Read obolo Rufu 2 Bible Online

Rufu 2 - obolo bible

Rufu 2

¹Nomi îkaan̄ ene ge me lek ebi ngwan̄ ogwu olom. Ene ya ìre ogwu ototun̄ ukan̄ ebi kè Elimelek, mè ire isi ene òsisibi isi, mè ikaan̄ ubọk. Erieen̄ ene ya ìre Bowaji.

²Usen ge, Rufu ogwu Mowabu ya onenitumu inyi Nomi ibe, “Mâgọọk isibi isi ugbala me emen uko ere ekisọp akpa balì. Ire ogwu ima mè ichieek, mâkije igọọk ebi ìkisọp akpa cha me udun̄ ikirọọn̄ ngigen̄e akpa ebi uko eteen̄be isik.” Nomi obebe ọmọ, “Înwọn ma, gwun̄ n̄a, si ma.”

³Rufu onanan̄a ije isi ire emen uko ge, mè igọọk ikirọọn̄ akpa me udun̄ ebi ìkisọp akpa me uko ya. Ikpọkpọ inirọn̄ itat ikeya inyi ọmọ ibe ke uko ya ìre eyi kè Bowaji, ogwu ototun̄ ukan̄ ebi kè Elimelek.

⁴Me òchichini, Bowaji onanan̄a me Beteleyem inu me uko ya, mè itọp ebi ikwaan̄ amọn ibe, “Okumugwem ikup melek kinyi.” Ema echechieek ibe, “Okumugwem igbana owu.”

⁵Bowaji onenido gwun̄ enerieen̄ ogwu îsabe ito me ibot me lek ebi ìkisọp akpa me uko ya ibe, “Gwun̄ enenwaan̄ keyilọ ìre ekene?”

⁶Ogwu ibot ikwaan̄ ya ofọfọọk ibe, “Îre gwun̄ enenwaan̄ Mowabu ogwu ògọgọọk Nomi inan̄a me ido Mowabu ika.

⁷Înu inibeek ibe, soso, etele inyi ọmọ igọọk ikije me udun̄ ebi ìkisọp akpa ikirọọn̄ echi ngigen̄e cha, mè ikititiin̄ igwook. Ikeya ke îgọọk inin̄ uko. Karake ewelegwe inire mgbọ keyi, ìkasisiki efuuk, ilọ me sọn̄ mgbọ ge yi kpọi înin̄be emen uwu ọfọ ikitọbọ efuuk.”

⁸Bowaji onenisi itumu inyi Rufu ibe, “Gwun̄ n̄a enenwaan̄, gban̄. Kasi ofifi uko ìsi ìrọọn̄ akpa. Kananan̄a si me ere keyi. Tet lek riaak me lek ebibaan̄ ìkisi ikwaan̄ me uko inyi emi.

⁹Gwuun̄ chieen̄ me emen uko ere ebi ikwaan̄ chi ekisọp akpa, mè kigọọk ema me udun̄. Mwuuk lek itumu inyi ebirieen̄ ebi ikwaan̄ ibe ekasisaak owu. Mgbọ geelek ebek orakbe owu, si lek ugọn̄ mudim ebi ikwaan̄ ekitap mudim ijot emen, si chibi mun̄ nwọ.”

¹⁰Ikọ ya itata Bowaji me otu, Rufu ogegele igwook, mè ikana isi ichit me ijọn̄ itọbọ ibot inyi ọmọ, mè ibe, “Ìre keke ke nrọ eyi owu onimun̄ emi, mè ikaan̄ emi ata ejit me lek ikeyi, ogwu ichen ikike òbet lek n̄a?”

¹¹Bowaji ofọfọọk ọmọ ibe, “Mîriọọn̄ ubọk ikpa otutuuk inu owu orọbe inyi nga nlom kwun̄ karake nlom kwun̄ okwube inyi emi. Mîkpa si ubọk owu otelebe nte kwun̄ mè nga kwun̄, mè ama iman kwun̄, mè iyaka ika iniluk melek ebi owu òkawuwuuk lek ìriọọn̄.

¹²Okumugwem môkpe owu mkpukpe ata inu owu orọbe. Kè Okumugwem, Awaji ebi Ijeren, ogwu owu onube lek initap ibot me irak uwop kan̄ ikwek lek, ikpe owu mkpukpe ata ubọk ikwaan̄ kwun̄ òjot òjot.”

