Read obolo I Sam 14 Bible Online

I Sam 14 - obolo bible

I Sam 14

¹Usen ge, Jonatan onenitumu inyi gwun̄ enerieen̄ òkiben nroon̄ akọn̄ kan̄ ibe, “Na-nu mè eji eneje esaba esi ere ebi akọn̄ ebi Filisia ekupbe me ntut agan̄ keyilọ.” Ire, Jonatan ìkatumu ìnyi ogwu ute.

²Me ike mgbọ ya, Sọọlu òwa osikibe ikweek me irak uti pomegaranet ge me ama Migirọn òkup me okputut ama Gibiya, ọmọ mè efit ebi akọn̄ gweregwen ebi melek kan̄.

³Me etete ebi akọn̄ cha, Ayija ọmọ òwa, melek mgbidim ofọnti ikwaan̄ ogwu òban Awaji me lek. Ayija ìre gwun̄ kè Ayitubu ogwu òrere ngwan̄ kè Ikabodu gwun̄ kè Fineyas gwun̄ kè Ilai ogwu ngwugwa Okumugwem me Silo. Kpunu ene geege me etete otutuuk ebi Ijeren cha òrọriọọn̄ ibe ke Jonatan înan̄a ije.

⁴Me oniin̄ utibi ogoon̄ ya Jonatan oweekbe ijeje itibi iraka isi ere ebi akọn̄ ebi Filisia ekupbe ya, ubene ubene oguga ogoon̄ òwa me agba agan̄ iba cha. Oguga ogoon̄ ge ke ekigwen Boses, sà eyi keyilọ ke ekigwen Sene.

⁵Oguga ogoon̄ cha ge ìkeke me agan̄ inyọn̄ ikiyaka isi ikpọ ama Mikimas, sà eyi keyilọ okeke me agan̄ osiki ikiyaka isi ikpọ ama Geba.

⁶Jonatan onenitumu inyi gwun̄ enerieen̄ òkiben nroon̄ akọn̄ kan̄ ibe, “Na je-nu, inyi eji enesaba esi ere yilọ ere ebi kpefieek afi chilọ ekupbe. Usini mgbọ Okumugwem môtap ubọk inyi eji. Mije, kpunu inu òbokọt ikput ibe Okumugwem ikanyan̄a ene, mè ìre ìbosa owuwa ene irọ, mè ìyaka ire ìbosa ene inen mè inen gaalek irọ.”

⁷Gwun̄ enerieen̄ ya onenifọọk ọmọ ibe, “Inu geelek òkup owu me ejit, rọ! Karaan̄ chieen̄ me udun̄! Emi òwa melek kwun̄ me ejit ge!”

⁸Jonatan onenitumu inyi gwun̄ enerieen̄ ya ibe, “Ire ikeya, înwọn! Eji enesaba esi ere ema ekupbe, mè ekpọkpọ esan̄a lek kiji esibi ejeen̄ ema.

⁹Ire ema imun̄ eji, mè ibe eji ekeke mè ema enu, eji mêkeke me ere eji ekupbe iban ema, eji kpebeje inin̄ ema lek.

¹⁰Ire, ire ema ibe eji enene enu, eji mênene ogoon̄ ya igọọk ema, mije, ogwen ya mônenikana inu ijejeen̄ inyi eji ibe ke Okumugwem îra ikakana ema itap eji me ubọk.”

¹¹Sa me ikeya, ema enenisan̄a lek kiban̄ isibi, inyi ebi akọn̄ ebi Filisia cha ekup me ere kiban̄ ya emun̄ ema. Ebi Filisia cha imumun̄ ema, ekekitumu ibe, “Ìnikpọ! Ebi Iburu mêkinan̄a isibi me emen udọn̄ ere ema elileekbe.”

¹²Ebi akọn̄ ebi Filisia cha ekekitumu inyi Jonatan mè ogwu òkiben nroon̄ akọn̄ kan̄ ya ibe, “Ìnene ìna me ere keyi, inyi eji ejeen̄ enyi inu.” Jonatan otutumu inyi ogwu òkibeme nroon̄ akọn̄ kan̄ ya ibe, “Nene gọọk emi, ke Okumugwem îra ikana ife chi itap ebi Ijeren me ubọk.”

¹³Jonatan okekisa ubọk mè ukot ikinene oguga ogoon̄ ya, ogwu òkibeme nroon̄ akọn̄ kan̄ okekinene igọọk ọmọ me udun̄. Ema inenene ire ere ya, ebi Filisia erọrọn̄ inin̄ ubọk kiban̄. Jonatan okikpan̄ ebi ìkup me agan̄ isi, sà ogwu òkibeme nroon̄ akọn̄ kan̄ okikpan̄ ebi ìkinu me udun̄.

