Read obolo Oyer 4 Bible Online

Oyer 4 - obolo bible

Oyer 4

¹Mgbọ Ewudu okwube iraka, ebi Ijeren ekpọkpọk ikirọ ijo inu me chieen̄ Okumugwem.

²Eya orọ, Okumugwem oneniyaka ema itap me ubọk kè Jabin, ene ge me lek ebi ubọọn̄ Kenan, ogwu òkup me Asọru ikikpulu. Sisera, ogwu isi akọn̄ kan̄, okekiluk me Aroset Agoyim.

³Ogwu ubọọn̄ Jabin yi ìkaan̄ efit uji akọn̄ onaan̄ge esabe okwukwut irom. Ikekisa unye ubọk ikikpulu ebi Ijeren, mè ikitutuku ema otuuk kè akọp acha iba. Ebi Ijeren enenito ito igwen Okumugwem ibe initap ubọk inyi ema.

⁴Mgbọ ya ke Dibọra, ogwu enenwaan̄ nriran, nwa kè Lapidot, ore ogwu ibot oyerebet me Ijeren.

⁵Îkaan̄ uti asaak ge òkup me etete Rama mè Beten, me inyọn̄ ijọn̄ ogoon̄ ogoon̄ otoko kè Iferem, eyi ekigwen Uti Asaak kè Dibọra. Mgbọ geelek ebi Ijeren isikaan̄ gọlọgọlọ me etete kiban̄, mîra isa gọlọgọlọ ya inu me isi kè Dibọra, îra ikup me irak uti asaak ya ikisibi oyerebet inyi ema.

⁶Dibọra oneniria ibe esi egwen Barak gwun̄ kè Abinowam me Kedes eyi òkup me Nafitali ejet ọmọ. Inenitumu inyi Barak ibe, “Okumugwem, Awaji ebi Ijeren, ìkinyi owu ida ibe ikeyi: ‘Sa akọp obop ebirieen̄ ebi Nafitali mè ebi Jebulọn gbaalek kwun̄ jibi akọn̄ sa si inyọn̄ ogoon̄ Tabọ.

⁷Mâleke Sisera, ogwu isi akọn̄ kè Jabin melek otutuuk uji akọn̄ kan̄ mè otutuuk ebi akọn̄ kan̄ inu me agba okwaan̄ Kison, mè iniyaka ema itap owu me ubọk.’ ”

⁸Barak onenifọọk ọmọ ibe, “Ire owu môgọọk emi isi, emi mâsi. Ire, ire owu òkpogọọk emi isi, emi si m̀kpasi.”

⁹Dibọra ofọfọọk ibe, “Ire ikeya, înwọn ma, emi mâgọọk owu isi. Ire, mije owu orọbe ikeyi, owu òkpokaan̄ umin geege me emen akọn̄ yi, mije, Okumugwem ìbosa me ubọk enenwaan̄ itim akọn̄ ikpan̄ Sisera.” Dibọra oneninan̄a igọọk Barak ije isi Kedes.

¹⁰Barak onenititiin̄ ebi otoko kè Jebulọn mè ebi otoko kè Nafitali. Akọp obop ebirieen̄ enanan̄a ikeke igọọk ọmọ isi akọn̄ ya. Dibọra si ogọgọọk ọmọ isi.

¹¹Me ike mgbọ yi, Eberi ogwu Keyin îra itetele ebi Keyin kechilọ, ìrere ebi owot iman kè Yobabu, nte nwa kè Mosis, mè isi igwuun̄ uwu ọfọ kan̄ iriaak me lek ikpele uti mbuban òkup me Sayananim, me agba lek ama Kedes.

¹²Etip onenire utọn̄ kè Sisera ibe ke Barak, gwun̄ kè Abinowam, îra inene isi inyọn̄ ogoon̄ Tabọ.

¹³Sisera otututuun̄ lek akọn̄, melek efit uji akọn̄ onaan̄ge esabe okwukwut irọ cha, igbaalek otutuuk ebi akọn̄ kan̄, mè inijibi akọn̄ inan̄a me Aroset Agoyim isi agba okwaan̄ Kison.

