Read obolo Jud 1 Bible Online

Jud 1 - obolo bible

Jud 1

¹Emi Judu ogwu ikwaan̄ kè Jisọs Karais nge ikpa yi. Emi ìre ngwan̄ kè Jemis. Ǹkige ikpa yi ijet enyi ebi Awaji Ute omun̄be me chieen̄, mè igwen ibe enere ebi kan̄, enyi ebi Jisọs Karais ochitbe, mè ikibem.

²Nsan, mè esuuk, mè imumechieen̄ eyi Awaji ikup melek kinyi owuwa owuwa.

³Bọn Nte n̄a ebi mmun̄be me chieen̄, me sọntiik mgbọ òraraka, îyok emi me ejit enenen igege ikpa ijet enyi ofolek unyan̄a eyi Awaji onyan̄abe eji otutuuk ene. Ire, me mgbọ keyi, nyaka imun̄ ibe ke îkup me uyọt ibe emi ǹge ikpa keyi ǹsa ǹtap enyi efuuk me emen. Ìsa otutuuk unye kinyi ìkwukwulu, mè imun̄ ibe ke enyi mîkeke inye me emen ata etip eyi enyi echieekbe me lek, eyi Awaji okanabe itap me ubọk bọn kan̄. Ata etip yi ìkakinwene.

⁴Ǹkitumu ikọ yi, mije, îkaan̄ usini ebi ekariọọn̄ge Awaji ebi ìnwenween̄ lek iraka inin̄ etete kinyi me enyi ekariọọn̄ge. Ife chi mînwene atikọ eyi atata nnwọn eyi Awaji itap ubọk òneme ema, mè ikisa ejit nsan Awaji ito me isi ikiluk ugwem barabat kiban̄ ifo isi. Ema mîjit Jisọs Karais ogwu ọmọ gaalek orebe ogwu Ubọọn̄ kiji mè Okaan̄ kiji. Mîge me Ikpa Mbuban karake ukot ukot ibe ke Awaji ìkpolọlọ isusulu ebi ìkup ikeya osusut òmimin enenen.

⁵Mâsa irek keyi ikpọk ikeek enyi mfufuk enyi ewuukbe lek iriọọn̄ iraka. Me mgbọ Awaji osabe ebi kan̄, òrere ebi Ijeren, isibi me Ijipiti, îsan̄a ema otutuuk ene isibi me ògat ugwem, mè iyaka igwu ikom me mgburudun̄ mgbọ inikpaan̄ otutuuk ebi ekachieekge me lek kan̄ isan̄a kpai.

⁶Ofifi si, mgbọ usini ebi osat Awaji esabe me unye-ibot imọnọ irek unye eyi Awaji ikanyige ema, mè itele ere Awaji osun̄be ema, Awaji ìtatap ema mkpọn ire mgbọ ikakaan̄ge itata, mè ikpulu ema itap me emen ikpele udun ere ema ebekup mege ire òta Usen, òrere uga Usen mgbọ Awaji obosibi oyerebet me ibot otutuuk linyọn̄.

⁷Ikeya si, me mgbọ ebi ama Sodọm mè Gomora mè ama òkukup ikana ema esabe otutuuk ugwem kiban̄ itap me ijo barabat, mè bukubuku ugwem eyi ikagbege me etete ebilene, Awaji ìtatap ukan̄ iwọp ema ikpan̄ kubọk inu ijejeen̄, isa ijeen̄ ebilene ubọk osusut eyi ukan̄ ikakaan̄ge itata obokup.

⁸Îre ojelek inu yaage si ke ife chi ekirọ. Ema ekimumun̄ ilaak, mè ikisa ugwem barabat ifiat lek kiban̄ isan̄a, mè ijit ibe Awaji ikakpulu ema, mè ikinye chieen̄ inyi ebi osat Awaji ìkup me irek umin me emen inyọn̄.

⁹Ìrere ogwu ibot ebi osat Awaji, Maiken, me lek kan̄, me mgbọ îkigọọk Yọk igbini ikọ ofolek nkwukwu kè Mosis, ìkalululuk ìbene otu ìtumu ijo ikọ ìkeme Yọk. Kpan̄asi ikeya, ìtumu inyi Yọk ibe, “Okumugwem îgama owu!”

¹⁰Ire, ebi nlilọ ijejeen̄ chi ekpọkpọ ikitumu ijo otu ikọ ibak inu geelek ema ekakọtge ìgobo ìtet. Ema ekup kubọk anam oron, mije, ema kpekikọt ikeek ekiket sabum ekirọ inu. Inu geelek òninin̄ ema ejit mgbọ geelek, eya ke ema ekirọ. Inu chi geelek ema ekirọ, mè ibe ke ema mîriọọn̄, ore inu echi òkifiat ema, mè ikisa itip-oyerebet eyi Awaji ijet ema.

¹¹Ìkponwọn inyi ema. Ema ekirọ ojelek ijo inu Ken orọbe me ukot ikaan̄, mè ikigọọk si me ulọk ebek ikpoko ikirọ ijo inu kubọk Balam orọbe me ukot ikaan̄. Ema mînye ibot inyi Awaji kubọk Kora orọbe me ukot ikaan̄, mè ikwaan̄ si ita kubọk Kora okwube.