¹⁴Me adasi akọn̄ ya, Jonatan mè ogwu òbeme nroon̄ akọn̄ kan̄ etimbe ikpan̄ ebi Filisia, ebi ema ekpan̄be mîwa iso akọp ene iba me etete ere òwele iso okpọkọ ijọn̄ mgbugbak eriembuuk iba okibak me egwe ge.

¹⁵Mije keya, urimi oninin̄ ijot emen otutuuk orieen̄ akọn̄ ebi Filisia, ukpook oninin̄ emen ebi akọn̄ Filisia cha ìsisibi isi enun̄unun̄. Ijọn̄ me lek kan̄ osisisik, uga urimi ònan̄a me ubọk Awaji ogwogwook ichit ene lek.

¹⁶Ebi akọn̄ kè Sọọlu ebi ìkup me ere ema ekikup ikpọ ere me Gibiya me inyọn̄ ijọn̄ ebi otoko kè Benjamin ebebene chieen̄ imun̄ ebi Filisia ekililiin̄ nyanyanya me urum me urum ikiweek ere ebenin̄.

¹⁷Sọọlu oneninyi ida ibe efuk ebi akọn̄ melek kiban̄, mè eriọọn̄ ebi ìnanan̄a me etete kiban̄. Mgbọ efukbe isan̄a, ema eweweek imun̄ ibe ke Jonatan melek ogwu òbeme nroon̄ akọn̄ kan̄ kpekup me etete kiban̄.

¹⁸Sọọlu onenitumu inyi Ayija ogwu ngwugwa ibe, “Si ben okop inyan̄a-ibot Awaji sa na-nu!” Me ike mgbọ ya, okop inyan̄a-ibot Awaji ọmọ òwa me ubọk ebi Ijeren.

¹⁹Otutuuk mgbọ Sọọlu okitumu ikọ melek ogwu ngwugwa ya, okput ukpo ufialek mè wọlọwọlọ okpọkpọ ikitaan̄ inye ifo isi me emen orieen̄ akọn̄ ebi Filisia ya. Sọọlu imumun̄ ikeya, itutumu inyi ogwu ngwugwa ya ibe itet ubọk ikaan̄, mè ikayaka ìsa okop inyan̄a-ibot Awaji ya ìnu-nu.

²⁰Sọọlu onenitaan̄ ukpo igwen otutuuk ebi Ijeren ebi melek kan̄ ititiin̄, ema enenijibi akọn̄ isi ere ebi Filisia ekupbe. Mgbọ ema erebe ere ya, ema esi imun̄ uga wọlọwọlọ me etete ebi Filisia, mè imun̄ ubọk ema ekisa oge akọn̄ ikpan̄ lek kiban̄.

²¹Îkaan̄ usini ebi Iburu ìwuwuuk lek iyaak ebi kiban̄, mè ikana igọọk ebi Filisia, mè igọọk ema inikup me orieen̄ akọn̄ kiban̄ ya. Me usen ya, ebi ife cha enwenwene ejit, mè iyaka isaba ikana igọọk ebi Ijeren ebi melek kè Sọọlu mè Jonatan ikeke itim akọn̄ me lek ebi Filisia.

²²Otutuuk ebi Ijeren ìsasa me ufieek-owot isi ilileek me inyọn̄ ijọn̄ ogoon̄ ogoon̄ otoko kè Iferem, enọnọ ibe ke ebi Filisia mêkililim iweek ebek ugwem. Ema si enanan̄a isibi, mè igọọk igbaan̄ ubọk itim ebi Filisia cha akọn̄ me lek unye unye.

²³Sa me ikeya ke Okumugwem onyan̄a ebi Ijeren isibi me akọn̄ me usen ya. Ema mîtim akọn̄ usen ya iraka ama Bet Afen isi igwook.

²⁴Me usen ya, ebi Ijeren mîgak iweek, mije Sọọlu onyan̄abe ibot itoon̄ me ibot otutuuk ebi Ijeren ibe, “Môfieek inyi ene geelek òchachak inorie me otu cherekeyi abayaage ire ikakwun̄, mege ire mgbọ mârọbe ebi ochicha n̄a òjot òjot useen̄ inu ema erọbe emi.” Mije keya, kpunu ogwu Ijeren geege òchachak inorie me otu otutuuk egwe usen ya.

²⁵Otutuuk ebi akọn̄ Ijeren enenije inin̄ emen oron me ere ya, mè isi imun̄ aran̄ akwọọk ojotbe ijọn̄ me emen oron ya.

