Read obolo III Jọn 1 Bible Online

III Jọn 1 - obolo bible

III Jọn 1

¹Emi ogwu ugane ntitiin̄ Awaji nkige ikpa etip keyi ijet owu, Gayọs ogwu mmun̄be me chieen̄ enenen me emen atikọ.

²Atata une n̄a, ǹkiriaak Awaji ibe mè lek kwun̄ inye, mè otutuuk inu ije ijaan̄ me lek kwun̄ me akpalek, kubọk îkije ijaan̄ owu me lek me emen inu eyi Awaji.

³Ejit îbele emi enenen mgbọ usini bọn Nte kiji enube, mè inikpa inyi emi ibe ke owu okeke inye me emen atikọ eyi Awaji, mè ikiluk ugwem me emen atikọ ya si inyi isi.

⁴Inu òkibele emi ejit ichit ìre ikekinọ ibe ke nsabọn n̄a me emen ichechieek mêkiluk ugwem me emen atikọ eyi Awaji.

⁵Atata une n̄a, owu onye lek enenen. Lek ìkawọ owu mgbọ geege me isisi ikwaan̄ inyi bọn Nte, ògak ge ebi ìrere ebi ichen me lek kwun̄.

⁶Ife chi mîkpa imumechieen̄ okaan̄be me lek kiban̄ inyi ebi ntitiin̄ Awaji me ere keyi. Soso, fo isi kitap ubọk nyi ema ikeya, inyi ije kiban̄ ifet, inyi Awaji me lek kan̄ si ibele ejit.

⁷Mije, îre isisi ikwaan̄ inyi Karais okisa ema ikijijen̄e ije cha. Ofifi si, ema kpekibọkọ ntap-ubọk geege me ubọk ebi ekachieekge me lek kè Karais.

⁸Eya orọ, îgbe ibe eji ebi ìchechieek eketap ubọk enyi ife cha, inyi eji egọọk ema egbaan̄ ubọk ekesi ikwaan̄ ilolook ebilene atikọ eyi Awaji.

⁹Sọntiik mgbọ òraraka, nge mgbidim ikpa ge ijet ntitiin̄ kinyi. Ire, Dioterefis, ogwu òkinwọọn̄ irere ogwu ibot, obọbọkọ ikpa ya, mè ikpọ emi chieen̄ isiki, mè ijit irọrọ inu ngebe me emen ikpa ya.

¹⁰Eya orọ, nsinu, mâgwen otutuuk ijo inu îkirọ isibi me isi ebi ene. Dioterefis îfiat eji enenen, mè ikitumu ikọ itoon̄ eji owuwa owuwa. Otutuuk kechi ìkaso ọmọ! Ikekijit si ibọbọkọ ebi ikwaan̄ kè Karais itap, mè igban si ofifi bọn Nte ebi ìweweek ibọbọkọ ife cha itap ibe ekabọkọ ìtap. Ogwu ibobọkọ ife cha itap, îra ilap ogwa isibi me emen ntitiin̄.

¹¹Atata une n̄a Gayọs, kakpọ ijo inu me ubọk ene ìrọ. Kpan̄asi ikeya kpọ ata inu me ubọk ene rọ. Ene geelek òkirọ ata inu ìre gwun̄ Awaji. Ire, ogwu geelek òkirọ ijo inu, ene ya ìkachichini melek Awaji.

¹²Sa Demetirọs kween̄ inu! Otutuuk ene ekitumu ata ikọ ibak ọmọ. Atikọ eyi òkup me emen kan̄ îkitumu si ata ikọ ofolek kan̄. Eji me lek kiji si mîkitumu ata ikọ ibak ọmọ. Owu oriọọn̄ si ibe ke ikọ eji ekitumu ìre atikọ.

¹³Nkaan̄ owuwa inu mbatumu inyi owu. Ire, ǹkaweek igege me ikpa.

¹⁴Nkaan̄ si ikpọchieen̄ ibe ke mâmun̄ owu me ikajọn̄ọge mgbọ. Eji isichichini, eji mêgbaan̄ itumu ikọ isi mè isi.

¹⁵Esuuk ikup inyi owu. Otutuuk ebi une kwun̄ me ere keyi mîtọp owu amọn. Tọp si otutuuk ebi une kiji ìkup me ere ya amọn nyi eji, me ene, me ene.