Read obolo I Sam 15 Bible Online

I Sam 15 - obolo bible

I Sam 15

¹Usen ge, Samien onenitumu inyi Sọọlu ibe, “Îre emi ke Okumugwem oria ibe emi ǹnentọkọ owu aran̄ me ibot, mè ǹrọ owu ubọọn̄ ǹnyi ebi kan̄ ebi Ijeren. Eya orọ, mgbọ keyi, gban̄ inu Okumugwem obe emi ǹtumu ǹnyi owu.

²Okumugwem Ogwukaan̄ Inyọn̄ mè Ijọn̄ ìbe ikeyi, ‘Emi mânisulu ebi Amalek osusut, mije inu ema erọbe ebi Ijeren me oniin̄ mgbọ ebi Ijeren ekinan̄a me Ijipiti isibi.

³Mgbọ keyi, jibi akọn̄ nin̄ lek ebi Amalek, mè jijaka otutuuk kiban̄ mè otutuuk inu kiban̄ san̄a, katele inu kiban̄ geege. Kpan̄ otutuuk ene, ebirieen̄ mè ebibaan̄, mè otutuuk nsabọn mege ire lek ebi ìkup me otu ebe. Kpan̄ si otutuuk anam kiban̄, eriembuuk mè gwun̄ arọọn̄ mè aligọ mè inyinya akpan otutuuk, katele anam geege.’ ”

⁴Sọọlu onenigwen ebi akọn̄ kan̄ ititiin̄ me Telayim, mè inifuk otu ifuk kiban̄, ema efit obop ebi akọn̄ ebi Ijeren iba ìkije ukot ukot, mè akọp obop ebi akọn̄ ebi Juda.

⁵Sọọlu melek ebi akọn̄ kan̄ enenisi ama ebi Amalek, mè inikpa mbin akọn̄ ikana ama ya me emen iteke ijọn̄ òkup me ere ya.

⁶Sọọlu oneniria etip ijet ebi Keyin ebi ìluk me etete ebi Amalek ibe, “Ìnan̄a ìsibi me etete ebi Amalek, inyi akọn̄ ikagbaan̄ enyi melek kiban̄ ìrie. Mije, enyi mîtap ubọk inyi ebi Ijeren me mgbọ ema enan̄abe me Ijipiti ikije isibi.” Otutuuk ebi Keyin ìluk me etete ebi Amalek esisibi itele ebi Amalek.

⁷Sọọlu ojijibi akọn̄ inin̄ lek ebi Amalek, mè ikpan̄ ema ibene me ama Abila isi igwook me ama Suru eyi òkiyaka isi ikpọ Ijipiti,

⁸mè itet Agagi ogwu ubọọn̄ ebi Amalek agam agam, mè ijijaka otutuuk ebi kan̄ isan̄a kpai, ene geege ìkanwọnọ otu oge akọn̄ ebi Ijeren.

⁹Ire, Sọọlu mè ebi Ijeren etetele Agagi ogwu ubọọn̄ ebi Amalek me ògat ugwem, mè ikpulu arọọn̄ mè ebot mè eriembuuk echi òjajaan̄ lek ichit, mè echi òjajaan̄ lek igọọk, mè bọn arọọn̄ echi egwookbe imiin̄ ufuk, mè ikpulu si otutuuk inu geelek ònwọnwọn lek mè ijaan̄. Ema kpeweek ijijijaka echichi. Ire, inu geelek echi ikakaan̄ge oruru, mè echi ikakupge me lek inu geege, echicha ke ema ejijaka isan̄a kpai.

¹⁰Okumugwem onenitumu inyi Samien ibe,

¹¹“Mbọnọ lek ibe ke nrọ Sọọlu ubọọn̄, mije, Sọọlu îjit emi itele, ìkakirọ ida ikọ n̄a.” Ikọ ya osisisaak Samien enenen, Samien otataan̄ ukpo ito ito igwen Okumugwem otutuuk eririeen̄ usen ya.

¹²Me ata otu ewelegwe, Samien onanan̄a ikeke, mè ibene ije ije ibosi imun̄ Sọọlu. Enenitumu inyi ibe ke Sọọlu îsi ama Kamen, mè inama inu ge me ere ya eyi mêkisa ikikeek ọmọ, mè inan̄a me ere keya isi Giligan.

¹³Samien onenisi imun̄ Sọọlu. Sọọlu otọtọp Samien amọn ibe, “Kè Okumugwem igbana owu! Otutuuk inu geelek Okumugwem onyibe ida ibe emi ǹrọ, nrọ iso.”

¹⁴Samien onenibe ọmọ, “Sà ida arọọn̄ nkinọ cha ye? Ìbet lek ida eriembuuk ire echa emi nkinọ.”

¹⁵Sọọlu ofọfọọk ọmọ ibe, “Anam cha ìnan̄a me Amalek. Ebi akọn̄ kpekpan̄ arọọn̄ mè eriembuuk echi òjajaan̄ lek ichit, ebesa ema inigwa ngwugwa inyi Okumugwem Awaji kwun̄. Otutuuk echi òsisik, mîjijaka isan̄a kpai.”

¹⁶Samien okpikpin ikọ ya itap ọmọ me otu, mè ibe ọmọ, “Îkem! Tet kaan̄, mè ǹtumu ikọ Okumugwem otumube inyi emi me eririeen̄ cherekeyi ǹnyi owu.” Sọọlu obebe ọmọ, “Tumu ma.”