²⁶Ire, mgbọ ema enin̄be oron ya, mè imun̄ aran̄ akwọọk okigbuk isibi, ene geege ìkakọbọ ìtap me otu ìlaka, mije ukpook inyan̄a-ibot ya Sọọlu onyan̄abe itoon̄ ema me ibot.

²⁷Jonatan ìkakup ìnọ mgbọ Sọọlu ogwu ute onyan̄abe ibot ya itoon̄ me ibot ebi Ijeren. Eya orọ, mgbọ Jonatan omun̄be aran̄ akwọọk ya, inenisa otu mkpat òkup ọmọ me ubọk ijuuk itap me emen akpa aran̄ akwọọk ya, mè iwọọk isibi, mè ibene ichak me otu ilaka. Efuuk oninin̄ ọmọ emen, chieen̄ kan̄ obebene ikitoon̄.

²⁸Ene ge me etete ebi melek kan̄ onenitumu inyi Jonatan ibe, “Kpọ, nte kwun̄ ìnyanyan̄a ibot itoon̄ me ibot otutuuk ene ibe ke môfieek inyi ene geelek òchachak inorie me otu otutuuk egwe cherekeyi. Îre eya orọ otutuuk ene ekigak iweek mije uraafiọọn̄.”

²⁹Jonatan obebe, “Nte n̄a îtap ufialek me lek ebi Ijeren! Ìkpọ ubọk chieen̄ n̄a otoon̄be mgbọ keyi mije sọnja aran̄ akwọọk ya nlakabe!

³⁰Mebe ke ebi kiji mîrie inorie ema emun̄be chereyi me ere ebi akọn̄ ebi Filisia ekikup ya, mè inikaan̄ efuuk, kè ema èkpan̄ ebi Filisia èwa egak ike ekpan̄be.”

³¹Me usen ya, ebi Ijeren mîkpan̄ ebi Filisia ibene me Mikimas isi igwook me Ajalọn. Lek kiban̄ owọwọ enenen mije uraafiọọn̄.

³²Ebi Ijeren egwogwook ubọk me lek otutuuk inu ema efumbe, mè itet ebot mè arọọn̄ mè eriembuuk mè bọn eriembuuk, mè ikpan̄, mè itaka anam cha mè eje me emen.

³³Ukpatu onenire utọn̄ kè Sọọlu ibe ke ebi Ijeren mîtaka anam mè eje me emen, mè isa me ikeya irọ ijo inu me isi Okumugwem. Sọọlu ogagana inyi ema ibe, “Enyi ebi ofiaan̄ kechi! Ìkpukpọt ikpele ewuuk ge ìjet emi mgbọ keyi!”

³⁴Ineninyi ida ibe, “Ìsi ìlook otutuuk ebi ene ibe, ogwu ikup itet eriembuuk eyi kan̄ mè ìyaka ire gwun̄ arọọn̄ eyi kan̄, mè isa inu me ere keyi inikpan̄, mè itaka, inyi ene geege ikarie eje, mè ìsa me ikeya ìrọ ijo inu me isi Okumugwem.” Otutuuk ene esasa eriembuuk kiban̄ inu me eririeen̄ usen ya, mè ikup me ere ya ikpan̄.

³⁵Sọọlu oneninama ntook ngwugwa inyi Okumugwem. Eyi ore adasi ntook Sọọlu onamabe inyi Okumugwem.

³⁶Sọọlu onenitumu inyi ebi melek kan̄ ibe, “Ngwa, eji enesa me chieen̄ eririeen̄ yi ejibi akọn̄ esi lek ebi Filisia, mè etim akọn̄ me lek kiban̄ mege ire ewelegwe, mè ekpan̄ ema esan̄a, inyi ene geege ikasik, mè efum inu kiban̄.” Otutuuk ene efọfọọk ọmọ ibe, “Inu geelek ònwọnwọn owu me chieen̄ irọrọ, rọ.” Ire, ogwu ngwugwa òkup me etete kiban̄ obebe, “Eji edasi ekup me ere keyi edo Okumugwem nkeek kan̄ sabum eji èneje.”

³⁷Sọọlu onenido Awaji ibe, “Ìre ǹjibi akọn̄ ǹsi lek ebi Filisia me eririeen̄ yi? Ire nsi, ìre owu môyaka ema itap me ubọk ebi Ijeren, inyi ǹtim m̀kpan̄ ema?” Ire, Awaji ìkasan̄a amọn ìnyi ọmọ otutuuk usen keya.

³⁸Sọọlu onenigwen ebi ibot akọn̄ kan̄ ititiin̄, mè inibe ema “Ìna-nu, mè eji enegbaan̄ ibot esọk, mè eweek eriọọn̄ ijo inu eji erọbe cherekeyi!

