Read obolo Oyer 21 Bible Online

Oyer 21 - obolo bible

Oyer 21

¹Ebi Ijeren eneninyan̄a ibot me Mijipa ibe, “Ene geege me etete kiji ìkposa ogwu gwun̄ enenwaan̄ iche olom inyi ogwu otoko kè Benjamin geege.”

²Ebi Ijeren eneninan̄a ije isi Uwu Mbuban Awaji me Beten, mè isi isiki ikweek me isi Awaji mege ifit egwe, mè ikitaan̄ ukpo ito ito ujat ujat igwen Awaji ibe,

³“Jei Okumugwem, Awaji ebi Ijeren, ìre kpasi inu onirọ eji ikeyi, ibe ke otoko ge me etete otoko ebi Ijeren înan̄a ichep me cherekeyi?”

⁴Me ata otu ewelegwe ofit iwele kan̄, ebi Ijeren enanama ntook ngwugwa, mè igwa ngwugwa ewọwọp iriọk melek ngwugwa esuuk inyi Awaji.

⁵Ebi Ijeren enenikidido me etete kiban̄ ibe mè ìre îkaan̄ otoko geege eyi ikanuge ìnigọọk otutuuk ene ìtitiin̄ me isi Okumugwem. Mije, ema mîgbaan̄ irọ inyan̄a-ibot òkup mbuban me etete kiban̄ ibe ke ebekpakpan̄ ogwu geelek ikanuge ìnigọọk otutuuk ene ìtitiin̄ me isi Okumugwem me Mijipa.

⁶Inu ya òrọrọ ebi otoko kè Benjamin, ebi ngwan̄ ebi Ijeren, onenifieek ebi Ijeren me lek enenen, ire lek ema ekitumu ibe, “Otuuk kè otoko ge înan̄a me etete ebi Ijeren ifieek ichep cherekeyi.

⁷Mgbọ keyi eji ebenirọrọ ikaan̄ nwa inyi ebi ìkwakwaan̄ isik me etete kiban̄, mije, eji mîwuuk lek igbaan̄ inyan̄a ibot me erieen̄ Okumugwem ibe ke eji kpebesa bọn ebibaan̄ kiji iche olom inyi ema?”

⁸Ema ekekidido si ibe mè ìre îkaan̄ otoko ebi Ijeren ge eyi ikasibige ìnu ìnigọọk otutuuk ene ìtitiin̄ me isi Okumugwem me Mijipa ye. Eneniweek imun̄ ibe ke ene geege ìkanan̄a me Jabes Giliadi ìsibi ìnu ìnigọọk otutuuk ene ìgbaan̄ ìtitiin̄ me Mijipa.

⁹Mije, mgbọ efukbe otu ifuk ebi ìnunu ntitiin̄ ya, mîweek imun̄ ibe ke ene geege ìkanan̄a me Jabes Giliadi ìnu ntitiin̄.

¹⁰Mije keya, ebi ntitiin̄ eneniria akọp mè obop ebi akọn̄ iba ibe esi Jabes Giliadi, mè ekpan̄ otutuuk ebi ìluk me ere ya, igbaalek ebibaan̄ mè nsabọn.

¹¹Mîtumu si inyi ema ibe, “Ìkpan̄ otutuuk ebirieen̄, mè ìkpan̄ si ebi ugane ebibaan̄, mè itele ebi nsabọn ibaan̄ ebi kperiọọn̄ ebirieen̄.”

¹²Mgbọ ife cha erebe Jabes Giliadi, ema emumun̄ efit obaak ebibaan̄ ini ebi kperiọọn̄ ebirieen̄ me etete ebi ama ya. Ema enenikpulu obaak ebibaan̄ cha isa isi ere m̀gba-ǹgwele ukan̄ ge me Silo me ido Kenan.

¹³Otutuuk ebi ntitiin̄ cha eneniria etip ijet ebi otoko kè Benjamin ikup me ewuuk Rimọn, mè irọ esuuk melek kiban̄.