¹⁷Samien otutumu inyi Sọọlu ibe, “Ubọk geelek owu omun̄be lek kwun̄ kubọk ogwu ìkakup me lek inu geege, ìre ìkare owu ore ogwu ibot otutuuk otoko ebi Ijeren? Îre Okumugwem osa owu ito ubọọn̄ òkikpulu otutuuk ebi Ijeren.

¹⁸Okumugwem oneniria owu ikwaan̄, mè inyi owu ida ibe owu òsi òjijaka ebi Amalek, ebi ife cha ìkirọ ijo inu, mè òtim ema akọn̄ me lek, mè òkpan̄ ema òsan̄a kpai.

¹⁹Ìre keke orọ owu òkagban̄ ida Okumugwem? Ìre keke orọ mè owu òbumu ejit òrọn̄ ònin̄ me lek m̀fum, mè ògọọk me ikeya mè òrọ inu ikpak me isi Okumugwem?”

²⁰Sọọlu ofọfọọk Samien ibe, “Iyak! Emi ǹrọrọ ida Okumugwem iso ma! Inu Okumugwem onyibe ida ibe emi ǹrọ, nrọ isan̄a! Njijaka Amalek isan̄a kpai. Gaalek Agagi ogwu ubọọn̄ Amalek ke nsa agam agam ika inu.

²¹Îre ebi akọn̄ eteen̄ ebi kè arọọn̄ mè eriembuuk echi òjajaan̄ lek ichit me etete inu cha ebe ejijaka isa ika inu, inyi mêsabe inigwa ngwugwa inyi Okumugwem Awaji kwun̄ me Giligan.”

²²Samien ofọfọọk Sọọlu ibe, “Ìre eyi owa ke Okumugwem okiweek, ìre ngwugwa ewọwọp iriọk melek ofifi chieen̄ ngwugwa geelek, sà ìre igbagban̄ utọn̄ me ida Okumugwem? Kpọ, isisiki ibot, ọmọ onwọn igak igwagwa ngwugwa. Ikeya si igbagban̄ utọn̄, ọmọ onwọn igak iwọwọp okpọn̄ orie arọọn̄ me inyọn̄ ntook ngwugwa.

²³Mije, ikpakpaka ibot ìkup kubọk ijo inu eyi idodo ido-inu. Ikeya si, inyenye ibot ìkup kubọk irariaak mkpọmfaka. Mije owu ojitbe ikọ Okumugwem, Okumugwem îjit owu si, ibe ke owu òkayaka ìre ubọọn̄.”

²⁴Sọọlu ofọfọọk Samien ibe, “Iin̄, nrọ ijo inu, mije, ǹkarọ otu ikọ Okumugwem, ǹkagban̄ si utọn̄ me lek ikọ kwun̄. Ukpook ebi ene otet emi ke mgban̄ utọn̄ inyi ema.

²⁵Mgbọ keyi, soso tele ijo n̄a nyi emi, mè nye lek gọọk emi gwu kom, inyi ǹsi ǹtọbọ ebum ǹnyi Okumugwem.”

²⁶Samien ofọfọọk Sọọlu ibe, “In̄-in̄, m̀kpagọọk owu igwu ikom. Mije, owu ojit ikọ otu Okumugwem, Okumugwem si ojijit owu, ibe ke owu òkayaka ìre ubọọn̄ òbokikpulu ebi Ijeren.”

²⁷Samien ogwugwu isi ikana iboje ifo, Sọọlu onyanyana ubọk itet otu utọn̄ ofọnti awudu Samien otapbe, ofọnti ya ogwagwak.

²⁸Samien otutumu inyi Sọọlu ibe, “Ikeyi si ke Okumugwem ogwak mkpulu ido Ijeren isan̄a owu me ubọk cherekeyi, mè iyaka itap me ubọk ogwu melek kwun̄, ogwu ònwọnwọn igak owu.

²⁹Kpọ, Awaji ebi Ijeren, Ogwu Mgbọ Geelek, ìkakikan̄ ataak, ìkakinwene ejit. Mije, ọmọ ìkare ebilene ogwu òkirọ inu ilọ, mè ikinwene ejit.”

³⁰Sọọlu okpọkpọk itumu si inyi Samien ibe, “Iin̄, nrọ ilọ. Ire, nyi emi sọn̄ ulibi me isi ebi ugane ebi n̄a chi mè isi ebi Ijeren, mè gọọk emi gwu kom, inyi ǹsi ǹtọbọ ebum ǹnyi Okumugwem Awaji kwun̄.”

³¹Samien ochechieek, mè inigọọk Sọọlu igwu ikom. Sọọlu onenisi itọbọ ebum inyi Okumugwem.

³²Samien oneninyi ida ibe esan̄a Agagi ogwu ubọọn̄ ebi Amalek ya esibi ejet ọmọ. Agagi onanan̄a ije isibi inu me ubelejit, mè ikitumu ibe, “Me atikọ, ujat eyi mkpa îra iraka.”

³³Samien otutumu inyi ọmọ ibe, “Ike oge akọn̄ kwun̄ orọbe inyi ebibaan̄ ekana ebi una bọn, ikeya si ke nga kwun̄ obokana ogwu una gwun̄ me etete ebibaan̄.” Samien ochocho Agagi ifiin̄ me isi Okumugwem me Giligan.

³⁴Samien onenije ifo Rama, Sọọlu ojeje si ifo uwu kan̄ me Gibiya òrere ama kiban̄.

³⁵Samien ìkayaka ìmun̄ Sọọlu isi mè isi ìgak ikeya mege ire usen mkpa kan̄. Ire, Samien îfieek ejit enenen me ibot kè Sọọlu. Okumugwem obọbọnọ lek mije îsabe Sọọlu irọ ogwu ubọọn̄ ebi Ijeren.