¹⁴Dibọra onenitumu inyi Barak ibe, “Nan̄a keke! Cherekeyi ore usen ya Okumugwem okanabe Sisera itap owu me ubọk. Kpọ, Okumugwem òkije me isi kwun̄.” Barak onanan̄a me inyọn̄ ogoon̄ Tabọ ije ikwala isibi, akọp obop ebi akọn̄ kan̄ ekekigọọk ọmọ me udun̄.

¹⁵Barak mè ebi akọn̄ kan̄ ebebene akọn̄ me lek kè Sisera, Okumugwem otatap wọlọwọlọ inyi Sisera melek otutuuk urum ebi akọn̄ kan̄, mè iwuwọlọ si otutuuk uji akọn̄ kan̄ cha, ekpakpan̄ ema enenen me otu oge akọn̄. Sisera otetele uji akọn̄ kan̄, mè ilibi ukot ukot inan̄a me isi akọn̄.

¹⁶Ire, Barak osasa akọn̄ ililaba otutuuk uji akọn̄ kan̄ cha mè ebi akọn̄ cha mege isi ire Aroset Agoyim. Otutuuk ebi urum akọn̄ kè Sisera ekwakwaan̄ isan̄a kpai, kubọk ene ge ikeyi ìkanwọnọ.

¹⁷Sisera olilibi ukot ukot isi itap ibot me emen uwu ọfọ kè Jayen, nwa kè Eberi ogwu Keyin, mije, ogwu ubọọn̄ Jabin ogwu Asọru mè ebi owot iman kè Eberi ogwu Keyin ìre òma.

¹⁸Jayen osisibi ikweek Sisera, mè itumu inyi ọmọ ibe, “Na, ogwu nte, na nin̄ uwu n̄a, kafieek owot.” Sisera oninin̄ uwu ọfọ kè Jayen. Ogwu enenwaan̄ ya osasa ekwut iwele ichit ọmọ.

¹⁹Sisera otutumu inyi ogwu enenwaan̄ ya ibe, “Ebek îrak emi, nye lek nyi emi sọntiik mun̄ ǹnwọ ǹsiki ebek.” Jayen onenichili otu iko ikpa anam mun̄ ebe okupbe me emen, mè itọkọ inyi, inwọnwọ. Isasa ekwut ichit ọmọ.

²⁰Sisera otutumu inyi Jayen ibe, “Keke me otu isotu uwu ọfọ kikpọ, ikaan̄ ogwu inu, mè inido ibe, ‘Ìre îkaan̄ ogwu òkup me uwu keyi?’ Fọọk ibe, ‘In̄-in̄, ke kpunu.’ ”

²¹Ire, Jayen nwa kè Eberi, onenimọnọ okpọ̀kọ uwu ọfọ melek abaracha ikaan̄ me ubọk, mè isa inween̄ lek ije isi ere Sisera olaakbe inwọnọ, lek îwọ enenen. Inenisa okpọ̀kọ ya itoon̄ itat me agba ibot kan̄, mè isa abaracha ya igon okpọ̀kọ ya itibi ibot kan̄ inwaan̄ ikam me ijọn̄. Sisera okwukwu.

²²Mgbọ Barak okinya ikana ikiweek Sisera, mè inire ere ya, Jayen onanan̄a isibi inikweek ọmọ, mè inibe ọmọ, “Na, ke mâjeen̄ owu ogwu owu okiweek.” Barak ogọgọọk inin̄ uwu, mè isi imun̄ Sisera okwube ilaak, melek okpọ̀kọ uwu ọfọ egonbe itibi agba ibot kan̄ inwaan̄ ikam me ijọn̄.

²³Awaji otitim ikpan̄ Jabin, ogwu ubọọn̄ Kenan, me isi ebi Ijeren, me usen ya.

²⁴Ebi Ijeren etetet lek inye, mè ikaan̄ efuuk ikitim akọn̄ ikeme Jabin, ogwu ubọọn̄ Kenan, mè ikpan̄ ọmọ me òta kan̄.