³⁹Kè lek ugwem Okumugwem ogwu òkinyan̄a ebi Ijeren! Ikerere Jonatan gwun̄ n̄a orọ ijo inu ya, ebekpakpan̄!” Ire, kpunu ene geege òsasan̄a amọn.

⁴⁰Sọọlu onenibe ema, “Enyi otutuuk ìkeke me agan̄ ge, mè emi mè Jonatan gwun̄ n̄a ekeke me agan̄ ge.” Ema efọfọọk ọmọ ibe, “Inu geelek omun̄be ibe ke înwọn, rọ.”

⁴¹Sọọlu onenitumu inyi Okumugwem, Awaji ebi Ijeren ibe, “Soso, jeen̄ agan̄ ìkarọ ìlọ!” Me mgbọ etetbe ǹcha ya, itetet agan̄ kè Jonatan mè Sọọlu, mè ijeen̄ ibe ke ebi Ijeren kperọ ilọ.

⁴²Sọọlu onenibe, “Ìtet-nu ǹcha ya me etete emi melek Jonatan gwun̄ n̄a.” Mgbọ etetbe ǹcha ya, ǹcha otetet Jonatan.

⁴³Sọọlu onenibe Jonatan, “Tumu-nu nyi emi, ìre keke ke orọ?” Jonatan otutumu inyi ogwu ute ibe, “Me atikọ, nsa otu mkpat òkup emi me ubọk irep me emen aran̄ akwọọk, mè ibene ichak me otu. Mgbọ keyi, kpọ emi gwu! Mbem lek ikwukwu!”

⁴⁴Sọọlu otutumu inyi ogwu gwun̄ ibe, “Jonatan, kè Awaji isulu emi osusut, mè itoon̄ urot! Îre mkpa ke obokwu!”

⁴⁵Ire, ebi Ijeren efọfọọk Sọọlu ibe, “Ìin̄-iin̄-ìin̄! Ìre Jonatan ogwu ònyanyan̄a otutuuk ebi Ijeren isibi me mkpa me ikpele oniin̄ òkup ikeyi ke ebe ke ebekpakpan̄? Kè lek ugwem Okumugwem! Kubọk ukut ijeek ge ìkponan̄a me ibot kè Jonatan irọn̄ me ijọn̄! Mije, îre sa me unye Awaji ke Jonatan osa inyan̄a ebi Ijeren cherekeyi.” Sa me ikeyi ke ebi ene enyan̄a ebek ugwem kè Jonatan me usen ya, inyi ikakwu.

⁴⁶Sọọlu onenitele igọgọọk ebi Filisia. Ebi Filisia si efofon ama kiban̄.

⁴⁷Sọọlu îtet irek ubọọn̄ kan̄ me etete ebi Ijeren inye, mè itim akọn̄ me lek ebi ochicha kan̄ me agan̄ geelek. Îtim akọn̄ me lek ebi Mowabu, mè ebi Amọn, mè ebi Edọm, mè ebi ubọọn̄ Soba, mè ebi Filisia. Ido geelek îyakabe isi ida, ìkijijijaka isan̄a kpai.

⁴⁸Sọọlu ìtim akọn̄ cha kubọk ogwu usọ akọn̄, mè itim si ikpan̄ ebi Amalek, mè inyan̄a ebi Ijeren isibi me ubọk otutuuk ebi ìjijijaka ema, mè ikisa ema irie ijot owot.

⁴⁹Erieen̄ bọn ebirieen̄ kè Sọọlu ìre Jonatan mè Isibi mè Malikisuwa. Erieen̄ bọn ebibaan̄ iba kan̄ ìre Merabu òrere ogwu adasi, mè Mikali òrere ogwu òso iba.

⁵⁰Erieen̄ ogwu nwa ìre Ayinowam gwun̄ kè Ayimaji. Erieen̄ ogwu ibot akọn̄ kè Sọọlu ìre Abina gwun̄ kè Neri ngwan̄ nte kè Sọọlu.

⁵¹Kis nte kè Sọọlu melek kè Neri nte kè Abina ìre bọn kè Abiyen.

⁵²Me otutuuk ukot mgbọ Sọọlu okikpulu, ebi Ijeren melek ebi Filisia ekpọkpọ ikitim akọn̄ unye unye. Mgbọ geelek Sọọlu omun̄be gwun̄ enerieen̄ geelek òkakaan̄ efuuk akọn̄, mè inye lek, îra imọnọ ene ya itap me otu ifuk ebi akọn̄ kan̄.