Read obolo I Sam 10 Bible Online

I Sam 10 - obolo bible

I Sam 10

¹Me ere ya ema ekekebe, Samien onenisan̄a ifu aran̄ olifu okupbe me emen isibi, mè initọkọ aran̄ ya igwook Sọọlu me ibot, mè ikana ọmọ ikat, mè itumu inyi ọmọ ibe, “Kpọ! Okumugwem îra itọkọ owu aran̄ me ibot, inyi owu ònore ogwu ibot mkpulu ònyi ebi kan̄, ebi îkaan̄be me ìrot.

²Osinanan̄a me ere keyi chereyi ikije ifo, me oniin̄ ije kwun̄, owu môchichini ebirieen̄ iba me agba lek udọn̄-ufuun̄ kè Rechen, me Selisa eyi òkup me oke ijọn̄ ebi otoko kè Benjamin. Ebirieen̄ chi mêtumu inyi owu ibe kè mîra imun̄ uman inyinya akpan cha echi owu okijijen̄e ikana ikiweek. Mgbọ keyi, ke nte kwun̄ ìkayaka ìkeek ekiket ofolek anam cha. Kpan̄asi ikeya, ke ìyaka inikifieek ejit mije kwun̄, mè ikibe mè ìre ọmọ ìbonikirọrọ mije gwun̄ kan̄.

³“Osinan̄a me ere keya ije inyi isi, mè ije igbet lek ilip mbuban òkup me Tabọ, ebirieen̄ ita ebi ìbenene isi itọbọ ebum inyi Awaji me Beten, mêje ikweek owu me oniin̄. Ene ge okaan̄ bọn orie ebot ita me ubọk, sà ene ge okaan̄ owut fituru ita me ubọk, sà ene ge okaan̄ ogbokot ikpa anam ge me ubọk mè miin̄ me emen.

⁴Ife cha mêtọp owu amọn, mè inyi owu owut fituru iba. Owu môbọkọ fituru cha me ubọk kiban̄.

⁵“Osinan̄a me ere keya ikije inyi isi, owu mônenire Gibiya me inyọn̄ orioon̄ Awaji ere ebi akọn̄ ebi Filisia ekikup. Osije iboraka inin̄ emen ama ya, owu môchichini otu ogbo ebi nriran ekinan̄a me ere mbuban ama ya me inyọn̄ orioon̄ ikigele isibi inu. Ike ema ekije, owu mômun̄ ema ekikwak uneen̄ ile mè ekpete mè otita mè uneen̄ ija isa ikije, mè ikiben si nriran.

⁶Ekwukwu Okumugwem môneninin̄ ijot emen kwun̄, owu si môbebene ikiben nriran melek kiban̄, mè iyaka ininwene ikana ikup kubọk ofifi ene.

⁷Inu ijejeen̄ chi isinirọ iso me lek kwun̄, owu môrọ inu geelek òninin̄ owu ubọk, mije, Awaji ọmọ òwa melek kwun̄.

⁸“Owu môdasi ije isi ire Giligan me isi n̄a. Emi si mânenichichini owu me ere ya, mè inigwa ngwugwa ewọwọp iriọk, mè igwa si ngwugwa esuuk. Owu môkup usen jaaba me ama ya iban emi. Nsinu, mâniteme owu inu owu oborọ.”

⁹Sọọlu itetele Samien, mè igwu isi ikom ibonin̄ oniin̄ ije kan̄, Awaji onwenwene Sọọlu, mè ininyi ọmọ ayaya ejit. Otutuuk inu ijejeen̄ Samien otumube cha orọrọ iso me lek kan̄ me usen yaage.

¹⁰Sọọlu mè ogwu ikwaan̄ kan̄ ijeje inire Gibiya, otu ogbo ebi nriran ekakana isibi inichichini ọmọ. Ekwukwu Awaji oninin̄ ijot ọmọ emen, ibebene ikiben nriran me etete ebi nriran cha.

¹¹Mgbọ otutuuk ebi ìrọriọọn̄ Sọọlu emun̄be ike îkiben nriran me etete ebi nriran, ema ekekitumu inyi ebi melek kiban̄ ibe, “Kpasi nke nke inu ire eyi me lek gwun̄ kè Kis? Ìre Sọọlu ọmọ òwa si me otu ifuk ebi nriran ni?”

¹²Ene ge me lek ebi ama ya onenido ibe, “Mgbọ, ìre ekene orere nte kiban̄ ni?” Îre ikeyi ke urọk ya osa ibene, eyi ekito ibe, “Ìre Sọọlu si ọmọ òwa me otu ifuk ebi nriran?”

