Read obolo Oyer 7 Bible Online

Oyer 7 - obolo bible

Oyer 7

¹Me ofit iwele kan̄, me ata otu ewelegwe, Jerubaali (òrere Gidiọn), mè urum ebi akọn̄ kan̄ eneninan̄a ije isi ire lek ogbuuruk mun̄ kè Arọdu, mè isi irieen̄ akọn̄ me ere ya. Urum akọn̄ ebi Midian okukup me agan̄ inyọn̄ me lek kiban̄, me iteke òkup me agba lek ogoon̄ More.

²Okumugwem onenitumu inyi Gidiọn ibe, “Ebi akọn̄ kwun̄ mîwa enenen iraka otu ifuk ebi mbasa isi itim akọn̄ ikpan̄ ebi Midian. Ǹkaweek ibe ebi Ijeren egugo lek enyi emi ibe ke îre efuuk kiban̄ onyan̄a ema isibi.

³Eya orọ, mgbọ keyi, tumu nyi ebi akọn̄ kwun̄ ibe, ene geelek òkitet ukpook, mè ikiran, ene ya isa ata mgbọ inan̄a itele ogoon̄ Giliadi yi, mè igwu ikom ifo.” Mgbọ ema enọbe ikeya, akọp obop ene iba mè obop iba efofon, iyayaka inisik akọp obop ene.

⁴Okumugwem onenikpọk itumu inyi Gidiọn ibe, “Ebi akọn̄ ìsisik mîwa si enenen. Mgbọ keyi, sa ema je si otu mun̄, inyi ǹgen̄ ema me ere ya me isi kwun̄. Me ere ya, ogwu geelek mbe owu, ‘Ogwugwu môgọọk owu isi,’ ogwugwa môgọọk owu isi. Ire, ogwu geelek mbe owu, ‘Ogwugwu ìkpogọọk owu isi,’ ogwugwa ìkpogọọk owu isi.”

⁵Gidiọn onenisa ebi akọn̄ cha ije isi otu mun̄ ya. Okumugwem onenitumu inyi ọmọ ibe, “Ebi geelek ìsasa alọm ilaka mun̄ kubọk ibo okilaka, òrere ebi ìtọtọbọ ekpe ikinwọ mun̄, san̄a ebiba sun̄ esese.”

⁶Otu ifuk ebi ìsasa ubọk ichibi mun̄ itap me otu ikilaka onenire efit ene ita gaalek, otutuuk kebilọ etọtọbọ ekpe ikinwọ mun̄.

⁷Okumugwem onenitumu inyi Gidiọn ibe, “Efit ebirieen̄ ita ebi ìsasa ubọk irak mun̄ ilaka cha, ebiba ke mbasa inyan̄a enyi isibi, mè ikana ebi Midian itap owu me ubọk. Otutuuk ebi ìsisik efon, ene geelek igwu ikom ifo uwu kan̄.”

⁸Gidiọn oneniria ebi Ijeren ìsisik cha ibe efon, mè itet efit ebirieen̄ ita cha ikaan̄. Inenikana otutuuk inorie mè otita ebibilọ efonbe itele cha inyi ema. Orieen̄ akọn̄ ebi Midian ìkup me ijọn̄, me emen iteke, sà Gidiọn mè ebi melek kan̄ ekup me inyọn̄ ogoon̄.

⁹Me eririeen̄ usen ya, Okumugwem oneninyi Gidiọn ida ibe, “Nan̄a keke, mè jibi akọn̄ kwala sibi si tim me lek orieen̄ akọn̄ ebi Midian, ke nra iyaka ema itap owu me ubọk.

¹⁰Ire owot ikifieek owu isisi itim ema akọn̄ me lek, sa Pura ogwu ikwaan̄ kwun̄ gbaalek kwala sibi si lek orieen̄ akọn̄ kiban̄ ya.

¹¹Osire ere ya, rieen̄ utọn̄ gban̄ inu ema ekitumu, ke efuuk mônin̄ owu me emen isisi itim ema akọn̄ me lek me orieen̄ akọn̄ kiban̄ ya.” Gidiọn onenisa Pura ogwu ikwaan̄ kan̄ igbaalek inween̄ lek ije ikwala igbet lek orieen̄ akọn̄ ebi Midian cha.

¹²Gidiọn omumun̄ ebi Midian, mè ebi Amalek, mè otutuuk ebi ìnan̄a me agan̄ mbum-ura etitiin̄be me iteke ya, mè iwa ichit ere kubọk akaka ituuk ogwook ichit uko. Aligọ kiban̄ ìwa ikup kubọk achiaan̄ agba awaji, kpekọt iriọọn̄ otu ifuk.

¹³Gidiọn onenire ere ya mgbọ enerieen̄ ge okikpa ilaak îmun̄be inyi ogwu unene. Ogwu enerieen̄ ya okekikpa inyi ogwu unene ibe ikeyi, “Mmun̄ ilaak ike owut fituru ge esabe akpa balì irọ okiwuwum ikana me emen orieen̄ akọn̄ ebi Midian, mè inigon uwu ọfọ ogwu akọn̄ ge, uwu ọfọ ya otọtọp ikana ikwuun̄, mè igbugbọ igwook.”

