Read obolo Rufu 1 Bible Online

Rufu 1 - obolo bible

Rufu 1

¹Me ukot mgbọ ebi oyerebet ekikpulu me ido ebi Ijeren, sabum ema enibene ikikaan̄ ebi ubọọn̄, îkaan̄ mgbọ akan̄ onin̄be me ido ya. Ogwu enerieen̄ ge oneninan̄a me ama Beteleyem òkup me ido Juda ije ifo ido ebi Mowabu isi igọọk iluk, ọmọ melek ogwu nwa, mè ibot bọn ebirieen̄ iba kan̄.

²Erieen̄ ogwu enerieen̄ ya ìre Elimelek, erieen̄ ogwu nwa ore Nomi, sà erieen̄ bọn ebirieen̄ iba kan̄ cha ore Malọn mè Kiliyọn. Ema ìre ebi Efarata me Beteleyem òkup me ido Juda. Ema enenire ido Mowabu, mè iluk me agan̄ ya.

³Elimelek nlom kè Nomi onenikwu me ido Mowabu ya. Inenisik Nomi mè bọn ebirieen̄ iba kan̄.

⁴Bọn ebirieen̄ iba cha enenido ebibaan̄ ebi Mowabu me lek nwa. Erieen̄ ene ge me lek ebibaan̄ cha ìre Ọpa, sà erieen̄ kè ogwulọ ore Rufu. Ema mîluk me ido ya iso akọp acha.

⁵Me ere ya, Malọn mè Kiliyọn enenikwaan̄ si. Nomi onenikana ogwu ukpọk ubọk, bọn ìkayaka ìkaan̄, olom ìkayaka ìkaan̄.

⁶Nomi onenikup me ido ya inọ ibe ke Okumugwem îra ikeek ebi eyi kan̄ ebi Ijeren, mè inyi ema inorie. Eya orọ, ọmọ melek nwa ebi bọn cha etututuun̄ lek inanan̄a me Mowabu igwu ikom ika inu me ama kiban̄.

⁷Ikeya ke ọmọ melek nwa ebi bọn iba cha enibene ije inan̄a me ere ema elukbe ya inin̄ oniin̄ ikika inu me ido Juda.

⁸Me oniin̄ ya ema ekije, Nomi onenitumu inyi nwa ebi bọn iba cha ibe, “Ìgwu ìkom. Ogwu ikup, ifo uwu ogwu uga. Kè Okumugwem ikaan̄ ata ejit me lek kinyi ike enyi ekaan̄be me lek ebi ìkwakwaan̄ itele eji, mè ikaan̄ si me lek n̄a.

⁹Kè Okumugwem irọ inyi enyi me ge me ge ekaan̄ ofifi olom, mè ogwu ikup, isiki efuuk me uwu ogwu olom.” Ikọ ya òkitata me otu kan̄, ikakana ema ikat, mè ibe ema egbala chieen̄. Ema etataan̄ ukpo ikito ito.

¹⁰Ebi nwa ebi bọn cha enenibe ọmọ, “In̄-in̄, eji mêgọọk owu ifo igọọk ebi eyi kwun̄.”

¹¹Ire, Nomi okpọkpọk itumu inyi ema ibe, “Bọn n̄a, ìgwu ìkom ìfon. Ìre keke orọ enyi ebegọọk emi ije ni? Ìre emi mâkọt ikpọk imaan̄ bọn ebirieen̄ ebi ìbenire olom inyi enyi ni?

¹²Bọn n̄a, ìgwu ikom ìfon. Emi nkan iraka olom. Ire kubọk ǹkakaan̄ ikpọchieen̄ ibe ke olom mônu emi lek, mè ire mbabat olom ya me eririeen̄ chereyi, mè inimaan̄ bọn ebirieen̄,

¹³ìre enyi mêkup inyi ema emiin̄ enin̄ ene? Sà ìre enyi mêbak me lek kiban̄ ijit lek kinyi olom ni? In̄-in̄, bọn n̄a, ìkatat ikeya. Emi ke îjat me lek igak enyi, mije, ubọk Okumugwem îtoon̄ emi inunọọn̄ me lek.”

¹⁴Ema ekpọkpọk ichili ito ibook. Ọpa okakana ogwu uga olom ikat, mè ibe iriọọn̄ ubọk ije, mè igwu ikom ifo eyi kan̄. Ire, Rufu ìkachieek iwawaka inan̄a itele Nomi.

¹⁵Nomi obebe ọmọ, “Kpọ, ogwu uwuk kwun̄ ire ogwulọ, òkifo igọọk ebi kan̄ mè awaji ema ekiriaak. Owu si, gọọk ogwu uwuk kwun̄ fo.”

¹⁶Rufu ofọfọọk ibe, “Kayaka ìfiin̄ efuuk ìkiriaak emi ibe emi ǹgwu ǹkom m̀fo, mè ǹtele owu. Mije, ere geelek owu obosi, ere ya ke emi mbasi. Ere geelek owu obokup, ere keya si ke emi mbakup. Ebi kwun̄ mêre ebi n̄a. Awaji kwun̄ si, môre Awaji n̄a.

¹⁷Ere geelek owu okupbe ikwu, ere ya ke emi mbakup ikwu, ere keya si ke ebefuun̄ emi. Kè Okumugwem ikalọlọ isusulu emi ikpele osusut ire ofifi inu, ilọ me lek mkpa, iwaka emi isan̄a owu me lek.”

¹⁸Mgbọ Nomi omun̄be ibe ejit ke Rufu înye ikup gboi igọgọọk ọmọ ifo, irariaan̄ otu, ìkayaka ìsisaak ibe igwu ikom ifo.

¹⁹Ikeya ke ema ene iba egbaan̄ ije ika inire ama Beteleyem. Mgbọ ema ekinin̄ emen ama ya, otutuuk ama ofafan̄a mije kiban̄. Ebibaan̄ ekekijiin̄ lek ibe, “Ìin̄-iin̄-ìin̄! Ìre ìfat ire Nomi ire ogwu eji ekimun̄?”

²⁰Nomi onenitumu inyi ema ibe, “Ikayaka ìgwen emi Nomi,[1] ìgwen emi Mara,[2] mije, Okumugwem Ogwu Òkaan̄ Unye Geelek îrọ inyi ugwem n̄a ijat enenen.

²¹Mgbọ njebe, ubọk n̄a ìjojot. Ire, Okumugwem ìnisa emi ukpọk ubọk ika. Enyi ejeje ikigwen emi Nomi? Okumugwem îgba udun̄ ifit emi. Okumugwem Ogwu Òkaan̄ Unye Geelek îjak emi ikọọn̄.”

²²Ikeya ke Nomi onan̄a me Mowabu ika, ọmọ melek nwa ogwu gwun̄, Rufu, ogwu Mowabu. Ema eka inire Beteleyem me mgbọ ebenebe ikisọp akpa balì me uko.