¹³Mgbọ Sọọlu obenbe nriran isan̄a, ineninan̄a inu me ere mbuban ya.

¹⁴Me ere ya ke ngwan̄ nte kè Sọọlu onido Sọọlu mè ogwu ikwaan̄ kan̄ ya ibe, “Ìre ere owa ke enyi esi?” Sọọlu ofọfọọk ibe ke ema esi ikiweek uman inyinya akpan cha òchechep. Ire, mgbọ ema ekamun̄ge, ema esisi lek kè Samien.

¹⁵Ngwan̄ nte kè Sọọlu ya onenitumu inyi Sọọlu ibe, “Kpa nyi emi nu inu Samien otumube inyi enyi.”

¹⁶Sọọlu onenifọọk ngwan̄ ogwu ute ibe ke Samien îtutumu inyi ema ibe ke mîra imun̄ anam cha. Ire, ìkakpa inu geege Samien otumube òfo me lek ọmọ irere ogwu ubọọn̄ ìnyi ngwan̄ ogwu ute.

¹⁷Samien onenigwen otutuuk ebi Ijeren ititiin̄ me isi Okumugwem me Mijipa,

¹⁸mè initumu inyi ema ibe, “Okumugwem, Awaji ebi Ijeren ìbe, ‘Emi me lek n̄a nsan̄a enyi ebi Ijeren isibi me Ijipiti, mè inyan̄a enyi isibi me ubọk ebi Ijipiti mè ubọk otutuuk ebi ofifi ido geelek ìkitutuku enyi.’

¹⁹Ire, me cherekeyi, enyi mîjit Awaji kinyi, ogwu ònyanyan̄a enyi isibi me emen otutuuk ufialek geelek mè otutuuk kwulukwulu òkekeme enyi. Enyi ekakat ejit ikido ibe emi ǹnyi enyi ogwu ubọọn̄ ogwu òbokikpulu enyi. Mgbọ keyi, ìsibi ìna ìnikeke me isi Okumugwem, me otoko me otoko me urum me urum.”

²⁰Samien onenititiin̄ otutuuk otoko ebi Ijeren, mè iniroon̄ nriroon̄, egogobo otoko kè Benjamin.

²¹Inenisan̄a ebi otoko kè Benjamin isibi me owot iman me owot iman, egogobo owot iman kè Matiri. Inenikpọk iroon̄ nriroon̄ me ibot ebi owot iman kè Matiri, egogobo Sọọlu gwun̄ kè Kis. Eneniweek Sọọlu me etete ebi ene, ire, kpemun̄.

²²Ema enenikpọk ido Okumugwem ibe mè ìre ogwu enerieen̄ ya înu me ere yi. Okumugwem ofọfọọk ibe ke înu, ke ọmọ òwa oletbe me etete nroon̄ ije ebi ene etitiin̄be isun̄.

²³Ebi ene elilibi isi, mè isi itaba ọmọ isibi isa inu, inyi inikeke me isi otutuuk ene. Sọọlu îsibi ìkeke, mè ijọn̄ọ isaba iraka otutuuk ebi Ijeren.

²⁴Samien onenibe ebi Ijeren, “Ìkpọ, ogwugwu ore ogwu Okumugwem ogobobe, mije, me etete otutuuk ebi Ijeren, kpunu ogwu òbet lek kan̄.” Otutuuk ene edidimi igwook, mè ikitaan̄ ukpo ibe, “Ogwu ubọọn̄, luk ugwem jọn̄ọ!”

²⁵Samien oneniben ikan òkikpulu irek ubọọn̄ ikpa iwele inyi otutuuk ene, mè ige otutuuk itap me ikpa, mè iniben isi isun̄ me isi Okumugwem. Mgbọ îrọbe isan̄a, ineniria otutuuk ebi ene ifon uwu kiban̄. Ogwu ikup, ofo uwu kan̄.

²⁶Sọọlu me lek kan̄ si ogwugwu ikom ifo uwu kan̄ me Gibiya. Ebi akọn̄ ebi Awaji ochakbe ubọk me ejit egọgọọk ije isa ọmọ iban.

²⁷Ire, ebi ijo ife ìkitap ufialek ekekitumu ibe, “Ìre ogwugwu ìbojeje ikọt inyan̄a eji isibi me ubọk ebi ochicha kiji?” Ema ekekikpọ ọmọ isiki chieen̄, kpeche uche geege inyi ọmọ kubọk ogwu ubọọn̄ kiban̄. Ire, Sọọlu ìkasan̄a amọn ìnyi ema.