Read obolo I Sam 12 Bible Online

I Sam 12 - obolo bible

I Sam 12

¹Samien onenitumu inyi ebi Ijeren ibe, “Ìkpọ, emi mgban̄ utọn̄ me ida kinyi me inu geelek enyi etumube. Nra ito ubọọn̄ inyi enyi, ike enyi edobe.

²Mgbọ keyi, kpọ ogwu ubọọn̄ kinyi ire ogwa melek kinyi okikpulu enyi. Ire me lek n̄a, emi nra ikan, mè itibi isọọn̄ igak ibot. Ire me lek nsabọn n̄a, kpọ ema ire eba melek kinyi. Enyi mîriọọn̄ ijaan̄ lek ibe ke emi m̀bene me karake mgbọ nkupbe ijija ikikpulu enyi mege inire cherekeyi.

³Mgbọ keyi, kpọ emi ire ogwu me etete kinyi! Me isi Okumugwem, mè isi ogwu ubọọn̄ ogwu Okumugwem otọkọbe aran̄ me ibot, ìtumu-nu, ìre îkaan̄ ogwu ntetbe orie eriembuuk kan̄ mè ìyaka ire inyinya akpan kan̄ ibọkọ? Ìre îkaan̄ ogwu mfeen̄be? Sà ìre îkaan̄ ogwu ntutukube? Ìre îkaan̄ ogwu nriebe udun̄ me ubọk, mè isa me ikeya ichit chieen̄ isibi nlilọ oyerebet inyi ene? Ìtumu ìsibi, ke mâyaka ikpe inyi enyi!”

⁴Otutuuk kiban̄ efọfọọk ibe, “In̄-in̄, owu òkafeen̄ eji, òkatutuku eji, ìkakakaan̄ si inu geege otetbe ibọkọ me ubọk ene geege me etete kiji.”

⁵Samien onenitumu inyi ema ibe, “Okumugwem ore ogwu ata-ikọ, ogwu Okumugwem otọkọbe aran̄ me ibot ìre si ogwu ata-ikọ me etete kiji cherekeyi, ibe ke kpunu inu kinyi geege òkup emi me ubọk.” Ema echechieek igwook ibe, “Iin̄, Okumugwem ìre ogwu ata-ikọ.”

⁶Samien onenitumu inyi ebi Ijeren ibe, “Îre Okumugwem ogobo Mosis melek Erọn isa irọ ebi ibot, mè ikpulu ebi nte nte kinyi isibi me ido Ijipiti.

⁷Mgbọ keyi, ìna ìnikeke me isi Okumugwem, inyi ǹtumu otutuuk ata inu geelek Okumugwem orọbe inyi enyi mè ebi nte nte kinyi ǹnyi enyi. M̀batumu inu chi isibi kubọk inu ata-ikọ ikeme enyi.

⁸“Mgbọ Jekọp mè ebi nte nte kinyi enube me Ijipiti, ebi nte nte kinyi etoto ito igwen Okumugwem me emen ufialek kiban̄. Okumugwem ogogobo Mosis melek Erọn, ema enenikpulu ebi nte nte kinyi isibi me Ijipiti, mè isa ema initap me inyọn̄ ijọn̄ keyi.

⁹“Ire, ebi nte nte kinyi ewuwuuk Okumugwem Awaji kiban̄. Okumugwem oyayaka ema itap me ubọk kè Sisera, ogwu ibot akọn̄ ebi Asọru mè ubọk ebi Filisia mè ubọk ogwu ubọọn̄ ebi Mowabu. Ife chi etitim akọn̄ me lek ebi nte nte kinyi.

¹⁰Ema etataan̄ ukpo ito ito igwen Okumugwem ibe, ‘Iin̄, eji mîrọ ijo inu, mije, eji mîtele owu Okumugwem, mè iyaka isi ikitọbọ ebum inyi Baali mè Asitoret. Mgbọ keyi, soso, nyan̄a eji sibi me ubọk ebi ochicha kiji, ke eji mêkitọbọ ebum inyi owu!’

¹¹Okumugwem oneniria Jerubaali[8] mè Barak[9] mè Jefita mè Samien,[10] ema eneninyan̄a enyi isibi me ubọk ebi ochicha kinyi me agan̄ geelek. Enyi eluluk si me utelelek.