¹³Rufu obebe ọmọ, “Ogwu nte, owu okaan̄ ata ejit me lek n̄a. Mije, owu orọ inyi efuuk n̄a ire ijọn̄, mè itumu ikọ ònyenye emi ogwu usun̄ kwun̄ enenwaan̄ ejit, ubọk geelek ibe ke emi m̀kpakọt ikup kubọk ene ge me lek ebi ikwaan̄ kwun̄ ebibaan̄.”

¹⁴Me mgbọ eberie inorie, Bowaji otutumu inyi Rufu ibe, “Na me ere keyi, na mọnọ fituru kpọkọ sa gọọk jiin̄ me emen otọn̄ miin̄ agburu taka.” Rufu osisi igọọk ebi ìkisọp akpa me uko ya ikup. Bowaji onyinyi ọmọ akpa echi ekakala. Itataka, mè itaka ijot, mè isik.

¹⁵Mgbọ Rufu oriebe inorie isan̄a, inanan̄a ikeke ikpọk isi ikirọọn̄ akpa. Bowaji oneninyi ebi ikwaan̄ kan̄ ida ibe, “Ìtele inyi Rufu irọọn̄ akpa me ere geelek, ikerere me etete èdọ echi etitiin̄be igwook cha, ikasisaak.

¹⁶Ògak ge, ìkiwọọk si usini uti akpa me lek efit etitiin̄be igwook cha ikigwook inyi ọmọ irọọn̄ igbaalek. Ikarọ ọmọ inu esip.”

¹⁷Rufu îrọọn̄ akpa me uko ya mege inire otu ikakwun̄, mè inisulu echi îrọọn̄be cha igen̄, ijojot otu akọp iko iba mè iba.

¹⁸Ibeben isa ifo ama, ogwu uga-olom omumun̄ ikeke akpa îrọọn̄be. Rufu osasan̄a si akpa îtakabe ijot isik ya isa inyi ogwu uga-olom.

¹⁹Ogwu uga-olom onenido ọmọ ibe, “Ìre ere owa ke osi ikwaan̄ chereyi? Emen uko eyi owa ke ogọọk irọọn̄ akpa? Awaji igbana ene ya ogwu òmumun̄ owu, mè ikaan̄ owu ata ejit me lek.” Rufu otutumu ogwu ọmọ ogọọkbe isi ikwaan̄ me uko kan̄ inyi ogwu uga-olom, mè itumu si ibe ke erieen̄ ogwu ọmọ ogọọkbe isi ikwaan̄ chereyi ìre Bowaji.

²⁰Nomi otutumu inyi nwa ogwu gwun̄ ibe, “Jei, kè Okumugwem ogwu ìkakilọ ijejeen̄ ata ejit kan̄ me lek ebi ìkup me ugwem mè ebi ìkwakwaan̄, igbana ogwu ene ya.” Ikọ ya itata Nomi me otu, itutumu si inyi Rufu ibe, “Kpọ, ogwu ene ya îriaak eji me lek. Ọmọ ìre ene ge me lek ebi uwu ebi ìrere ebi ìrie àkpa kiji.”

²¹Rufu ogwu Mowabu obebe, “Mkpọ si îtumube ibe emi ǹkenkup melek ebi ikwaan̄ kan̄ mege ire mgbọ mêsọpbe otutuuk akpa isan̄a me uko kan̄.”

²²Nomi otutumu inyi Rufu nwa ogwu gwun̄ ibe, “Gwun̄ n̄a, înwọn ibe owu òkogọọk ebi ikwaan̄ kan̄ ebibaan̄ òkosibi òsi uko kiban̄. Mije, ire osi inin̄ uko ebi ofifi ife, owu môkọt iben unan.”

²³Rufu otetet lek iriaak me lek ebibaan̄ ebi ikwaan̄ uko kè Bowaji, mè ikigọọk ema isi uko isi ikirọọn̄ akpa mege ire mgbọ esọpbe akpa balì mè akpa wit isan̄a me uko. Otutuuk mgbọ ya, Rufu ìluk melek ogwu uga-olom.