Read obolo I Sam 11 Bible Online

I Sam 11 - obolo bible

I Sam 11

¹Nayas, ogwu ubọọn̄ ebi Amọn onenijibi akọn̄ isi ama Jabes òkup me agan̄ Giliadi, mè ikpa mbin akọn̄ ikana ama ya. Otutuuk ebi ama ya enenitumu inyi Nayas ibe, “Na, na gọọk eji gbaan̄ nyan̄a ibot, ke eji mêkana usun̄ inyi owu.”

²Nayas onenifọọk ema ibe, “Sabum mâgọọkbe enyi igbaan̄ inyan̄a ibot, mâdadasi irọkọ chieen̄ agan̄ ulom otutuuk ebi ama kinyi, inyi eya mônenikana inu esip inyi otutuuk ebi Ijeren.”

³Ebi ugane ama Jabes efọfọọk ọmọ ibe, “Nyi eji usen jaaba, inyi eji eria etip ekana otutuuk ido ebi Ijeren, mè ìre môkaan̄ ebi mêkọtbe inyan̄a eji isibi me ubọk kwun̄. Ire kpunu ene geege, eji mênan̄a isibi isa lek kiji ijet owu. Ikaan̄ inu geelek oweekbe irọrọ eji, owu môkọt irọ.”

⁴Mgbọ ebi osat esabe etip ya inilook me Gibiya, ama Sọọlu olukbe, ama odidimi, ebi ene ekekitaan̄ ukpo ikito ito.

⁵Me ike mgbọ ya, Sọọlu ìkinanan̄a me oron ere îkikpukpo anam ikije me udun̄ urum eriembuuk kan̄ ikika inu. Mgbọ înọbe okput ito ya, ikekido inu òrọrọ. Ebi ene eneniben etip ebi Jabes ya ikpa inyi Sọọlu.

⁶Sọọlu inọnọ etip ya, Ekwukwu Awaji oninin̄ ijot ọmọ emen. Ejit onanaan̄ ọmọ enenen.

⁷Itetet eriembuuk iba ikpan̄, mè ibak, mè iteen̄ okpọkọ anam cha itaak me ubọk ebi osat ibe esa ejet otutuuk ama ido ebi Ijeren, mè elook ebi ama cha geelek ibe, “Ene geelek ogwu ìkanan̄a ìsibi ìnu ìnigọọk Sọọlu melek kè Samien ìsi akọn̄, ike esekbe eriembuuk chi, îre ikeya si ke ebesek otutuuk anam geelek ene ya okaan̄be.” Ukpook Okumugwem oninin̄ ijot emen ebi Ijeren. Otutuuk ene enanan̄a isibi me ejit ge, mè ibem lek akọn̄. Kpunu ogwu òsisik.

⁸Sọọlu onenititiin̄ otutuuk ebi ìsisibi inu cha me Bejek. Otu ifuk ebi Ijeren ìsisibi inu orere efit obop ebi akọn̄ ita, sà ebi Juda ìsisibi inu ere akọp obop ene ita.

⁹Sọọlu onenitumu inyi ebi osat cha ìnunu ibe, “Ìsi ìlook ebi ama Jabes me Giliadi ibe, sabum ura obonye me iyakwut, mênyan̄a enyi isibi.” Mgbọ ebi Jabes ebọkọbe etip yi, ema ebebele ejit enenen.

¹⁰Ebi Jabes cha eneniria ufọọk-otu ijet Nayas ibe, “Iyakwut, eji mênan̄a isibi isa lek kiji ijet enyi, inyi enyi erọ eji inu geelek òneneme enyi.”

¹¹Me ofit iwele kan̄, Sọọlu ofefele otutuuk ebi Ijeren cha irek ita. Me obum egwe, ebi Ijeren ejijibi akọn̄ ibum inin̄ etete orieen̄ akọn̄ ebi Amọn, mè ikpan̄ ema mege inye egwe. Ebi ìkwakwaan̄ isik elilim ibubeek, ge ìkariọọn̄ ere ge otapbe ibot. Ene iba kpegbaan̄ isik me ere ge.

¹²Ebi ene enenikido Samien ibe, “Mọmọ ife cha ebi ìkibe ke Sọọlu ìkabokpulu eji? Ìsan̄a ema ìsibi, inyi ekpan̄ ema efiin̄.”

¹³Ire, Sọọlu obebe ema, “In̄-in̄, cherekeyi ìkare usen ebekpan̄ ene geege, mije, Okumugwem înyan̄a eji ebi Ijeren isibi me ubọk ebi ochicha.”

¹⁴Samien onenitumu inyi otutuuk ebi Ijeren ibe, “Ìna mè eji enesi Giligan, inyi eji esi erọ Sọọlu ejot kubọk ogwu ubọọn̄ kiji.”

¹⁵Otutuuk ebi Ijeren enenigbuku ije isi Giligan, mè inirọ Sọọlu ijot kubọk ogwu ubọọn̄ kiban̄ me isi Okumugwem me Giligan. Ema ekukup me ere ya igwa ngwugwa esuuk me isi Okumugwem. Sọọlu mè otutuuk ebi Ijeren ebebele ejit enenen me ere ya, mè irie ijọk.