¹²“Ire, mgbọ enyi emun̄be ibe ke Nayas, ogwu ubọọn̄ ebi Amọn òkinu inenitim enyi akọn̄ me lek, enyi enunu lek n̄a, mè inibe ke enyi ekiweek ogwu ubọọn̄ ogwu òbonikikpulu enyi, ubọk geelek Okumugwem orebe ogwu òkikpulu enyi.

¹³Mgbọ keyi, kpọ ogwu ubọọn̄ ya ogwu enyi eweekbe, mè igobo inyi lek kinyi ire ogwu. Okumugwem îra inyi enyi ogwu ubọọn̄ ogwu òbokikpulu enyi.

¹⁴Ire enyi itet ukpook me lek Okumugwem, mè ikitọbọ ebum inyi ọmọ, mè ikigban̄ utọn̄ me ida kan̄, mè ire enyi kpekpaka ibot me lek ikọ Okumugwem otọbe, mè ire otutuuk kinyi mè ogwu ubọọn̄ ogwu òkikpulu enyi mêkisiki ibot inyi Okumugwem Awaji kinyi, eya mônwọn.

¹⁵Ire, ire enyi kpegban̄ utọn̄ me ida Okumugwem, mè ire enyi ikpaka si ibot me lek ikọ Okumugwem otọbe, Okumugwem me lek kan̄ môsa ubọk kan̄ isulu enyi osusut inaan̄ me lek, ike îsulube ebi nte nte kinyi.[11]

¹⁶“Mgbọ keyi, ìkeke, mè ìgwọk chieen̄ kinyi ìmun̄ ikpele inu Okumugwem oborọ me chieen̄ otutuuk kinyi.

¹⁷Enyi mîriọọn̄ ibe ke mgbọ keyi mgbọ ekirọkọ akpa wit ìre mgbọ ura. Ire, mgbọ keyi, mâriaak uriaak igwen Okumugwem ibe iria nsook-isinyọn̄ mè ibot inu mgbọ keyi, inyi enyi emun̄ mè eriọọn̄ ibe ke ijo inu enyi erọbe îwa enenen me isi Okumugwem, mije enyi edobe ọmọ ibe inyi enyi ogwu ubọọn̄.”

¹⁸Samien oneniriaak uriaak igwen Okumugwem, Okumugwem oraria nsook-isinyọn̄ mè ibot inu me usen yaage. Me usen ya, otutuuk ebi ene etetet ukpook me lek Okumugwem, mè itet si ukpook me lek kè Samien.

¹⁹Otutuuk ebi Ijeren etutumu inyi Samien ibe, “Soso, riaak uriaak gwen Okumugwem Awaji kwun̄ me ibot kiji ebi usun̄ kwun̄, inyi eji ekakwaan̄ ìta. Mije, îbook eji chieen̄ ibe, sa me idodo eji edobe ogwu ubọọn̄, ke eji mîrọ ijo inu isọkọ me lek otutuuk ijo inu echi eji ewuukbe lek irọ iraka.”

²⁰Samien onenitumu inyi ema ibe, “Ikatet ukpook. Ubọk geelek enyi erọbe otutuuk ijo inu kechi, ikatele isisiki ibot inyi Okumugwem, mè itọtọbọ ebum inyi ọmọ me otutuuk ejit kinyi.

²¹Ìsan̄a lek kinyi me lek mkpọmfaka cha òrere inu ikike. Ema kpekup me lek inu geege, kpebekọkọt si inyan̄a enyi, mije, ema otutuuk ìre inu ikike.

²²Mije, Okumugwem ìkpojit ebi kan̄ bak me lek ikpele erieen̄ kan̄. Okumugwem îra iwuuk lek ichieek isasa enyi irọ ebi kan̄.

²³Ire me lek n̄a, Awaji ikachieek ibe emi ǹtele ikekiriaak uriaak me ibot kinyi, mè ǹsa me ikeya ǹrọ Okumugwem ijo inu. Mâkijeen̄ enyi si inu òtatat mè igbe ibe enyi ekerọ.

²⁴Gaalek, ìkitet ukpook me lek Okumugwem, mè ìkitọbọ ebum ìnyi ọmọ me atikọ me otutuuk ejit kinyi. Mije, enyi mîmun̄ ikpele inu îrọbe inyi enyi.

²⁵Ire, ire enyi ikpọkpọ itet lek inye ikirọ ijo inu, Okumugwem môjijika enyi melek ogwu ubọọn̄ kinyi isan̄a kpai.”