Read obolo Oyer 17 Bible Online

Oyer 17 - obolo bible

Oyer 17

¹Îkaan̄ ogwu enerieen̄ ge ekigwen Maika, ogwu òluk me inyọn̄ ijọn̄ ogoon̄ ogoon̄ otoko kè Iferem.

²Ogwu enerieen̄ yi onenigwen ogwu uga itumu inyi ibe, “Obop ikpoko alata okuket ge mè efit ge kwun̄ ya, eyi echiin̄be ya, eyi owu otapbe awọ inyi ogwu òchichiin̄ ya, eyi nnọbe mgbọ okitap awọ ya, kpọ ikpoko ya ire eyi. Îre emi mmọnọ.” Ogwu uga obebe ọmọ, “Okumugwem igbana owu, gwun̄ n̄a!”

³Mgbọ îkanabe obop ikpoko alata okuket ge mè efit ge ya inyi ogwu uga, ogwu uga otutumu ibe, “Me atikọ, nsun̄ ikpoko yi me mbuban inyi Okumugwem, mè isa ubọk n̄a ikana ikpoko yi inyi gwun̄ n̄a ibe isa irọ mkpọmfaka eyi ebọbọn̄ mè eyi etọtọkọ. Mgbọ keyi, ǹkiyaka ikpoko yi inyi owu.”

⁴Maika onenikpọk ikana otutuuk ikpoko ya inyi ogwu uga. Ogwu uga onenimọnọ efit ikpoko alata okuket iba isa ijet ogwu òtọkọ-inu. Ene ya onenisa ikpoko cha irọ mkpọmfaka eyi ebọbọn̄ mè eyi etọtọkọ, ekpukpulu isi itap me uwu kè Maika.

⁵Ogwu enerieen̄ yi, òrere Maika, îkaan̄ isi-ijọn̄ inyi lek kan̄, mè ichim mgbidim ofọnti ikwaan̄ ebi ngwugwa, mè ikaan̄ si owuwa mkpọmfaka, mè inisa ene ge me etete bọn ebirieen̄ kan̄ ito kubọk ogwu ngwugwa kan̄.

⁶Me ukot mgbọ cha, ebi Ijeren kpekaan̄ ogwu ubọọn̄ òkikpulu ema, ene geelek ìkirọ inu òneme ọmọ.

⁷Me ike mgbọ ya, îkaan̄ gwun̄ enerieen̄ ge, ogwu Beteleyem, ama ebi otoko kè Libai, òkiluk me ama ge me Juda.

⁸Gwun̄ enerieen̄ yi onenitele Beteleyem me Juda, mè ikijijen̄e ikana ikiweek ofifi ere ìboluk. Mgbọ îjebe inire inyọn̄ ijọn̄ ogoon̄ ogoon̄ otoko kè Iferem, inenigwaka igba uwu kè Maika.

⁹Maika onenido ọmọ ibe, “Owu ònan̄a me owa?” Ifọfọọk ibe, “Emi ìre ogwu otoko kè Libai me Beteleyem me Juda. Ǹkijijen̄e ikana ikiweek ere mbaluk.”

¹⁰Maika obebe ọmọ, “Na, na gọọk emi luk. Owu môre nte n̄a mè ire si ogwu ngwugwa inyi emi. Mâkikpe owu akọp ikpoko alata okuket me acha, mè ikinyi owu ofọnti melek inorie.”

¹¹Ogwu otoko kè Libai ya onenichieek igọgọọk Maika iluk. Maika onenimọnọ ọmọ kubọk ìyaka inire ene ge me lek bọn ebirieen̄ kan̄,

¹²mè inito ọmọ me ikwaan̄. Ikakana ogwu ngwugwa kan̄, mè igọọk iluk me uwu kan̄.

¹³Maika onenitumu ibe, “Mgbọ keyi, nriọọn̄ ijaan̄ lek ibe ke Okumugwem ìbonwọnwọn melek n̄a, mije ogwu otoko kè Libai onube inire ogwu ngwugwa inyi emi.”