¹⁴Ogwu unene ofọfọọk ibe, “Ibot ilaak keya ìkayọt ma! Ìkalọlọ oge akọn̄ kè Gidiọn gwun̄ kè Jowas ogwu Ijeren ire eya! Awaji îra ikana ebi Midian, mè otutuuk orieen̄ akọn̄ kiban̄ itap Gidiọn me ubọk.”

¹⁵Mgbọ Gidiọn onọbe ilaak ya, mè inọ si ibot ilaak ya, itọtọbọ ebum inyi Awaji. Inenigwu ikom ifo orieen̄ akọn̄ ebi Ijeren, mè itumu inyi ema ibe, “Ìnan̄a ìkeke! Okumugwem îra ikana otutuuk ebi akọn̄ Midian itap enyi me ubọk.”

¹⁶Gidiọn onenifele efit ebi akọn̄ ita kan̄ cha irek ita, mè inyi ene geelek otita ge, mè ugọn̄ ukpọk emen melek otitọn̄ òkigegeen̄ me emen.

¹⁷Inenitumu inyi ema ibe, “Ìgwuun̄ emi chieen̄ me lek, mè ìrọ inu geelek mârọbe. Nsisa enyi ije igbet lek orieen̄ akọn̄ ebi Midian, inu geelek nrọbe, ìrọ si ikeya.

¹⁸Emi mè otutuuk ebi melek n̄a isiwut otita kiji, otutuuk kinyi si ìwut echi kinyi, mè ìtaan̄ ukpo ìtumu ibe, ‘Eyi Okumugwem, mè eyi kè Gidiọn.’ ”

¹⁹Gidiọn melek efit ebi akọn̄ kan̄ enenije igbet lek orieen̄ akọn̄ ebi Midian me òfo mgbọ òfuk mgbọ obosulu akọp mè iba eyi ejit eririeen̄, mgbọ ebi akọn̄ Midian enwunween̄be ebi ìkibem ere isan̄a. Ema ewuwut otita kiban̄, mè itọbọ ugọn̄ cha òkup ema me ubọk ibak.

²⁰Ikeya si ke urum akọn̄ ita cha ewut otita kiban̄, mè ibak ugọn̄ kiban̄, mè inisa ubọk agan̄ ujit itet otitọn̄ òkigegeen̄ cha ibene, mè itet otita ikaan̄ me ubọk agan̄ ulom kiban̄ ikikpọ mgbọ ebewut, mè initaan̄ ukpo ibe, “Oge akọn̄ Okumugwem, mè eyi kè Gidiọn!”

²¹Ema ekekeke inye me irek kiban̄ ikat ikana orieen̄ akọn̄ ebi Midian. Ire, otutuuk ebi Midian ekekililiin̄ iweek agan̄ ugwem, mè ikitaan̄ ukpo ike ema ekililiin̄.

²²Mgbọ efit otita ita cha okitaan̄, Okumugwem owuwuwọlọ ibot otutuuk ebi Midian, mè irọ inyi ene ge isa oge akọn̄ kan̄ itim akọn̄ me lek ogwu melek kan̄. Ebi akọn̄ Midian elibi ekot ekot isi ire Bet Sita, ikifo Jerera, mè isa ikeya iraka isi igwook me agba lek Eben Meyola eyi òkup igba Taba.

²³Etip onenisi ire lek ebi Ijeren kechilọ, ebi otoko kè Nafitali, mè ebi otoko kè Ase, mè otutuuk ebi otoko kè Manasi. Ema otutuuk enanan̄a isibi inu, mè inigọọk irieen̄ ebi Midian.

²⁴Gidiọn oneniria osat isibi isi otutuuk inyọn̄ ijọn̄ ogoon̄ ogoon̄ otoko kè Iferem, ibe esi elook ibe, “Ìsibi ìna ìnitim akọn̄ me lek ebi Midian. Ìbọkọ oniin̄ cha ema ekisa ije ire lek okwaan̄ Jodan, mè ìbọkọ mege ìsi ìre Bet Bara.” Otutuuk ebi Iferem esisibi inu, mè inibọkọ ijọn̄ lek okwaan̄ Jodan mege isi igwook me Bet Bara.

²⁵Ebi Iferem cha etetet si ene iba ebi isi akọn̄ Midian, ebi erieen̄ kiban̄ orebe Orep mè Jebu. Ekpakpan̄ Orep me lek ewuuk Orep, mè ikpan̄ Jebu me ere ichimi miin̄ kè Jebu. Ebi Ijeren etetet lek inye isa akọn̄ ililaba ebi Midian isan̄a. Mgbọ ema egwube ikom, ebeben ibot kè Orep mè ibot kè Jebu isa ijet Gidiọn. Mgbọ ya, Gidiọn ìkup me usaba okwaan̄ Jodan.