¹⁴Me mgbọ ya, ebi otoko kè Benjamin enenigwu ikom ika, enenisa obaak ebibaan̄ Jabes Giliadi cha esabe me ògat ugwem ika iche olom inyi ema. Ire, otu ifuk ebibaan̄ cha ìkaso otu ifuk kiban̄.

¹⁵Ebi Ijeren efefieek ejit enenen mije otoko kè Benjamin, bak me lek, Okumugwem îrọ irek ibook me etete otoko ebi Ijeren.

¹⁶Ebi ugane Ijeren ekekitumu ibe, “Eyi ekpan̄be otutuuk ebibaan̄ otoko kè Benjamin isan̄a ikeyi, eji ebenijeje ikọt inyi ebirieen̄ ìkwakwaan̄ isik cha nwa iso ubọk?

¹⁷Ikaan̄ ike geelek eji eriọọn̄be, eji mêrọ inyi otoko kè Benjamin ikaan̄ bọn owot iman ebi ìbesibi inu me udun̄ kiban̄, inyi otoko ebi Ijeren geege ikachep ìnọọn̄.

¹⁸Eji kpebekọt isa bọn ebibaan̄ kiji iche olom inyi ema, mije, eji ebi Ijeren mîwuuk lek igbaan̄ inyan̄a ibot ibe, ‘Ifieek inyi ene geelek òsasa ogwu gwun̄ enenwaan̄ iche olom inyi ogwu otoko kè Benjamin.’ ”

¹⁹Ema enenikeek ibe ke ijọk Okumugwem ekirie me acha geelek me Silo òkigbet. Silo ìkup me agan̄ inyọn̄ me lek ama Beten, mè ikup me agan̄ osiki me lek ama Lebona, mè ikup me agan̄ mbum-ura me lek oniin̄ ekije inan̄a me Beten isi Sekem.

²⁰Ebi Ijeren enenitumu inyi ebi otoko kè Benjamin ibe, “Ìsi ìsi ìlet me emen uko gerep, mè ìkikpọ.

²¹Enyi isimun̄ nsabọn ibaan̄ Silo ekinan̄a isibi inu ibenigọọk ijop ifit me orirọ ijọk yi, ogwu enerieen̄ geelek me etete kinyi inan̄a me emen uko gerep ya isibi, mè itet ene ge me lek nsabọn ibaan̄ Silo cha, mè isa ifo ido Benjamin, inyi isi ikana nwa kan̄.

²²Ire ebi ute, mè ìre ebi ngwan̄ initap oyerebet me isi kiji, eji mêriaak ibe, ‘Ìkaan̄ ejit nsan me lek kiban̄, mije, eji kpekọt ikaan̄ nwa iso otutuuk kiban̄ me irak akọn̄. Ikan geege ìkatet enyi, mije, ìkare enyi esa bọn ebibaan̄ kinyi iche olom inyi ema.’ ”

²³Ike ebi Ijeren etemebe ebi otoko kè Benjamin, ubọk yaage si ke ema erọ. Mgbọ nsabọn ibaan̄ Silo esibibe inu, mè inikijop òjijop ijọk ya, ogwu enerieen̄ otoko kè Benjamin geelek îra itet ogwu enenwaan̄ ge me lek isa ifo, ogwu îtetbe ya îra inikana ogwu nwa. Ebi otoko kè Benjamin cha enenigwu ikom ifo lek ijọn̄ ìrot kiban̄, mè inisi ikpọk inama ama ile kiban̄ cha, mè inin̄ iluk.

²⁴Me mgbọ ya, ebi Ijeren enenitele ere ya, mè inigwu ikom ifon, ogwu ikup ofo lek ijọn̄ ebi otoko kiban̄, mè owot iman kiban̄, kpa ogwu mè ijọn̄ ìrot eyi kan̄.

²⁵Me ukot mgbọ cha, Ijeren ìkakaan̄ ubọọn̄ òkikpulu ema, ene geelek ìkirọ inu òneme ọmọ.