¹²Me ere geelek enyi egbaan̄be ititiin̄ ikirie inorie, mè ikibele ejit, ife chi ekikup me etete kinyi kubọk oka ekwut òbabat, mè ikitap enyi esip me isi. Ema ekpọkpọ ikup ikirie mè ikinwọ, kpekikeek ebi ofifi ife, kperiọọn̄ esip. Ema ekup kubọk ofifit oduku inyọn̄ eyi efet owutbe ikpọk, ìkayaka ìkọt ìrep ibot. Ema ekup kubọk uti eyi ìkakito mfut, ìrere me mgbọ kan̄. Ema ekup si kubọk uti eyi egbaan̄be ọmọ melek ugwun̄-ijọn̄ kan̄ ijibi, ikwukwu isan̄a isi ge.

¹³Ema ekup si kubọk ekoon̄ ogbururu. Ere geelek ema esibe, mîra ibum awo inu esip kiban̄ igwook, mè inan̄a itele. Ema ekup kubọk ntoronyan̄ ònanan̄a me irek kiban̄, mè ikijijen̄e. Awaji îneen̄ irek isun̄ iban ema me emen uga udun ere ema ebekup ire mgbọ ikakaan̄ge itata.

¹⁴Enọk ogwu òso owot iman jaaba bene me lek kè Adam ogwu ute, îben nriran ofolek ife chi, mè itumu ibe, “Kpọ, Okumugwem mônu melek obop obop ebi osat kan̄ ekariọọn̄ge otu ifuk,

¹⁵inisibi oyerebet me ibot otutuuk ebilene, mè itip otutuuk ebi kperiọọn̄ Awaji oyerebet, mije otutuuk ijo ugwem ema elukbe, mè ijo otu ikọ geelek echi ema ekisa itumu Awaji ilọ.”

¹⁶Ema chi ìre ife inu ìkakijot chieen̄, mè ire si ebi inu geelek ebi ofifi ife erọbe ìkakinwọn me lek. Inu geelek ijo ulọk kiban̄ okiweek, eya ke ema ekima irọrọ, mè ikitumu lek kiban̄ imin, mè ikisa unin̄i otu itumu ikọ melek ebi ene, inyi ema ekọt ekaan̄ inu geelek ema ekiweek.

¹⁷Ire, enyi ata ebi une n̄a, ìkeek inu ebi otuchieen̄ Okaan̄-ene Jisọs Karais ewuukbe lek itumu ibe ke môrọ.

¹⁸Ema etumu ibe, “Me mgburudun̄ mgbọ, owuwa ebi kperiọọn̄ Awaji mêsibi inu inikichak enyi ebi ìkigọọk Awaji. Ife chi ebekirọ inu geelek akpalek kiban̄ okiweek.”

¹⁹Ema chi ere ebi ìkitap icheche lek me etete ebi ene. Ema ìre ebi ekwukwu eyi linyọn̄ keyi okikpulu. Ekwukwu Awaji ìkakup me emen kiban̄.

²⁰Ire, enyi ata ebi une n̄a, ìtap ebi melek kinyi efuuk me emen, mè ìnama ugwem kinyi ìbene me emen ichechieek kinyi eyi òkup me mbuban ichit. Ìkiriaak si uriaak me unye eyi Ekwukwu Mbuban.

²¹Ìkigbaan̄ ìluk me emen imumechieen̄ eyi Awaji, mè ìkineen̄ lek ìban mgbọ Okaan̄-ene Jisọs Karais môkpọkbe inu, mè inisa me nsan kan̄ ikpulu enyi isi itap me emen ugwem ikakaan̄ge itata.

²²Ìkikaan̄ ejit nsan me lek ebi geelek ìkakaan̄ ejit òkup iba iba.

²³Ìjọk usini ene ìsibi me emen ukan̄, mè ìnyan̄a ema ìsibi. Ìkaan̄ ejit nsan me lek usini ene. Ire, ìrọ inu chi me ukpook, inyi ema ekasa enyi ìje ìlọ oniin̄. Ìcha ijo inu kiban̄, mè ìcha ìre lek ofọnti lek kiban̄ eyi ulọk ijo inu òkup ema me emen ofifilabe isan̄a kpai.

²⁴Mgbọ keyi, itọn̄ ikup inyi Awaji ogwu òbokọt ibem enyi, inyi enyi ekaje ìlọ oniin̄, mè ìnan̄a ìrọn̄. Ọmọ obokọt irọ inyi enyi etana esan̄a, mè isa me ikpele unwọọn̄ ikpulu enyi, inyi enyi enekeke me isi kan̄ eyi òkup me mbuban, mè ikaan̄ ujamgbugbo.

²⁵Itọn̄ ikup inyi Awaji, ogwu ọmọ gaalek orebe Awaji, mè ire si Ogwu Unyan̄a kiji sa me lek Okaan̄-ene Jisọs Karais. Umin, mè ubọọn̄, mè mkpulu, mè unye ìkup inyi ọmọ bene me karake ukot ukot òraraka. Ikup si inyi ọmọ me ukot keyi, mè mgbọ ikakaan̄ge itata. Ikup ikeya!