọbe emi chieen̄ iba.”

²⁹Samsin onenibieen̄ ubọk me lek atà iba cha òkeke me eden̄ uwu ya, echi òkibeme otutuuk uwu awaji Dagọn ya ikaan̄, mè isa ubọk agan̄ ulom ibieen̄ me lek ge, mè isa ubọk agan̄ ujit ibieen̄ me lek keyilọ,

³⁰mè itumu ibe, “Mâgọọk ebi Filisia igbaan̄ ikwu!” Inenisa otutuuk unye kan̄ ibieen̄ atà iba cha, uwu awaji Dagọn ya ogbugbugbọ ikeme otutuuk ebi ibot mkpulu Filisia, mè otutuuk ebi ìnu ijọk ya, mè ikpan̄ ema isan̄a kpai. Sa me ikeya, Samsin okpakpan̄ ene me mgbọ mkpa kan̄ iwa igak otutuuk ebi îkpan̄be me ògat ugwem kan̄.

³¹Ebi ngwan̄ kan̄, mè otutuuk ebi uwu ogwu ute enanan̄a ikwala isibi inu iniben nkwukwu kan̄ isa ika, mè isa isi ifuun̄ me etete Sora mè Esitayon, me udọn̄-ufuun̄ kè Manowa ogwu ute. Samsin ìkpulu Ijeren akọp acha iba.