Read obolo Oyer 2 Bible Online

Oyer 2 - obolo bible

Oyer 2

¹Ogwu osat Okumugwem oneninan̄a me Giligan inu me Bokim, mè initumu inyi ebi Ijeren ibe, “Îre emi nsan̄a enyi isibi me Ijipiti, mè isa enyi ije mege initap me inyọn̄ ijọn̄ ere nnyan̄abe ibot ibe ke mâsa inyi ebi nte nte kinyi. Ntumu ibe ke m̀kpachaka inyan̄a-ibot n̄a melek kinyi, mege ire mgbọ geelek.

²Ntumu si inyi enyi ibe mè enyi ekagọọk ebi ìluk me lek ijọn̄ yi ìgbaan̄ ìnyan̄a ibot, ire, mè enyi ejijaka otutuuk ntook kiban̄ geelek. Ire, enyi ekpakpaka ibot inyi emi. Keke ke enyi erọ ikeyi ni?

³Eya orọ, mgbọ keyi, ǹkirọ inyi enyi eriọọn̄ ibe ke m̀kpalap ife chi isan̄a me lek kinyi. Ema ebekana ukpak me agba nkan̄ kinyi, awaji kiban̄ cha si mênenikana ufe inyi enyi.”

⁴Mgbọ ogwu osat Okumugwem otumube ikọ chi inyi otutuuk ebi Ijeren isan̄a, ema otutuuk ene ebebene ikitaan̄ ukpo ito ito.

⁵Ema enenigwen erieen̄ ere ya Bokim,[3] mè igwa ngwugwa si me ere ya inyi Okumugwem.

⁶Mgbọ Josuwa oriabe otutuuk ebi Ijeren itaak me oniin̄, ema otutuuk ejeje, me otoko me otoko, isi okike ijọn̄ ere edọmọbe inyi ema me ìrot, isisi ibọkọ isak, kpa otoko, kpa ìrot kiban̄.

⁷Me otutuuk mgbọ Josuwa okupbe me ugwem, otutuuk ebi Ijeren ekisisi ikwaan̄ inyi Okumugwem. Mgbọ Josuwa okwube iraka, ema ekekisi si ikwaan̄ inyi Okumugwem me otutuuk ukot mgbọ ebi ugane ebi ìsasa chieen̄ imun̄ owuwa ikpele ikwaan̄ Okumugwem orọbe inyi ebi Ijeren ekupbe me ugwem.

⁸Josuwa gwun̄ kè Nun, ogwu ikwaan̄ Okumugwem, îkan iso efit acha mè akọp sabum înikwu.

⁹Efufuun̄ ọmọ me ijọn̄ ere enyibe ọmọ me ìrot, me Timinat Eres[4] me inyọn̄ ijọn̄ ogoon̄ ogoon̄ ebi otoko kè Iferem, òkup inyi agan̄ inyọn̄ me lek ogoon̄ Gayas.

¹⁰Mgbọ otutuuk ebi ukot keya ekwaan̄be ifon igọọk ebi nte nte kiban̄ isan̄a kpai, ofifi ukot onenisibi inu. Ebi ayaya ukot yi kperiọọn̄ Okumugwem, kperọriọọn̄ si inu cha geelek îrọbe inyi ebi Ijeren.

¹¹Ebi Ijeren ebi ukot keyi cha enenikirọ ijo inu me isi Okumugwem, mè ikitọbọ ebum inyi ebi kè Baali.

¹²Ema etetele Okumugwem, Awaji ebi nte nte kiban̄, ogwu òsasa ema inan̄a me Ijipiti isibi, mè ikikana igọọk ofifi awaji cha, awaji ebi ìluk ikana ema, mè ikitọbọ ebum inyi awaji kecha. Inu ya onanaan̄ Okumugwem ejit.

¹³Ema ejijit Okumugwem itele, mè iyaka ikisi isi ikwaan̄ inyi ebi kè Baali, mè ebi kè Asitoret.

¹⁴Okumugwem onanaan̄ ejit enenen me lek ebi Ijeren, mè inikana ema itap me ubọk urum ebi inọ afa, ife cha echichiin̄ inu kiban̄ inọọn̄. Îkana si ema itap me ubọk ebi ochicha kiban̄ ìluluk ikana ema, ema kpeyaka ikọt ikeke ida ebi ochicha kiban̄.

¹⁵Mgbọ geelek ebi Ijeren isisibi isi akọn̄, Okumugwem îra ikitim akọn̄ ikeme ema, mè otim òkpan̄ ema, ike înyan̄abe ibot inyi ema. Ebi Ijeren eyaka inikup me emen ikpele ufialek.

¹⁶Okumugwem onenisan̄a ebi ibot oyerebet[5] isibi, ebi ìnikitap ubọk inyan̄a ebi Ijeren isibi me ubọk urum ebi inọ afa cha ìkinu inichiin̄ inu kiban̄.

¹⁷Ikerere ebi ibot oyerebet kiban̄ cha si, ema kpekigbagban̄ si utọn̄ inyi. Kpan̄asi ikeya, ema ekpọkpọ itet lek inye ikikana igọọk ebi kè ofifi awaji cha, mè ikitọbọ ebum inyi ema. Me ekafiatge mgbọ, ebi ukot keyi etetele oniin̄ ebi nte nte kiban̄ ejebe, mè itele si irọrọ otutuuk ikọ Okumugwem otọbe.

¹⁸Okumugwem isisan̄a ogwu ibot oyerebet ge ito inyi ebi Ijeren, ìkikekeke inye melek ogwu ibot oyerebet ya, mè osa me ubọk ogwu ibot oyerebet ya ònyan̄a ebi Ijeren osibi me ubọk ebi ochicha kiban̄ me otutuuk mgbọ ogwu oyerebet keya okupbe me ugwem. Ìkirọ ikeya, mije, îkikaan̄ ejit nsan me lek kiban̄, mgbọ ema isikifim me emen ukwook me ubọk ebi ochicha kiban̄ ebi ìkitutuku ema, mè ikisulu ema osusut.

¹⁹Ire, ogwu oyerebet ya isikwu inan̄a, ema mîra ikpọk igwu ikom isi ikiluk ijo ugwem òfefieek igak echi ebi nte nte kiban̄ elukbe, mè ikisi ikana igọọk ebi kè ofifi awaji cha, mè ikisi ikwaan̄ inyi, mè ikitọbọ si ebum inyi ema, mè ijit itetele ijo ugwem kiban̄ mè unye-ibot kiban̄.

²⁰Eya orọ, Okumugwem onanaan̄ ejit inyi ebi Ijeren enenen, mè inibe, “Mije ebi ido keyi echakabe inyan̄a-ibot eyi nnyan̄abe melek ebi nte nte kiban̄, kpeyaka ichieek ikekigban̄ ida n̄a,

²¹ido cha geelek òsisik, echi kperieen̄ isan̄a me isi ebi Ijeren sabum Josuwa onikwu inan̄a, m̀kpayaka irieen̄ ema isan̄a me isi kiban̄.

²²M̀basa ido chi iroon̄ ebi Ijeren ikpọ, mè ìre ema mêkana igọọk oniin̄ Okumugwem, kubọk ebi nte nte kiban̄ erọbe, mè ìre ema kpeberọ.”

²³Îre mije keyi ke Okumugwem otele ibe ido cha isik me lek ijọn̄ ya, ìkagwat lek ìkana ema ìnyi Josuwa ibe irieen̄ ema isan̄a mgbọ yaage, sabum Josuwa onikwu.